VOV4.Jarai - Tal pơplông mă ƀăng gưl 3 thun 2022 giăm truh laih, klin Covid-19 ăt ngă tơnap mơn, hơdôm bôh sang hră gưl 3 amăng tơring čar Daklak glăk pơtô pơhrăm pơplih tañ kiăng giong hĭ bruă hrăm amăng thun hrăm anai. Biă ñu bruă prăp lui bôh thâo kơ čơđai sang hră anih rơnuč gưl kơ tal pơplông mă ƀăng hăng ruah đĭ čơđai hrăm gưl dlông pơ̆ anăp. Đơ đam tơring čar Daklak hmâo 59 bôh sang hră gưl 3, amăng anun hmâo 48 bôh sang hră hmâo brơi čơđai hrăm anih 12 nao sang hră hrăm. Hơdôm bôh sang hră dô̆ glăi ăt hrăm tui hơdră lăng nao rai mơng ataih mơn, biă ñu lĕ čơđai sang hră ƀơi plơi prong Buôn Ma Thuột hăng tơring glông Krông Ƀuk. Ơi Phạm Đăng Khoa, Khua Gơnong bruă pơtô pơhrăm tơring čar Daklak brơi thâo, hluai tui tơlơi klin ngă ƀơi tơring čar, hơdôm bôh sang hră pơphun bruă pơtô pơhrăm pơplih tañ, pơhlôm mông hrăm, bôh yôm phun, bôh than kiăng hloh; hrom hăng anun pơhlôm tơlơi suaih pral kơ mơnuih apăn bruă, mơnuih mă bruă pơtô čơđai, čơđai sang hră./.

Siu H’ Prăk: Pơblang