Tal pơplông mă ƀăng gưl 3 thun anai tơring čar Kon Tum hmâo rơbêh kơ 5.000 čô čơđai sang hră, đĭ 273 čô čơđai bơhmu hăng thun hlâo. Amăng anun, rơbêh kơ 4.800 čô čơđai sang hră pơplông tui jơlan hơdră gưl 3 hăng rơbêh kơ 160 čô čơđai tui jơlan hơdră pơtô juăt pơsir gưl 3. Mrô čơđai djuai ania ƀiă nao pơplông hmâo rơbêh kơ 1.700 čô čơđai, čơđai rơkâo nao pơplông tui hluai pô giăm truh 220. Tơring čar Kon Tum hmâo pơdŏng laih 12 anih anom pơplông, amăng anun 5 anih pơplông ƀơi plơi prong Kon Tum, 7 bôh anih ƀơi hơdôm bôh tơring glông hăng mơnuih mă bruă lăng čơđai pơplông ƀơi hơdôm anih anom anun lĕ rơbêh kơ 900 čô mơnuih. Nai Bùi Văn Quốc, Kơ-iăng Khua Sang hră đom lom djop djuai ania ƀiă – Gưl 2 tơring glông Kon Plông, brơi thâo, thun anai, sang hră hmâo 82 čô čơđai sang hră gum hrom pơplông mă ƀăng gưl 3 kah hăng abih bang ană bă neh wa djuai ania Hơdang.

 “Truh mông anai sang hră hmâo ngă giong laih jơlan hơdră pơhrăm glăi brơi čơđai tal 1, sang hră ăt hmâo pơphun pơplông lông lăng laih kơ čơđai sang hră. Pơ̆ anăp anai sang hră ruah mă ƀing čơđai mơ̆ hrăm ƀu thâo pioh pơtô pơhrăm brơi dong kiăng hrưn đĭ dưi djơ̆ tơhnal pơkă 100% mrô čơđai dưi hmâo mă ƀăng gưl 3. Gah bruă čem rông čơđai, sang hră črâo ba anom bruă prăk kak mơng sang hră đĭ tui prăk asơi kơ ƀing čơđai amăng rơwang blan 6 pơhlôm tơlơi suaih pral kơ ƀing čơđai pơplông”.

Tal pơplông mă ƀăng gưl 3 thun 2023, tơring čar Gia Lai hmâo rơbêh kơ 14.800 čô čơđai rơkâo pơplông, amăng anun hmâo rơbêh kơ 3.100 čô čơđai djuai ania ƀiă. Tơring čar iâu pơhrui năng ai ñu 2300 čô mơnuih mă bruă wai lăng bruă pơplông ƀơi 41 anih anom pơ̆ 17 bôh tơring glông, plơi prong. Grŭp črâo ba gưl tơring čar hmâo rơkâo laih Jơnum min mơnuih ƀôn sang hơdôm bôh tơring glông, plơi prong hăng hơdôm gơnong bruă hmâo bơdjơ̆ nao djru čơđai sang hră rơdêh nao rai, pơpha anih ƀong huă, anih dô̆ kơ čơđai sang hră. Hrom hăng anun, pel ĕp, djru prăk kơ ƀing čơđai ană bă neh wa djuai ania ƀiă, sang anô̆ gah hơdră bruă, sang anô̆ ƀun rin, čơđai sang hră ƀơi kual asuek, ataih. Biă ñu ƀu pioh čơđai sang hră hơpă lui pơplông yua kơ bưp tơnap bruă rô nao rai ƀudah ƀu hmâo prăk.

Pơhiăp amăng mông mă bruă hăng Grŭp črâo ba tal pơplông mă ƀăng gưl tlâo 2 bôh tơring čar Kon Tum hăng Gia Lai, Kơ-iăng Khua Ding jum pơtô pơhrăm Ngô Thị Minh čih djă pioh, pơsit yôm bruă prăp lui pơphun tal pơplông gơgrong hlâo mơng tơring čar. Hrom hăng anun rơkâo hơdôm bôh anom bơdjơ̆ nao khom ngă tui tơpă hơdôm tơlơi pơkă mơng Ding jum pơtô pơhrăm gah bruă pơplông; pel ĕp glăi hơdôm bruă prăp lui kiăng thâo hăng pơsir hmao tlôn hơdôm tơlơi truh amra hmâo. Kơtưn lăi pơhing, pơtô brơi čơđai hăng amĭ ama čơđai kơ tơlơi pơkă, pơtô brơi bruă pơplông; gum hrom kơjăp hăng hơdôm bôh ƀirô apăn bruă kiăng pơhlôm klă, dưm kơnar, djơ̆ phiăn kơ tal pơplông. Kơ-iăng Khua Ding jum yă Ngô Thị Minh, lăi:

 “Grŭp črâo ba mơng tơring čar kơ tal pơplông mă ƀăng gưl 3 thun 2023 hmâo kiăo tui djơ̆ tơlơi pơkă hăng gơgrong hlâo amăng bruă mă mơng pô. Bruă pơhrăm kơ ƀing mơnuih mă bruă pơplông lĕ kiăng biă, amra dưi ƀuh hơdôm tơlơi hơget lăi nao hră pơ-ar akă djơ̆ thơ tơring čar amra rơkâo, lăi pơthâo nao rai kiăng tơdơi anai rim tal pơplông, tal pơplông thun dơi amra ba glăi bôh tŭ yua hăng klă hloh tal pơplông thun hlâo. Tơlơi pơkă pơplông lĕ hăng ƀing čơđai sang hră ƀơi anăp gum hrom tal pơplông ƀing ta ăt ƀu lui raih mơn, bruă lăi pơthâo tơlơi pơkă bruă pơplông kơ čơđai khom pơplih phrâo hơdră lăi pơthâo tơlơi pơkă pơplông, kiăng ƀing čơđai sit nik lĕ mơnuih amăng bruă pơplông. Bruă ƀing čơđai gum hrom tal pơplông hăng bruă gơgrong kơ mông pơkă, tơlơi pơkă lĕ ăt kiăng gir run pôr hyu truh hăng ƀing čơđai mơn”.

Kơ-iăng Khua Ding jum pơtô pơhrăm Ngô Thị Minh ăt rơkâo mơn hơdôm tơring čar bĕ tơlơi pơmin lui raih; amăng bruă pơhrăm Tơlơi pơkă pơplông khom pơplih phrâo jơlan gah kiăng mơnuih dưi hrăm thâo djop tơlơi pơkă ngă tui djơ̆ bruă jao mơng pô; gơnam mă yua, bôh thâo pioh mơnuih mă bruă ƀơi tal pơplông bŏng glăi hăng hơdôm tơlơi amra hmâo; kơčăo bruă pel ĕp mơng Grŭp črâo ba tal pơplông khom dưi čih pơkra rơđah, tŏng ten. Kơ-iăng Khua Ding jum pơtô pơhrăm Ngô Thị Minh, lăi rơđah:

 “Tal pơplông khom pơhlôm tơhnal pơkă kơ pơhlôm hơđong, Pơhlôm gah tơlơi suaih pral, tơlơi hơdip kơ ƀing čơđai. Ƀing ta gir run pioh ƀing čơđai yak mut anih pơplông hơđong pran jua, tơlơi pơmin mơ-ak klă hơđong. Pơhlôm amăng tơlơi gơnam ƀong huă. Pơhlôm amăng ayuh hyiăng adai hơjan, jơlan tơbor nao rai mơng ƀing čơđai tơnap tap. Pơhlôm amăng bruă pơgang apui ƀong pơtuh djơ̆ anô̆ ñu adai hơjan laih anun apui răm. Pơhlôm amăng wai lăng akô̆ tơlơi pơplông, tơlơi ngă pơplông. Pơhlôm amăng pơgang, pơgăn klin ruă pơhlôm klă tal pơplông hơđong".

Tal pơplông mă ƀăng gưl 3 thun 2023 pơphun amăng rơnuč blan 6. Amăng anun, lơ 27/6 lĕ hrơi ngă hră pioh pơplông. Pơphun lăng pơplông mă ƀăng gưl 3 hăng 2 hrơi kơ 28 hăng 20/6. Hơdôm anih anom khom đing nao tơlơi lăi pơhing kiăng čơđai, amĭ ama čơđai hăng mơnuih mơnam thâo hluh kơ bôh yôm mơng tal pơplông mă ƀăng gưl 3; Hmao bơni, apah pri hăng hơdôm khul grŭp, mơnuih hmâo bôh than prong amăng pơphun bruă pơplông ăt kah hăng pơsir tơpă hơdôm tơlơi ngă soh ngă bơdjơ̆ nao tal pơplông./.