Ƀơi mông jơnum anai, Ding jum kơđi čar tŭ ư ngă hră pơtrun anăp mă bruă pơđĭ kyar ƀôn prong Hồ Chí Minh hăng tơhnal pơtrun truh thun 2030 jing ƀôn prong ngă bruă bơwih bơwăng sĭ mơdrô-tuh tia pơkra ming phrâo, jing anih ba akŏ kơ tơlơi bơwih ƀong huă ngă tui mrô, djă anăn mơnuih mơnam hăng mrô, anih phun bơwih ƀong huă, prăk kăk, sĭ mơdrô, kơsem min boh thâo ia rơgơi, gru grua amăng kual Đông Nam Á, mut phung jar kmar pok prong. Truh thun 2045, jing anih anom sĭ mơdrô prong amăng kual ASIA, anih či nao čuă ngui hiam hloh, djă đôm gru grua djuai ania, hơmâo tơlơi hơdip mơda đĭ tui; jing plơi prong, ƀôn prong pơđĭ kyar hmao hăng jar kmar.

Ding jum kơđi čar pơtrun hiăp kơ ƀôn prong ăt pơtrut ngă tui gru grua tơlơi hơkrŭ, gum pơgôp, ngă hrom tong ten hăng djop sang bruă, gong gai kơnuk kơna djop plơi prong, tơring glông kiăng ba glăi boh tŭ yua mơ̆ng hră pơtrun anai. Pơđĭ kyar bơwih ƀong huă hmar, hơđong kjăp, pơhrui glăi lu, pơkra ming jơlan glông nao rai hiam klă, nao hlâo sa yak.