VOV4.Jarai - Čơtlăm lơ 19/7, Jơnum min mơnuih ƀôn sang tơring glông Krông Pač, tơring čar Daklak pơphun jơnum hăng mơnuih mă tơlơi pơhing phrâo lăi pơthâo jơlan hơdră “Jơnum ngui bôh sầu riêng tơring glông Krông Pač” tal sa, thun 2022, kiăng pơđĭ nua phun pla phun mơng tơring glông anai.

Mơnuih hyu blơi sầu riêng kơ mơnuih ngă đang hmua ƀơi tơring glông Krông Pač

Hăng anăn ñu “Pơđĭ nua sầu riêng Krông Pač”, Jơnum ngui amra pơphun mơng lơ 1/9 – 3/9/2022 hăng hơdôm bruă mă: Jơnum pơtrut iâu pơthưr tuh pơplai hăng pơđĭ kyar gơnam mă mơng đang hmua, bruă đang hmua kơjăp phik tơring glông Krông Pač; Jơnum ngui ƀơi jơlan amăng plơi prong; Jơnum ngui adôh suang tơlơi adôh suang đưm hăng pĕ gông atông brô̆ djuai ania ƀiă tơring glông Krông Pač; Hyu čuă lăng kual djă pioh gru grua đưm đang phun pla CaDa; Ruah mă “Đang sầu riêng hiam – klă hăng ayuh hyiăng lŏn mơnai” hăng ƀong lăng bôh sầu riêng ƀơi đang, jơnum ngui sang čơ pơdă prưng lăi pơthâo hơdôm mơta gơnam OCOP... Hăng anih anom hmâo lŏn pla sầu riêng hmâo 1/4 kual lŏn pla sầu riêng mơng đơ đam tơring čar Daklak, sầu riêng hmâo jing laih phun pla ba jơlan hlâo ba glăi lu prăk phun kơ mơnuih ƀôn sang hăng djru pơđĭ kyar bơwih ƀong ƀơi tơring glông. Jơnum ngui sầu riêng tơring glông Krông Pač jing tal pơpŭ mơnuih pla sầu riêng hăng hơdôm nua yôm mơng djuai phun pla anai ba glăi. Hrom hăng anun rơgao kơ jơnum ngui kiăng tô nao rai, lăi pơhư̆č kơ anô̆ gal prong, tơhnal tuh pơplai kơ bruă dang hmua, pơkra hăng sĭ bôh sầu riêng nao hrom hăng pơlar bôh thâo, tuai čuă ngui ƀơi tơring glông amăng lŏn ia ta hăng mơng dêh čar tač rơngiao./.

Siu H’ Prăk: Pơblang