VOV4.Jarai - Hrơi anai (5/5), anom bruă pơsur sĭ mơdrô gum hrŏm hăng anom bruă sĭ mơdrô Việt Nam amăng kual ASEAN pơphun jơnum črâo ba bruă sĭ mơdrô braih pơdai pơ dêh čar kual ASEAN. Mông jơnum anai pơphun ƀơi An Giang hrŏm hăng lăng nao rai mơng ataih amăng Zoom laih dong amăng fanpage Facebook Anom bruă pơsur sĭ mơdrô, Ding jum sĭ mơdrô hăng tuh tia pơkra pơjing. Amăng mông jơnum črâo ba amra pioh lu hrơi mông kiăng kơ lăi pơthâo hơdôm bruă tong ten mơng djop anom bruă bơdjơ̆ nao truh pơđĭ kyar amăng sĭ mơdrô braih pơdai nao hơdôm dêh čar kual ASEAN. Rơngiao kơ Philippines, braih Việt Nam ăt hơmâo ba nao sĭ mơdrô pơ hơdôm dêh čar pơkŏn dong amăng kual ASEAN anun lĕ Malaysia, Singapore, Indonesia, Brunei. Bruă pơplih ba hyu sĭ mơdrô mơng Việt Nam glăk tŏ tui hơdai nao hơmâo lu dong braih ƀâo hiam, braih jơman, braih japonica, braih kô̆ yôm hloh hăng sĭ đĭ nua ƀiă. Hơnong pơkă amăng sĭ mơdrô braih pơ tač rơngiao mơng đơ đam dêh čar hơmâo pơplih, truh thun 2030, him lăng dŏ kơnong giăm 4 klăk tơ̆n.

Siu Đoan: Pơblang