VOV4.Jarai - Lom pok pơhai hơdôm rơwang bruă apui lơtrik pơkĕ hăng jua angin, hơdôm bôh anom bơwih ƀong ƀơi Daknông ƀuăn hlâo amra djru ngăn rơnoh pơhrui lu kơ ngăn drăp tơring čar. Khă hnun hai, tơring čar hmâo phuaih kơƀah  hĭ laih lom pơhrui ngăn drăp ră anai kơnong kơ hmâo sa črăn anet bơhmu hăng tơlơi pơkă blung a.

Pơhrui ngăn drăp mơng apui lơtrik pơkĕ hăng jua angin 8 blan rơgao ƀơi Daknông kơnong kơ hmâo 18 klai prăk

Tui hăng mrô mơng Anom mă jia tơring čar Daknông, 8 blan rơgao pơhrui prăk mă jia mơng hơdôm rơwang bruă apui lơtrik pơkĕ hăng jua angin ƀơi tơring čar hmâo 18 klai prăk, kơnong dưm dưm hăng 6% bơhmu hăng mrô rơbêh kơ 300 klai prăk amăng sa thun mơ̆ tơring čar pơkă pơhrui hmâo lom pơsit 6 rơwang bruă hăng abih bang jua kơtang 430MW amăng rơwang mơng thun 2019-2021. Pơblang kơ bôh than ba truh tơlơi anai, Gơnong bruă prăk kak tơring čar Daknông brơi thâo, amăng mrô 6 rơwang bruă pơkĕ apui hăng jua angin pok pơhai ƀơi tơring čar, kơnong kơ hmâo sa rơwang bruă hmâo jua 50MW hmao ngă giong hăng mă yua pơkĕ apui hlâo kơ lơ 31/10/2021. Hơdôm rơwang bruă dô̆ glăi ƀu hmao pơdŏng, tô hyu apui ôh. Tơlơi hơdôm rơwang bruă pơkĕ apui hăng jua angin kaih mă yua bơdjơ̆ nao ƀu anet truh pơhrui ngăn drăp pơkă hlâo mơng tơring čar.

Siu H’ Prăk: Pơblang