VOV4.Jarai - Mơguah lơ 1/7, Grŭp pel ĕp mrô 4, Ding jum pơtô pơhrăm dêh čar, hmâo nao pel ĕp bruă prăp lui tal pơplông mă ƀăng gưl 3 thun 2022 ƀơi tơring čar Daknông. Tal pơplông anai, đơ đam tơring čar hmâo 6.881 čô čơđai ngă hră pơplông, amăng anun hmâo 6.593 čô čơđai hrăm tui djơ̆ bruă pơkă hăng 288 čô čơđai hrăm pơgiong gưl 3. Tơring čar pơpha 19 bôh anom pơplông hăng 303 bôh anih, đĭ dong 1 bôh anih pơplông bơhmu hăng thun hlâo.

Truh ră anai, abih bang hơdôm anih anom pơplông ƀơi tơring čar Daknông hmâo prăp lui laih jơlan gah pơphun tal pơplông tui tơlơi pơkă mơng Ding jum pơtô pơhrăm. Tơdơi kơ pel ĕp bôh nik ƀơi sa dua anih anom pơplông, Grŭp hyu pel ĕp mơng Ding jum pơtô pơhrăm pơtă sa dua tơlơi amra hmâo kah hăng: čơđai djă telephone mut amăng anih pơplông; čơđai nao pơplông, mơnuih wai lăng čơđai pơplông ƀă kơman Covid-19... Yua anun, hlâo kơ čơđai mut anih pơplông, tơring čar khom črâo ba pel ĕp hơdôm bruă prăp lui, gơgrong hlâo pơsir tơlơi amra phrâo hmâo, pơhlôm hơđong rơnuk rơnua, pơhlôm tal pơplông./.

Siu H’ Prăk: Pơblang