VOV4.Jarai - Lơ 11/7, Kơ-iăng Khua Ding jum kông ngăn dlai tlô hăng rơhuông adai lŏn mơnai Lê Công Thành hmâo nao pel ĕp bruă pơgang, pơgăn ayuh hyiăng ƀu klă ngă ƀơi tơring čar Kontum. Tui hăng tơlơi lăi pơthâo glăi, akô̆ thun 2021, pơ-iă hang ƀơi sa dua bit anih ƀơi tơring čar hmâo ngă răm rai rơbêh kơ 93 ektar phun pla; hơjan ia ling dăo ngă 3 čô mơnuih djai, 136 bôh sang bơdjơ̆ nao hăng rơbêh kơ 700 ektar đang hmua răm rai; lu ring bruă jơlan nao rai, hnoh ia răm rai, rơngiă hĭ hmâo mơn năng ai ñu 129 klai prăk.

Kơ-iăng Khua Ding jum Lê Công Thành mă bruă hăng Jơnum min mơnuih ƀôn sang tơring čar Kontum

Kiăng pơgang bĕ hăng plai ƀiă tơlơi răm rai, tơring čar Kontum ba tơbiă 27 rơwang bruă kiăng tuh pơplai amăng rơwang mơng thun 2021-2025 hăng abih bang prăk mă yua giăm truh 900 klai prăk pioh ba đuăi, pơpha anih hơđong tơlơi hơdip mơda kơ rơbêh kơ 2.500 bôh sang anô̆ hăng năng ai ñu 10.000 čô mơnuih. Pơhiăp amăng mông mă bruă, Kơ-iăng Khua Ding jum kông ngăn dlai tlô hăng rơhuông adai lŏn mơnai Lê Công Thành rơkâo tơring čar Kontum đing nao truh tơlơi ayuh hyiăng ƀu klă ngă amăng hơdôm blan rơnuč thun, măi mok bôh thâo thâo ayuh hyiăng ƀu klă kơ hơdôm khul hyu gum djru pơtlaih, pơtlaih ƀơi plơi pla; telephone kơ hơdôm kual anai juăt hmâo ia guang dar....

Siu H’ Prăk: Pơblang