Nao ngui bơrơguăt drơi jăn hăng tal pơplông tal anai, hơmâo giăm 2.500 čô mơnuih, anai lĕ ƀing apăn bruă, tơhan mơng 20 anom bruă kông ang mơng kual Dơnung. Đĭ pơhiăp amăng mông pơphun, thiếu tướng Lê Hồng Hiệp, Kơ-iăng Khua sang bruă ngă bruă Ping gah hăng bruă kơđi čar, Ding jum kông ang, Kơ-iăng khua khul git gai Jơnum ngui bơrơguăt drơi jăn hăng tal pơplông pơsit tong, bruă kơtưn hăng hrưn đĭ klă, tŭ yua bruă bơrơguăt drơi jăn hăng bruă gah ling tơhan, bơrơtaih amăng tơhan kông ang lĕ sa amăng hơdôm bruă jao, hơdră bruă akŏ phun, pơgôp pơjing tơhan kông ang mă bruă tơpă sit, hơđong kjăp, rơgơi bruă, pơplih phrâo, djơ̆ hăng tơlơi rơkâo, bruă jao amăng rơnuk phrâo.