VOV4.Jarai - Tơdơi kơ 4 thun ngă tui tơlơi pơsit 522/2018 mơng Khua dêh čar, pơsit Akô̆ bruă pơtô juăt anăp bruă mă hăng pơsit jơlan gah bruă hrăm kơ čơđai, bruă pơpha bruă hrăm hră kơ čơđai tơdơi kơ gưl 2 hmâo yak pơplih phrâo sit nik, pơđĭ rah bôh tŭ yua bruă mă mơng hơdôm bôh sang hră pơtô bruă hăng anom pơtô pơhrăm giong gưl hrăm, laih anun pơđĭ rah anô̆ kơjăp bruă hrăm đĭ gưl 3. Khă hnun hai, bruă kơƀah sang hră anih hrăm bruă ăt ngă mơn bruă pơpha bruă hrăm hră ƀơi lu anih anom amăng kual ƀu ba glăi djơ̆ rơnoh pơkă.

Thun anai, mrô čơđai sang hră hrăm giong gưl 2 ƀơi tơring čar Dăknông hmâo ngă hră hrăm đĭ ƀơi Sang hră Cao đẳng cộng đồng Dăknông lu hloh kơ djop thun. Kơnong amăng tal sa hmâo laih giăm truh 300 čô čơđai hăng tal 2 pơkă hlâo amra ruah rơbêh kơ 100 čô čơđai dong. Ơi Nguyễn Hữu Lành, Khua Sang hră brơi thâo, ngă tui hơdră pơpha bruă hrăm hră tui Tơlơi pơsit 522/2018 mơng Khua dêh čar hmâo djru laih sang hră yap hlâo mrô čơđai sang hră amra ruah hăng hmâo kơčăo bruă ruah čơđai, prăp lui anih anom pơtô pơhrăm hăng nai pơtô djơ̆, pơhlôm pơtô bruă ba glăi bôh tŭ yua hrom hrom hăng hơdôm hơdră pơtô bôh thâo, djru čơđai sang hră hmâo lu tui hluai pô ruah djơ̆ bruă pô kiăng. Ơi Nguyễn Hữu Lành brơi thâo:

“Rai pơ̆ anai ƀing čơđai amra hrăm bruă yơh phun ñu. Khă hnun hai, ƀing čơđai ăt dưi ruah mă mơng bruă hrăm hră ƀudah bôh thâo bruă mă. Tơdah hrăm giong gưl hrăm, ƀing čơđai ăt pơplông mă mơn ƀăng gưl 3 kah hăng čơđai hrăm tui phiăn pơkă. Bơ̆ hrăm pơhrua nao dong bôh thâo bruă mă lĕ, ƀing čơđai hmâo tơlơi gal hrăm đĭ cao đẳng. Anun lĕ hrăm 2 thun, hrom hăng bôh thâo bruă mă lĕ 2 thun ha kơmrah thơ čơđai amra hrăm đĭ cao đẳng hlao”.

Giăm hmâo 300 čô čơđai amăng glông bruă pơpha bruă hrăm hră hmâo rơkâo ƀơi Cao đẳng cộng đồng Dăknông thun hrăm 2022-2023

Ăt hmâo mrô čơđai hrăm giong gưl 2 đĭ lu mơn, thun anai tơring čar Daklak hmâo pơpha laih bruă hrăm hră hăng rơbêh kơ 5 rơbâo čô čơđai sang hră. Amăng anun, 16 bôh anom pơtô pơhrăm bruă mă hăng pơtô pơhrăm giong gưl hrăm ƀơi tơring čar tŭ mă 4.934 čô čơđai. Tui hăng ơi Hà Ngọc Hướng, Khua Anom pơtô giong gưl hrăm hăng pơtô bruă tơring glông Ƀuôn Đôn, pơphra bruă hrăm hră kơ čơđai ră anai hmâo yak rơgao laih anô̆ gun mơng čơđai hăng amĭ ama čơđai. Ƀơi hơdôm bôh sang hră pơtô giong gưl hrăm hăng pơtô bruă mă, ƀing čơđai dưi đing nao hrăm hơdôm mơta tơlơi hrăm, dưi pơtô pơhrăm, tañ thâo bruă kiăng dưi hyu mă bruă arăng, plai ƀiă tơnap kơ sang anô̆:

“Kah hăng rim thun, ăt mơnuih anun mơn, nai hrăm gưl 3, hrăm truh pluh hơdôm mơta tơlơi hrăm lĕ lu čơđai ƀu anăm hrăm ôh. Ră anai nao pơ̆ anom phun lĕ hrăm hmâo 7 mơta tơlơi hrăm đôč, dua lĕ pơtô rơđah hloh anun ƀing čơđai đing nao hrăm amra klă hloh. Rơngiao kơ anun, nao hrăm rah nao mă bruă rah lĕ ƀing čơđai amra prăp brơi pô ƀơƀiă kơ tơlơi hơdip mơda”.

Pơpha bruă hrăm hră kơ čơđai tơdơi kơ hrăm giong gưl 2 brơi ƀuh hơdôm bôh tŭ yua sit nik hăng abih bang čơđai hăng hơdôm bôh sang hră pơtô bruă hăng pơtô pơhrăm gưl hrăm, samơ̆ thun 2022-2023, thun tal 4 ngă tui tơlơi pơsit 522/2018 mơng Khua dêh čar, ƀơi Dăp Kơdư phrâo hmâo tơring čar Lâm Đồng pơpha bruă hrăm hră rơbêh kơ 25% mrô čơđai hrăm giong gưl 2, dô̆ glăi kơnong kơ mơng 10% truh rơbêh kơ 20%. Bôh than ba truh biă ñu lĕ kơƀah hơdôm bôh sang hră anih hrăm bruă, kơƀah ha amăng plĕ kơplah wah pơtô bruă hăng pơtô hrăm hră. Kah hăng ƀơi tơring čar Daknông, hmâo Sang hră pơtô giong gưl hrăm gah tơring glông kơnong kơ pơtô bruă mă gưl yŭ mơ̆ ƀu hmâo jơlan hơdră pơtô hrăm hră ôh. Tui hăng ơi Nguyễn Văn Toàn, Khua Gơnong bruă pơtô pơhrăm tơring čar Daknông, yua kơ bôh than anai, kơčăo bruă pơpha bruă hrăm hră kơ 2000 čô čơđai sang hră amăng thun hrăm anai, kơnong kơ dưi ngă mă ha mơkrah đôč:

“Ƀơi kual tơnap tap mơ̆ pơpha bruă hrăm hră lĕ čơđai amra ƀu hmâo tơhnal hrăm bruă, yua kơ đam ƀơi hơdôm bôh anom pơtô bruă hmâo laih anô̆ akă gal. Tui anun, gơnong bruă hmâo pơphô brơi laih kơ Jơnum min mơnuih ƀôn sang tơring čar pơhrua nao tơhnal pơkă kiăng ruah brơi kơ abih bang čơđai ƀơi hơdôm kual tơnap tap. Bơ̆ hăng kual gêh gal lĕ gơnong bruă ăt črâo ba mơn ruah djơ̆ tui tơhnal pơkă, kơnong kơ dô̆ 900 čô čơđai sang hră dong”.

Kaih pơpha bruă hrăm hră ăt jing bôh nik ƀơi tơring čar Daklak. Tui hăng ơi Phạm Đăng Khoa, Khua Gơnong bruă pơtô pơhrăm tơring čar Daklak, gơnong bruă glăk gir run pơtrut tañ rơnoh bruă, biă ñu mơng thun hrăm 2023-2024:

“Pơpha bruă hrăm hră jing sa amăng hơdôm akă dưi ngă mơng bruă pơtô pơhrăm Daklak. Kah hăng rim thun, ƀing gơmơi ruah rơbêh kơ 80% mrô čơđai hrăm giong gưl 2 mut hrăm anih 10 lĕ, thun hrăm 2022-2023 ƀing gơmơi hmâo hrŏ trun yŭ kơ 80%. Thun tô̆ tui amra hrŏ trun kơnong kơ dô̆ 75%. 25% dô̆ glăi amra hơdai nao hrăm bruă. Hăng tui anun kiăng pơhlôm akô̆ bruă pơpha bruă hrăm hră mơng Gong gai dêh čar”.

Pơpha bruă hrăm hră kơ čơđai sang hră tơdơi kơ hrăm giong gưl 2 jing bôh yôm prong mơng Akô̆ bruă “Pơtô pơhrăm anăp bruă mă hăng pơsit jơlan gah pơpha bruă hrăm hră kơ čơđai amăng pơtô pơhrăm rơwang 2018-2025”, dưi pơsit yua kơ Tơlơi pơsit mrô 522/2018 mơng Khua dêh čar. Tui hăng akô̆ bruă anai, truh thun 2025, hơdôm bôh tơring čar khom pơpha bruă hrăm hră ƀiă biă mă ñu 40% mrô čơđai hrăm giong gưl 2, hăng kual tơnap tap, mrô pơpha bruă hrăm hră ƀiă biă mă ñu lĕ 30%. Khă hnun hai, bruă kơƀah sang hră anih hrăm, kơƀah ha amăng plĕ kơplah wah pơtô hăng pơhrăm hră hăng hrăm bruă ƀơi ƀu ƀiă anih anom gưl tơring glông kual Dăp Kơdư, glăk jing anô̆ gun prong hăng tơhnal pơkă mơng akô̆ bruă./.

VOV Tây Nguyên: Čih – Siu H’ Prăk: Pơblang