Tui hăng Ding jum pơtô pơhrăm thun hrăm 2024-2025, đơ đam kual Dap Kơdư hmâo rơbêh kơ 4.500 bôh sang hră anih pơtô pơhrăm mơ̆ng čơđai anet truh cao đẳng, gưl dlong, hăng giăm truh 1,5 klăk čô čơđai sang hră mơ̆ng čơđai anet truh gưl 3. Hơdôm bôh sang hră pơpha hyu dưm kơnar djop anih, tui tơlơi kiăng pơhrăm mơ̆ng čơđai sang hră hăng pơtô pơhrăm; hơdôm bôh sang hră đom lom djop djuai ania ƀiă dưi pơkă kual gơgrong hlâo djơ̆ tui tơlơi kiăng pơtô pơhrăm mơnuih mă bruă djuai ania ƀiă. Hơdôm anih anom amăng tơring čar pioh lui mơ̆ng 20% ngăn drăp pioh yua kơ bruă pơtô pơhrăm, hrŏm hăng anun iâo pơhrui ngăn rơnoh mơnuih mơnam pioh pơđĭ kyar bruă pơtô pơhrăm.

Khă hnun hai, Gơnong bruă pơtô pơhrăm Dap Kơdư ăt dô̆ mơn tơlơi akă gal, hăng anô̆ kơjăp akă djơ̆ tui tơlơi čang rơmang; mrô sang hră djơ̆ tui tơlơi pơkă ƀơi abih bang hơdôm gưl dô̆ ƀiă, mrô măi mok mă yua djơ̆ tui tơlơi kiăng ƀiă biă mă ñu ƀơi hơdôm gưl leng kơ ƀiă hloh hơnong pơkă đơ đam dêh čar. Mrô ai dô̆ kơƀah mơn tui tơlơi rơnoh pơkă; hơdră pơkă, hơdră gum djru akă sit nik ngă tui ba glăi bôh tơhnal, bơdjơ̆ nao prong bruă pơđĭ kơjăp bruă pơtô pơhrăm mơ̆ng kual.

Ƀơi anăp bôh nik anai, Ding jum pơtô pơhrăm hmâo čih pơkra laih akô̆ bruă “Pơđĭ dlông anô̆ kơjăp pơtô pơhrăm kơ neh wa djuai ania ƀiă Dap Kơdư” hăng tơhnal pơkă truh thun 2030, bruă pơtô pơhrăm đơ đam kual dưi pơplih phrâo phun tui jơlan gah pơplih phrâo, pơplih phrâo rơnuk anai; pơhlôm djop mơnuih ƀôn sang leng kơ dưi ngă juăt bruă pơtô pơhrăm pơjăp, djơ̆ tui tơlơi kiăng pơđĭ kyar kual amăng rơwang phrâo.

 Amăng mông bơkơtuai, ƀing khua pơ ala hmâo đing nao laih lăi pơthâo, bơkơtuai tơlơi ngă tui ƀơi plơi pla pô; hrŏm hăng anun, ba tơbiă hơdôm bruă pơsir pioh gum pơhiăp kơ hră čih pơkra akô̆ bruă mơ̆ng Ding jum pơtô pơhrăm. Anun lĕ kơtưn bruă git gai, črâo ba mơ̆ng hơdôm gưl amăng bruă pơtrut pơđĭ kyar pơtô pơhrăm; pơplih phrâo bruă pơtô pơhrăm; pok pơhai ba glăi bôh tơhnal pơtô bôh pơhiăp djuai ania ƀiă; mă yua hơdôm hơdră bruă gum djru ngă pơhưč nai pơtô mă bruă ƀơi kual tơnap tap... Ba tơbiă tơlơi hmâo ră anai tuh pơplai pơkra kơjăp sang hră anih hrăm, ơi Lê Bá Cường, Kơ-iăng Khua Gơnong bruă pơtô pơhrăm tơring čar Dak Nông lăi lĕ: bruă pơkă kual sang hră anih hrăm lĕ tơlơi pơsit phun pioh pơkra kơjăp sang hră anih hrăm.

“Gah gơnam tam anih anom mă yua lĕ khom hmâo akô̆ bruă phara ha jăn kơ kual Dap Kơdư, ƀudah tơdah amăng hơdôm Jơlan hơdră pơkă mơ̆ng lŏn ia lĕ khom pơsit mrô hơdôm hmâo pioh mă yua prăk kơ anih anom gơnam tam mă yua kơjăp sang hră anih hrăm. Amăng anun hmâo tơdah lăi rơđah prăk djru kơ nai pơtô čơđai hmâo sang dô̆, anih dô̆ mơ̆ng lu mơnuih lĕ sa amăng hơdôm jơlan gah pioh pơsir bruă mơ̆ nai pơtô čơđai ƀuh kual asuek, ataih lĕ đuăi glăi pơ̆ plơi pla pô hlao yua kơ ƀu hmâo sang dô̆, ƀu hmâo anih apah dô̆ hă gơñu ƀu khin dô̆ glăi pơtô ôh”.

Bơ̆ ơi Lưu Tiến Quang, Kơ-iăng Khua Gơnong bruă pơtô pơhrăm tơring čar Dak Lak brơi thâo, Dak Lak hmâo rơbêh kơ 1,9 klăk čô mơnuih ƀôn sang hăng 49 djuai ania dô̆ hơdip hrŏm, neh wa djuai ania ƀiă hmâo rơbêh kơ 30%. Kiăng pơđĭ kơjăp bruă pơtô pơhrăm, khom kơtưn pơkra klă sang hră anih hrăm kơ čơđai dô̆ glăi, dô̆ glăi tơhrơi; hmâo hơdră bruă gum djru pioh ngă pơhưč nai pơtô; pok prong ƀing čơđai dưi čơkă mă hơdră gum djru; gum hrŏm hăng hơdôm khul grŭp, kơđi čar – mơnuih mơnam, biă ñu, ngă tui bruă mơ̆ng tha plơi, khua ƀôn, mơnuih hmâo arăng đăo kơnang amăng plơi pla pioh đĭ mrô čơđai sang hră nao hrăm hră...

 Ƀing khua pơ ala ăt lăi mơn tơlơi gum pơhiăp kơ bruă kiăng pơsit rơđah mơnuih hăng rơwang plơi pla mă yua akô̆ bruă, hmâo amăng hơdôm bruă pơmut hrŏm glăk ngă bơbrui guai lŏn hăng tơhnal phara ha jăn mơ̆ng kual glăk pơphun hmâo. Yă Vũ Thị Ánh, Kơ-iăng Khua Anom pơtô pơhrăm brơi thâo, hơdôm tơlơi gum pơhiăp amăng mông bơkơtuai lĕ gru than yôm phăn pioh grŭp čih dăp hơdră pơhrui nao dong, ngă giong hơdôm bôh yôm mơ̆ng akô̆ bruă, hlâo kơ ngă tui hơdôm yak tô̆ tui pioh lăi pơthâo kơ Gong gai dêh čar pel ĕp, lăng glăi.

“Gum pơhiăp mơ̆ng ƀing pơ ala mơ̆ng hơdôm Gong bruă pơtô pơhrăm lăi pơthâo tơlơi pơhing yôm phăn biă pioh Grŭp čih dăp hơdră ƀing gơmơi dưi tŭ mă, pơhrua nao amăng hơdôm črăn pơsit tơlơi ăt kah hăng ba tơbiă hơdôm jơlan gah pơsir pơ̆ anăp anai pioh dưi ngă tui tơhnal ba tơbiă, biă ñu hơdôm tơlơi mơ̆ Ping gah hăng Kơnuk kơna glăk đing nao amăng pơtô pơhrăm kual Dap Kơdư kah hăng pơtô brơi ƀing akă thâo hră, pơtô pơhrăm hăng mrô iâo pơhrui čơđai muai nao sang hră, biă ñu ƀing čơđai djuai ania ƀiă ƀơi hơdôm kual asuek, ataih; djru pơđĭ tui bruă pơtô pơhrăm kơ kual Dap Kơdư”.

Bơkơtuai “Tơlơi pơtô pơhrăm kual Dap Kơdư hăng gum pơhiăp hră čih Akô̆ bruă Pơđĭ kơjăp bruă pơtô pơhrăm kơ neh wa djuai ania ƀiă Dap Kơdư” pơphun ƀơi Dak Lak hmâo pơdah laih tơlơi lăng ba dơlăm mơ̆ng Ding jum pơtô pơhrăm, hrŏm hăng hơdôm bôh plơi pla amăng bruă amăng ƀrư̆ pơtlaih hơdôm tơlơi tơnap, akă gal glăk dô̆ glăi amăng bruă pơtô pơhrăm ƀơi kual lŏn dô̆ lu tơlơi lông anai. Hơdôm tơlơi gum pơhiăp pơsit pran, djơ̆ sit mơ̆ng ƀing khua pơ ala lĕ tơlơi yôm phăn pioh ngă giong akô̆ bruă, anăp nao tơhnal pơkă truh thun 2030, bruă pơtô pơhrăm Dap Kơdư sit nik dưi pơplih phrâo, rơnuk anai, djơ̆ tui tơlơi kiăng pơđĭ kyar kơjăp phik, dưm kơnar hăng pơhlôm akô̆ tlôn kơ djop mơnuih – biă ñu ană bă neh wa djuai ania ƀiă./.