Tui hăng Jơnum min mơnuih ƀôn sang tơring čar Dak Nông, bruă ĕp eh pơsơi, kông ngăn amăng gŭ lŏn, pơkra ming jing pơsơi rơ-un lĭ bauxit ƀơi tơring čar hơmâo pok pơhai amăng 17 thun laih rơgao samơ̆ truh ră anai kiah dơŏ glăi amăng bruă pơkra rai alumin, aka ƀu hơmâo pơjing rai pơsơi ñôm hăng gơnam mơ̆ng ñôm ôh. Bruă tuh pơ alin man pơdong lu ring bruă, akŏ bruă ăt kah hăng rơkâo jơlan hơdră ĕp lăng, tuh pơ alin hơdôm kơčăo bruă amăng tơring čar dŏ gun hĭ yua pơdjơ̆ nao akŏ bruă pơkă yua lŏn mă bauxit.

Khua dêh čar git gai djop ding jum, anom bruă pơdjơ̆ nao brơi pơsir hĭ anŏ gun samơ̆ truh ră anai hơdôm tơlơi gun aka ƀu pơsir giong ôh. Tui hăng ơi Hồ Văn Mười, Khua jơnum min mơnuih ƀôn sang tơring čar Dak Nông, bauxit kiăng sem glăi sa djuai kông ngăn yôm phara laih anun khom hơmâo hơdră hyu mă djơ̆ lăp. Dak Nông kiăng hơmâo tơlơi gum hrŏm mơ̆ng djop ding jum anom bruă djru pơblih glăi tơlơi phiăn kông ngăn lŏn glai ƀơi mông jơnum khua mua pơ ala mơnuih ƀôn sang dêh čar pơ anăp anai. Pơhiăp ƀơi mông jơnum, ơi Trương Thanh Hải Kơ-iăng Khua ding jum tuh tia hăng sĭ mơdrô brơi thâo, hăng tơlơi tơnap tap, anŏ gun tơring čar rơkâo anun, Ding jum čih pioh hăngamra pơčrong hăng djop ding jum pơkŏn, anom bruă ƀơi gơnong dlông lăi pơthâo hăng kơnuk kơna, khua mua pơ ala mơnuih ƀôn sang dêh čar tañ pơsir hĭ anŏ gun kiăng tơring čar tañ pok pơhai ngă tui akŏ bruă bơwih ƀong huă, mơnuih mơnam.