VOV4.Jarai - Kiăng prăp lui kơ thun hrăm phrâo 2022-2023, lu amĭ ama čơđai hăng čơđai sang hră ƀơi tơring čar Daklak glăk hyu blơi tañ hơdrôm hră hrăm, biă ñu hơdrôm hơdră hrăm hơdôm anih 3, 7, 10. Lu amĭ ama čơđai bơngot kơƀah hơdrôm hră hrăm lom thun blung a pok pơhai Jơlan hơdră pơtô pơhrăm phrâo.

Thun anai, ơi Đỗ Hùng Thuần, phường Tân An, plơi prong Buôn Ma Thuột ƀu ƀơi anăp nao blơi hơdrôm hră hrăm kơ ană pô mơ̆ gơnang arăng blơi brơi. Ơi Thuần brơi thâo: Thun anai mă yua tui jơlan hơdră pơplih phrâo, hơdrôm hră hrăm ră anai hmâo 3 per dưi hơdôm bôh anom sĭ mơdrô hơdrôm hră sĭ anun lĕ per Cánh diều, Chân trời sáng tạo, Kết nối tri thức, hăng sang hră anih ană pô dô̆ hrăm kiăng blơi hơdôm akô̆ hơdrôm hră mơng lu per pha ra. Tơlơi anai ngă tơnap kơ ñu lom hyu ĕp blơi:

“Tui hluai kơ rim bôh sang hră pha ra mơ̆ hmâo hơdôm per hơdrôm hră pha ra, khom gơnang ƀing sĭ hơdrôm hră ruah brơi, bơ̆ amĭ ama lĕ ƀu thâo rơđah ôh, ƀu thâo ruah hiư̆m hơpă ôh kiăng djop per hơdrôm hơdră kơ ană bă hrăm hră”.

Amĭ ama čơđai ruah hơdrôm hră hrăm kơ ană bă

Bơ̆ hăng ƀing čơđai kah hăng Phạm Ngọc Hân, čơđai sang hră anih 7A4, Sang hră gưl 2 Nguyễn Tất Thành, tơring glông Čư̆ Mgar khă dưi hmâo sang lăi pơthâo anăn păn hơdôm akô̆ hơdrôm hră kiăng blơi samơ̆ kiăng dưi blơi djop hơdrôm hră, ñu gơnang laih amĭ ñu pơgiăng nao tơl anih sĭ hơdrôm hră ƀơi plơi prong Buôn Ma Thuột.

“Kâo rai mơng tơring glông Čư̆ Mgar, lom rai pơ̆ anai kâo ƀu thâo rơđah ôh lom khom ruah mă lu hơdrôm hră kah hăng Chân trời sáng tạo, Kết nối tri thức, Cánh diều. Samơ̆ gơnang kơ hmâo tơlơi gum djru mơng sang hră kâo dưi ruah per hơdrôm hră djơ̆”.

Tui hăng Tơlơi pơsit 1360, lơ 16/6/2022 mơng Jơnum min mơnuih ƀôn sang tơring čar Daklak kơ bruă pơsit anăn hơdrôm hră hrăm anih 3, anih 7 hăng anih 10 mă yua amăng anih anom pơtô pơhrăm mơng thun 2022-2023 ƀơi tơring čar, hăng anih 3 lĕ 21 mơta anăn hơdrôm hơdră; anih 7 hmâo 26 anăn hơdrôm hră; kơnong kơ anih 10 hmâo 44 anăn hơdrôm hră mơng 3 per hơdrôm hră hrăm Cánh diều, Chân trời sáng tạo hăng Kết nối tri thức hăng abih bang 138 akô̆ hơdrôm hơdră, yap wot hơdrôm hră ruah mă hăng hơdrôm hră khom hmâo.

Ơi Trương Văn Băng, Khua Sang bruă sĭ gơnam kơ čơđai hrăm hră  Daklak brơi thâo: Kiăng pơhlôm bruă djop hơdrôm hră hrăm kơ thun hrăm phrâo, biă ñu hăng hơdôm anih hrăm mă yua jơlan hơdră pơtô pơhrăm thun 2018, Sang bruă iâu pơhrui laih abih bang mơnuih mă bruă; prăp lui anih pơdă hơdrôm hră; pơphun pơhrăm brơi mơnuih mă bruă kiăng lăi pơthâo djru brơi kơ amĭ ama čơđai, čơđai sang hră hăng hơdôm anih anom sĭ mơdrô hră, rơkâo blơi hlâo hơdrôm hră hrăm djơ̆.

“Hơdôm bôh sang hră, plơi pla hơdôm bôh tơring glông, plơi prong, hơdôm bôh sang hră ruah mă hơdrôm hră lĕ pha ra hăng ƀu ha amăng plĕ, yua anun sang bruă ăt bưp lu tơnap mơn, samơ̆ sang hră hmâo pơkôl hăng Sang in tơglit hơdrôm hră hrăm Việt Nam lĕ sang bruă amra sĭ djop hơdrôm hră hrăm, hơdrôm hră ngă tơlơi hrăm kơ ƀing čơđai amăng tơring čar Daklak, ƀu pioh kơƀah hơdrôm hră ƀơi sa dua bit anih ôh amăng thun hrăm 2022-2023”.

Bruă prăp lui hơdrôm hră hrăm thun hrăm phrâo jing tơlơi đing nao mơng ƀing amĭ ama čơđai, čơđai sang hră. Yua anun, kiăng djru bruă blơi hơdrôm hră hrăm kơ ƀing čơđai djơ̆ per hơdrôm hră tui tơlơi pơkă, Gơnong bruă pơtô pơhrăm tơring čar Daklak hmâo laih hră pơ-ar rơkâo hơdôm bôh sang hră khom lăi pơthâo hmao tlôn anăn păn hơdrôm hră hrăm mă yua amăng thun hrăm phrâo. Hrom hăng anun pơtă amĭ ama čơđai, čơđai sang hră kơ tơlơi kơƀah hơdrôm hră juăt truh amăng akô̆ hăng krah blan 8, kiăng huăi bơngot đơi hyu blơi amăng hơdôm hrơi anai. Hrom hăng anun, kiăng ĕp blơi hơdrôm hră ƀơi hơdôm anih anom sĭ hơdrôm hră hmư̆ hing tâ̆o klă, bĕ tơlơi blơi djơ̆ hơdrôm hră ƀu kiăng yua, ƀu klă hăng blơi ƀu djơ̆ akô̆ hơdrôm hră hrăm.

Gơnong bruă pơtô pơhrăm tơring čar Daklak ăt hmâo mă yua laih mơn hră pơ-ar pơtô pơphun ruah mă hơdrôm hră hrăm hơdôm anih 3, 7 hăng anih 10 kơ thun hrăm 2022-2023 tui glông jơlan pơplih phrâo hơdrôm hră hrăm yua kơ Ding jum pơtô pơhrăm mă yua. Kiăo tui anun, Gơnong bruă pơtô pơhrăm tơring čar Daklak rơkâo hơdôm bôh anom, sang hră ƀơi tơring čar gơgrong ba bruă pơdŏng kơčăo bruă pok pơhai ruah mă hơdrôm hră hrăm tui tơlơi pơtô ba mơng Ding jum pơtô pơhrăm hăng Jơnum min mơnuih ƀôn sang tơring čar ; Gơnong bruă ăt lăi pơthâo abih bang, lăi pơthâo djop hơdôm hră pơ-ar pơtô ba, črâo ba pơplih phrâo jơlan hơdră pơtô pơhrăm hăng ruah mă hơdrôm hră hrăm kơ abih bang mơnuih apăn bruă, nai pơtô čơđai, mơnuih mă bruă, čơđai sang hră hăng amĭ ama čơđai.

Hlâo kơ anun, kiăng gal brơi kơ mơnuih apăn bruă wai lăng, nai pơtô čơđai hăng amĭ ama čơđai hmâo mông hyu hơduah ĕp, kơsem min hăng thâo kơjăp bôh yôm hơdôm hră ngă gru hơdrôm hră yua kơ hơdôm bôh Sang in tơglit hơdrôm hră sĭ, Gơnong bruă pơtô pơhrăm Daklak hmâo gum hrom pok pơhai laih 2 tal lăi pơthâo hơdrôm hră hrăm hơdôm anih 3, 7 hăng anih 10 tui hơdră lăng nao rai mơng ataih kơplah wah Gơnong bruă pơtô pơhrăm, hơdôm Sang in tơglit hơdrôm hră hrăm hăng hơdôm bôh sang hră amăng tơring čar./.

Hương Lý: Čih – Siu H’ Prăk: Pơblang