VOV4.Jarai - Čơtlăm lơ 3/6, Ding jum Kông ang pơphun jơnum klah čun ƀiă, pơsit bôh tơhnal pơdŏng kông ang să, tơring kual djơ̆ phiăn. Pơhiăp klah čun jơnum, Khua ding jum Tô Lâm pơsit yôm hơdôm bôh tơhnal mơ̆ khul kông ang să, tơring kual dưi ngă amăng hơdôm hrơi rơgao. Amăng anun bruă wai lăng kơnuk kơna pơgang rơnuk rơnua, hơđong dưi ngă tui hmâo akô̆ tlôn, pơhlôm djơ̆ tơlơi pơkă mơng tơlơi phiăn.

Khua ding jum Tô Lâm pơhiăp črâo bruă jơnum

Ơi Tô Lâm brơi thâo, pơ̆ anăp anai, Ping gah Kông ang dêh čar amra mă yua Tơlơi pơtrun pơsit kơ pơtrut dong bruă pơdŏng Kông ang să, tơring kual tui phiăn pơkă amăng tơlơi ră anai kiăng đing nao pơtrut kơtang pơdŏng Kông ang să, tơring kual djơ̆ tơlơi pơkă pơhlôm abih bang; pơpha, pơkă gưl hăng anih anom mă bruă, bruă mă gah tlôn... djop pran pơsir hơdôm tơlơi rơnuk rơnua, hơđong dong mơng hrơi blung a hăng ƀơi anih mă bruă; pơsit pran pơdŏng Kông ang să, tơring kual gum hrom hăng Kông ang mơnuih ƀôn sang hơdôm gưl sit nik tâ̆o klă, kơjăp kơtang, djơ̆ phiăn pơkă, hơdeč hmar, tui rơnuk anai djơ̆ hăng tơlơi kiăng, bruă mă amăng rơnuk phrâo./.

Siu H’ Prăk: Pơblang