VOV4.Jarai - Akă hmâo sa blan dong, čơđai sang hră hơdôm gưl ƀơi Daklak amra pơphun thun hrăm 2022-2023. Kiăng pơhlôm bruă pơtô pơhrăm, bruă prăp lui gơnam tam glăk hmâo hơdôm anih anom pơtrut kơtang, ba tơbiă hơdôm bruă pơhlôm hlâo, pơhlôm klă bruă pơtô pơhrăm hluh gah amăng djop tơlơi kiăng.

Hơdôm hrơi akô̆ blan 8 anai, ƀơi Sang hră gưl sa Čư̆ Pui II, Sang hră Ea Rớt, să kual ataih asuek Čư̆ Pui, tơring glông Krông Bông glông sang 2 tal 6 bôh anih hrăm hăng sa dua bôh anih mă bruă ƀing nai, glăk dưi pơkra giong hĭ bơbung. Hơdôm bôh anih hrăm hơđăp hăng anom mă bruă nai wai lăng sang hră dưi pik ia ping tuir glăi giong laih; amăng hơdôm anih hrăm, kơƀang grê, kơƀang čih hăng hơdôm gơnam mă yua kơ bruă pơtô pơhrăm ăt dưi prăp lui tŏng ten mơn.

Nai pơtô čơđai Nguyễn Hồng Thuần – Khua Sang hră brơi thâo, thun hrăm anai, 3 bôh sang hră mơng Sang hră gưl sa Čư̆ Pui II amra čơkă năng ai ñu 1.400 čô čơđai sang hră. Ră anai sang hră giăm kual krah Jơnum min mơnuih ƀôn sang să phun ñu dưi prăp lui giong laih gơnam mă yua, kơnong kơ dô̆ sang hră Ea Rớt ăt glăk prăp lui mơn, khom truh rơnuč blan 12 kah mơng giong. Kiăng pơhlôm bruă pơtô pơhrăm lom gơnam mă yua akă giong, sang hră hmâo prăp lui tŏng laih jơlan gah pơhlôm hlâo:

“Ră anai pơdŏng 6 bôh anih hrăm dlông tal samơ̆ akă giong ôh, khom truh akô̆ tal 2 hrăm anun kah mơng giong, hăng pơplih đĭ hrăm. Ƀơi anăp, sang hră hmâo sa anih pơkra hăng hnal kyâu hăng amra mă yua pioh brơi čơđai hrăm hră jăng jai. Sang hră ăt pơpha mơn kơƀang grê kơ anih hrăm anai; rơngiao kơ anun ăt ngă mơn hră lăi pơthâo rơkâo hăng Jơnum min mơnuih ƀôn sang tơring glông rơkâo prăk blơi dong 30 per kơƀang grê phrâo hăng dưi pơsit brơi hăng lom blơi amra ba mut abih amăng anun”.

Akô̆ blan 8/2022, lu čơđai sang hră ƀơi Sang hră gưl sa Čư̆ Pui II, sang hră Ea Rớt, să Čư̆ Pui, tơring glông Krông Bông nao sang hră rơmet agaih lan sang hră, prăp lui kơ thun hrăm phrâo

Thun hrăm 2022-2023 tơring glông Krông Bông hmâo 51 bôh sang hră mơng čơđai anet truh gưl 2, hăng 21 rơbâo čô čơđai sang hră. Ơi Huỳnh Viết Trung – Khua Anom pơtô pơhrăm tơring glông brơi thâo, kiăng prăp lui kơ thun hrăm phrâo, Jơnum min mơnuih ƀôn sang tơring glông Krông Bông pơsit brơi 24 klai 500 klăk prăk yua pơdŏng phrâo 66 bôh anih hrăm; pơpha lu ngăn rơnoh pha ra kiăng pơkra glăi, pơkra ming hơdôm rơtuh bôh anih hrăm sô hơđăp; blơi prăp gơnam mă yua, kơƀang grê, măi mok djru bruă pơtô pơhrăm. Truh mông anai, abih bang hơdôm bôh sang hră leng kơ ngă tui djơ̆ rơnoh kơčăo bruă ba tơbiă.

“Gah bruă prăp lui gơnam mă yua kiăng prăp brơi kơ thun hrăm phrâo 2022 -2023 lĕ Anom pơtô pơhrăm tơring glông hmâo prăp lui laih bruă jŭ yap mơng thun hlâo, pơdŏng kơčăo bruă mơng ataih, tơdơi kơ anun lăi pơthâo kơ Jơnum min mơnuih ƀôn sang tơring glông pơsit, biă ñu lĕ hơdôm bôh să kual asuek ataih. Ră anai sa dua bôh sang hră hmâo ngă giong, dô̆ sa dua bôh sang hră glăk bơkơtưn kiăng ngă hiưm hơpă truh blan 9 thun anai phun ñu ngă giong, amra pok phun thun hrăm phrâo”.

Bơ̆ ƀơi tơring glông Lak, thun hrăm 2022-2023 anai, ăt čơkă mơn giăm truh 13 rơbâo čô čơđai tui hrăm hơdôm gưl mơng čơđai anet truh gưl 2. Ơi Nguyễn Văn Ngọc - Khua Anom bruă pơtô pơhrăm tơring glông lăi pơthâo, bruă pơplih gơnam mă yua, tuh pơplai blơi prăp gơnam mă yua pơtô pơhrăm dưi hmâo anom pok pơhai kơčăo bruă truh pơ̆ hơdôm bôh sang hră dong mơng akô̆ thun. Truh bơyan pơdơi prong, Anom rơkâo hơdôm bôh sang hră gơgrong mă pô, tui hluai kơ ngăn rơnoh hmâo mă yua dưi pha brơi kiăng pơkra glăi, pơkra ming; pơtrut klă, pel ĕp hơdôm ring bruă man pơdŏng phrâo, kiăng pơhlôm djơ̆ rơnoh; ba tơbiă jơlan gah pơhlôm hlâo kiăng pơhlôm brơi tơdah hmâo ring bruă ƀu hmao ngă giong lĕ bruă pơtô pơhrăm ăt hluh gah mơn:

“Anom bruă pơtô pơhrăm dưi ngă pô tuh pơplai pơkra glăi, pơkra ming 3 ring bruă sang hră, anih hrăm, hăng sa amăng mrô anun hmâo ngă giong laih, bơ̆ 2 bôh  sang hră dong glăk ngă giong hăng truh kơ lơ 15/8 anai ăt amra pơđut mơn bruă pơkra glăi, pơkra ming. Ră anai kơnong kơ dô̆ hơdôm ring bruă prong bruă ngă giong amra kaih hĭ truh tơdơi kơ blan 9, hăng bruă anai anom gơgrong hlâo gum hrom hăng hơdôm sang hră pơdŏng jơlan gah ƀơi anăp lĕ čơđai sang hră hơđăp ƀơi anai pơ̆ hơdôm anih hrăm sô hơđăp ƀudah pơpha hrăm dua tal. Phun ñu lĕ kiăng pơhlôm klă bruă pơtô pơhrăm”.

Tui Gơnong bruă pơtô pơhrăm tơring čar Daklak, thun hrăm 2022-2023, đơ đam tơring čar hmâo 478.180 čô čơđai tui hrăm ƀơi 1.017 bôh sang hră, mơng gưl čơđai anet truh gưl 3. Kiăng pơhlôm anih anom hrăm hră kơ čơđai thun hrăm phrâo, Jơnum min mơnuih ƀôn sang tơring čar hmâo mă yua laih 477 klai prăk tuh pơplai pơdŏng hăng blơi prăp gơnam mă yua kơ bruă pơtô pơhrăm. Amăng anun, giăm truh 389 klai prăk mă yua pơdŏng phrâo 350 bôh anih hrăm, pơkra glăi 170 bôh anih hrăm sô hơđăp, pơdŏng pơnăng war, lan sang hră, bah amăng war kơ lu sang hră anih hrăm; năng ai ñu 88 klai prăk mă yua blơi kơƀang grê, kơƀang čih hăng lu gơnam mă yua pơtô pơhrăm pơkon./.

Tuấn Long: Čih – Siu H’ Prăk: Pơblang