VOV4.Jarai - Pơtrut kơtang bruă mă bơyan bơnga gum djru thun 2022 kiăng djru mơnuih ƀôn sang tơnap tap hmâo dong tơlơi čơkă tết. Anai lĕ sa amăng hơdôm bruă dưi ba tơbiă amăng mông jơnum klah čun bruă mă khul hăng bruă hlăk ai tơdăm ngek dra muai, čơđai muai thun 2021, pok pơhai bruă mă thun 2022 mơng Khul hlăk ai tơring čar Daklak pơphun lom lơ 17/1. Tui hăng tơlơi pơsit mơng Khul hlăk ai Daklak, amăng thun rơgao, bruă djru pơgang pơgăn klin ruă Covid-19 dưi hmâo hlăk ai Daklak gum hrom pok pơhai ba glăi bôh tơhnal.

Mơng anun iâu pơhrui hăng pơpha hơdôm rơtuh rơbâo blah bơnal gôm ƀô̆, ia rao tơngan pơdjai kơman, mơnil pơgang hăng sum ao pơgang hlôm hlâo gah ia jrao abih bang nua ñu rơbêh kơ 1 klai prăk. Đơ đam tơring čar hmâo djru giăm truh 24 rơbâo Kơdung gơnam pơhlôm hăng Kơdung jrao pơhlôm kơ mơnuih ƀôn sang hăng tơdăm ngek dra muai hmâo tơlơi hơdip tơnap, hăng abih bang nua ñu giăm truh kơ 6 klai prăk. Hrom hăng anun, hơdôm gưl khul hlăk ai amăng tơring čar hmâo ngă tui laih giăm truh 2.700 ring bruă, črăn bruă hlăk ai; pơkra phrâo rơbêh kơ 119 km jơlan nao rai “rơđah – mơtah – agaih – hiam – klă – pơhlôm”; pơphun lăi pơthâo, anăp bruă mă hăng lăi pơthâo bruă mă kơ hơdôm pluh rơbâo wot čô mơnuih amăng khul tơdăm dra; djru hơdôm rơtuh hơdră hlăk ai bơwih ƀong huă, pơphun bruă, pơdŏng bruă mă./.

Siu H’ Prăk: Pơblang