VOV4.Jarai - Hăng tơhnal pơkă ƀu pioh hmâo tơlơi ruă măt yua gơnam ƀong mơñum hăng hơdôm tơlơi ruă tưp mơng gơnam ƀong huă, amăng tal Tết blan prơmi thun 2022, tơring čar Daklak hmâo pok pơhai kơčăo bruă pel ĕp hơdôm anih anom pơkra, sĭ gơnam ƀañ trung thu amăng tơring čar.

Kiăo tui anun, mơng lơ 6 truh lơ 8 blan 9, tơring čar Daklak amra pơjing 2 grŭp hyu pel ĕp ƀơi 6 bôh tơring glông, plơi prong pel ĕp bruă ngă tui hơdôm tơlơi pơkă amăng tơlơi phiăn kơ pơhlôm gơnam ƀong huă mơng hơdôm bôh anom pơkra gơnam, sĭ gơnam ƀơi tơring čar. Grŭp hyu pel ĕp amra đing nao hơdôm mơta gơnam dưi mă yua lu amăng tal Tết blan prơmi kah hăng: Ƀan, mứt, kĕo, tơpai ƀiêr, añăm mơnong. Hrom hăng bruă pel ĕp, Grŭp amra gum hrom hăng hơdôm anom lăi pơhing kiăng kơtưn lăi pơthâo hơdôm tơlơi pơkă kơ pơhlôm gơnam ƀong huă klă truh hơdôm anom pơkra gơnam, sĭ mơdrô gơnam ƀong huă hăng pơtô mơnuih ƀôn sang hơdră ruah mă, blơi yua gơnam ƀong pơhlôm klă amăng tal Tết blan prơmi./.

Siu H’ Prăk: Pơblang