Tơlơi pôr pơhing hrŏm lăi pơthâo Jơnum tal 12 Jơnum min ngă hrŏm Việt Nam-Japan hơmâo pơphun ƀơi Tokyo, Japan, amăng lơ 7/8/2024. Dua bơnah hok mơ-ak pơphun glăi Jơnum min ngă hrŏm Việt Nam-Japan tơdơi kơ 5 thun gun hĭ yua klin Covid-19.

Anai lĕ jơnum blung a hơmâo pơphun tơdơi kơ dua bơnah hrưn đĭ tơlơi rô nao rai ngă hrŏm yôm phăn djop mơta yua kơ tơlơi rơnuk rơnua hăng pơdrong asah ƀơi kual Asia hăng rŏng lŏn tơnah, pơdah tơlơi gir run mơng khua mua Kơnuk kơna, djop ding jum, gơnong bruă dua bơnah amăng pơtrut tơlơi rô nao rai giang mah ngă hrŏm Việt Nam-Japan pơđĭ kyar kơtang, sit nik, djop mơta, djơ̆ hăng kơdrưh mơng tơlơi rô nao rai phrâo.