Djơ̆ krĕp 8 mông mơguah lơ 18/7, Ding jum Pơtô hăng Pơjuăt pôr pơthâo puang pơplông abih anih 12 thun 2023 mơ̆ng rơbêh 1 klăk čô mơnuih čih anăn pơplông. Lu bơnah tơlơi pơhing plăng internet pioh kơ ĕp lăng pok hruaih laih. Thun anai, Ding jum Pơtô hăng Pơjuăt pơkă, Ding jum hăng Gơnong bruă Pơtô hăng Pơjuăt, hơdôm anom bruă hră pơhing amăng plang internet hrŏm pôr pơthâo puang lơ̆m 8 mông mơguah anun yơh bruă ĕp lăng puang mơ̆ng čơđai sang hră hăng amĭ čơđai sang hră ĕp lăng gêh găl hloh, ƀu tơguan ƀudah ĕp lăng mơ̆ng mlam krong mơta dŏ tơguan kah hăng thun hlâo ôh.

Tui hăng boh tơhnal pơblang tong ten puang tal pơplông mơ̆ng Ding jum Pơtô hăng Pơjuăt lĕ, tơlơi hrăm Giáo dục công dân puang lu hloh pơkă dưm dưm 8,29, amăng anun puang lu čơđai pơplông tŭ mă 9 puang. Tơlơi pơplông anai ăt hơmâo mơ̆n čơđai pơplông hơmâo tŭ mă 10 puang lu hloh. Tơlơi pơplông hơmâo lu puang pơkă dưm dưm lĕ tơlơi hrăm Ngữ văn, samơ̆ kơnong hơmâo 1 čô đôč tŭ mă puang 10. Hơdôm tơlơi hrăm Toán, Vật lý, Hóa học, Sinh học, Lịch sử, Địa lý lêng kơ hơmâo puang pơkă bơkơnar 6,03 truh 6,74 puang, samơ̆ pơkă hăng thun hlâo, rơnoh puang anai mrô mơnuih tŭ mă 10 puang ƀiă tui. Tơlơi pơplông tơlơi Angle hơmâo puang pơkă dưm dưm ƀiă hloh amăng hơdôm tơlơi hrăm hơmâo pơplông, kơnong 5,45 puang. Hơmâo 494 čô čơđai hơmâo tŭ mă puang 10 amăng tơlơi hrăm anai.