VOV4.Jarai - Hrom hăng đơ đam dêh čar, lơ 5/9, hơdôm bôh tơring čar kual Dăp Kơdư dik dak hrơi jơnum mut sang hră thun hrăm phrâo, hơdôm tơring čar gir run hơkrŭ pơsir hơdôm tơlơi tơnap, pơhlôm sang hră anih hrăm gơnam mă yua hăng anô̆ kơjăp bruă pơtô pơhrăm dong mơng hrơi blung a thun hrăm.          

Ƀơi Daknông, rơbêh kơ 184.000 čô čơđai hơdôm gưl hmâo mut sang hră, pơphun thun hrăm phrâo 2022-2023. Thun hrăm anai, đơ đam tơring čar Daknông hmâo 368 bôh sang hră anih pơtô pơhrăm, hăng 184.135 čô čơđai sang hră, đĭ 8.508 čô čơđai bơhmu hăng thun hrăm hlâo. Prăp lui kơ thun hrăm phrâo, mơng hơdôm ngăn rơnoh, tơring čar Daknông hmâo tuh pơplai laih giăm truh 330 klai prăk pơdŏng, pơkra glăi sang hră anih hrăm hăng blơi prăp măi mok gơnam mă yua pơtô pơhrăm. Gơnong bruă pơtô pơhrăm ăt ngă tui mơn hơdôm anung prăk juă nua blơi hơdrôm hră, hră čih pha brơi kơ čơđai sang hră djuai ania ƀiă; pơhrua nao gơnam mă yua pơtô pơhrăm tui hơdră phrâo, măi mok djru hrăm lăng nao rai mơng ataih hăng prăk mă yua rơbêh kơ 67 klai prăk. Thun hrăm anai, khă dưi pơhrua nao 115 čô nai pơtô samơ̆ đơ đam tơring čar Daknông ăt kơƀah mơn 966 čô nai ƀơi abih bang hơdôm gưl hrăm. Hơdôm bôh tơring čar khom pok pơhai laih kơčăo bruă ba nai pơtô hăng pơhrăm brơi dong bruă pơtô gưl sa amra pơtô tom tơlơi hrăm bơkơjăp drơi jăn pran jua, hơdră phrâo. Hơdôm bôh sang hră ngă gal brơi kơ nai pơtô čơđai, mơnuih mă bruă gah ƀăng hră pơ-ar 2 sư phạm juăt gah bruă pơtô tơlơi Anglê, Tin học kiăng pơpha bruă pơtô ƀơi gưl sa...

 Čơđai sang hră kual asuek Dăk Rmăng (Daknông) hur har hrơi mut glăi sang hră

Amăng tơring čar Dak Lak hơmâo lu sang hră pơphun sa mông jơnum mut thun hrăm phrâo 2022-2023. Thun hrăm anai, đơ đam tơring čar hơmâo rơbêh 450 rơbâo čô čơđai sang hră djop gưl, amăng anun čơđai sang hră mơnuih djuai ƀiă rơbêh 56%. Tui hăng ơi Phạm Đăng Khoa, Khua Gơnong bruă pơtô pơjuăt tơring čar Dak Lak, thun hrăm anai hơmâo 1000 boh sang hră, hăng rơbêh 450 rơbâo čô čơđai sang hră djop gưl hrăm. Jơnum mut thun hrăm phrâo thun 2022-2023, djop sang hră mơ̆ng plơi prong truh pơ plơi pla ataih, kual mơnuih djuai ƀiă dŏ pơphun jơnum hơbôt ƀiă mông, klah čun samơ̆ yôm biă mă ngă mơak pran jua nai pơtô hăng čơđai sang hră tơring čar Dak Lak thun hrăm phrâo. Ƀơi mông jơnum mut thun hrăm phrâo sang hră kơnuk kơna čem rông gưl klâo N’Trang Lơng, ƀơi plơi prong Ƀuôn Ma Thuôt, Dak Lak, nai Bùi Xuân Lễ, Khua sang hră brơi thâo: Hăng bruă mă phun lĕ pơđĭ tui boh tŭ yua hrăm hră hăng pơtô tong ten hloh, ƀing nai pơtô hăng čơđai sang hră N’Trang Lơng ăt pơtrut pơblih phrâo pơtô hăng hrăm hơdră phrâo tŭ yua hloh.

Mông jơnum mut thun hrăm phrâo sang hră đôm lăm Kơnuk kơna čem rông N’Trang Lơng-Dak Lak

17.500 čô čơđai sang hră ƀơi tơring glông guai dêh čar anun lĕ Ea Sup, tơring čar Daklak hmâo yak mut thun hrăm phrâo 2022-2023 amăng tơlơi mơ-ak klă, ayuh hyiăng rơ-ơ̆ hrơi mut sang hră. Ƀu djơ̆ hăng hơdôm thun hlâo kơ hmâo klin Covid-19 ngă, čơđai sang hră khom mut sang hră tui jơlan online, thun anai, nai hăng čơđai nao pơhmư̆ mông jơnum mut sang hră ƀơi hơdôm bôh sang hră hăng pran jua mơ-ak. Kiăng prăp lui kơ thun hrăm phrâo, tơring glông Ea Sup hmâo mă yua laih rơbêh kơ 5 klai 200 klăk prăk pơdŏng sang hră anih hră, gơnam mă yua pơtô pơhrăm. Rơbêh kơ 1.200 wot čô nai hmâo gum hrom hơdôm anih pơhrăm pơđĭ tui bruă mă pơtô pơhrăm kiăng pơhlôm bruă pơtô čơđai.

 Čơđai sang hră ƀơi guai dêh čar Ea Sup hur har pran jua mut sang hră thun hrăm phrâo 2022-2023

Thun hrăm phrâo 2022-2023, tơring čar Lâm Đồng hơmâo rơbêh 33 rơbâo čô čơđai sang hră djop gưl. Kiăng pơhlôm klă hơdră pơtô hrăm hơmâo boh tŭ yua hloh, tui hơdră pơtô hrăm phrâo anai anih 3, anih 7 hăng anih 10. Mơ̆ng rơnoh prăk tuh pơ alin 600 klai prăk tơring čar djru, anom bruă pơtô hrăm tơring čar Lâm Đồng tañ man pơdong dua ring bruă phrâo, ngă tui giong 26 ring bruă tŏ tui hăng 24 kơčăo bruă ngă giong. Biă mă ñu, kiăng hmao ming pơkra glăi 19 boh sang hră hăng rơnoh prăk 35 klai prăk, mă yua rơbêh 120 klai prăk blơi gơnam yua mă bruă pơtô hrăm, kiăng djop gơnam yua pơtô hrăm bơwih brơi bruă pơtô hrăm kơ djop sang hră pơ kual ataih, kual mơnuih djuai ƀiă. Hrom hăng anun, pơhlôm djop tơlơi gêh găl bruă pơtô hrăm tơring čar Lâm Đồng ăt gir run ngă hrom anom bruă ia jrao tơring čar brơi tlâ̆o djop vaccine pơgang Covid 19 kơ čơđai sang hră djơ̆ hăng tơlơi pơtrun.

Rơbêh 330.000 čô čơđai sang hră djop gưl Lâm Đồng hok mơak mut thun hrăm phrâo

Thun hrăm 2022-2023, tơring čar Gialai hmâo 762 bôh sang hră anih hrăm hăng rơbêh kơ 400 rơbâo čô čơđai sang hră ƀơi hơdôm gưl hrăm. Mông ngă lơphet mut hrăm thun phrâo dưi hmâo hơdôm bôh sang hră ngă tui rơguăt, kơdrưh hrom hăng hơdôm bruă mă bôh thâo adôh suang hmâo pơjing laih ayuh hyiăng klă, mơ-ak mơng hrơi jơnum ngui sang hră tơdơi kơ sa thun tơnap tap yua kơ bơbeč mơng klin Covid-19 ngă./.

Siu H’ Prăk-Nay Jek: Pơblang