VOV4.Jarai - Jơnum khua pơ ala tal 8, rơwang bruă 2022-2027 mơng Khul ia jrao kyâu bơrơkal mriah tơring čar Daklak pơphun amăng 2 hrơi mơng lơ 20-21/6. Bôh than ƀuh rơđah hloh mơng bruă jơnum amăng rơwang bruă rơgao lĕ iâu pơhrui hmâo rơbêh 408 klai prăk kơ hơdôm bruă gum djru ƀơi tơring čar, đĭ giăm truh dua wot bơhmu hăng rơwang bruă hlâo kơ anun.

Khul ia jrao kyâu bơrơkal mriah Việt Nam ƀơk Miđai hơdor pioh “Yua kơ bruă gum djru” kơ 5 čô mơnuih ƀơi Daklak hmâo laih bôh than prong amăng bruă gum djru

Amăng 5 thun rơgao, Khul ia jrao kyâu bơrơkal mriah tơring čar Daklak hmâo djru brơi tañ laih hăng gum brơi rơbêh kơ 868 rơbâo wot čô mơnuih, hăng abih bang mrô prăk giăm truh 342 klai prăk, hluai tui hơdôm bruă mă kah hăng bruă “Tết yua kơ mơnuih ƀun rin hăng mơnuih djơ̆ jrao dioxin”, jơlan hơdră “Pơkom pioh rơmô”, jơlan hơdră “Pơđĭ tui tơlơi čang rơmang”. Pơ̆ anăp anai, hơdôm gưl khul ia jrao kyâu bơrơkal mriah ƀơi Daklak pok pơhai ba glăi bôh tơhnal dong Bruă pơsur “Rim khul grŭp, rim mơnuih pơkĕ hăng sa anih anom gum djru”; djă pioh bruă wai lăng hăng pơđĭ kyar Jơlan hơdră pơkom pioh rơmô, djru hơdôm bôh sang anô̆ ƀun rin pơplih tơlơi hơdip kơjăp phik; hơdôm bruă mă, hơdră “Tết yua kơ mơnuih ƀun rin hăng mơnuih djơ̆ jrao dioxin”, “Blan dum djru”, “Pur gŏ khăp păp” “Jam asơi ƀơi pơnăng”, bơwih brơi tơlơi suaih pral mơnuih ƀôn sang./.  

Siu H’ Prăk: Pơblang