VOV4.Jarai-Hăng tơlơi ngă khut khăt ƀu lui sa čô mơnuih ƀôn sang pơpă ƀu hơmâo mơnong ƀong huă amăng hrơi têt, djop gưl gong gai kơnuk kơna, khul grup mut phung tơring čar Kon Tum mơ̆ng hlâo kơ hrơi têt giăm sa blan pơphun hyu sem lăng yap glăi, čih anăn sang anŏ ƀun rin pioh djru ba čơkă tết. Tết ngă yang thun phrâo djuai ania thun Nhâm Dần mah klin kheng Covid 19 ƀơi tơring čar Kon Tum dŏ tơnap tap đôč, samơ̆ hăng pran jua bong glăi amăng mông hơmâo klin ăt mă bruă kah tơđar đôč, 10 boh tơring glông, plơi prong amăng tơring čar ăt pơphun hrơi mơak gum hrom pŏ ƀañ tek, ƀañ čưng hăng pơphun lu bruă mă ngui ngor mơak, čơkă thun phrâo.

Lăi nao bruă gum ba mơ̆ng gong gai kơnuk kơna djru kơ mơnuih ƀôn sang ƀong tết, ơi A Sip Kơ-iăng Khua jơnum min pơ ala mơnuih ƀôn sang să Đak Ruông, tơring glông Kon Braih, brơi thâo:

“Hlâo kơ tết, khua mua pơ ala mơnuih ƀôn sang să, khua mua să, laih anun djop khul grup amăng să hơmâo hơdră djru braih, mơnong ƀong huă hmao kru, djop brơi kơ mơnuih ƀun rin, sang anŏ tơnap tap, kiăng kơ djop mơnuih amăng să Đak Ruông dưi mơak čơkă thun phrâo Nhâm Dần 2022 mơak soh. Ră anai, mơnuih ƀôn sang amăng să Đak Ruông lu mơnuih prăp lui gơnam ƀong huă jơman gru grua đưm, rĭm boh sang anŏ lêng kơ phun mơak ƀong tết soh, ƀong tết pơkrem hăng mơak hyuk hyak, gong gai să ƀu lui kơ sang anŏ kơƀah ƀong tết ôh”.

Să Dak Ndrung, tơring glông Dak Song, tơring čar Dak nông hơmâo 4 boh plơi mơnuih djuai ƀiă lêng kơ Mnông soh, djop plơi ngă adơi ayong hăng sang bruă kơnuk kơna ƀudah puih kơđông ling tơhan amăng tơring glông. Amăng rơgao, lơ̆m klin kheng Covid 19 hơđuh rai, djop anom bruă, puih kơđông ngă adơi ayong nao čuă jơmư djru mơnuih ƀôn sang amăng mông tơnap tap.

Amăng anun, Sang bruă kơsem kơđi mơnuih ƀôn sang tơring čar Dak Nông nao djru 100 anung gơnam rơnoh prăk 30 klăk, brơi kơ mơnuih ƀôn sang ƀôn Bu Bong. Ơi Điểu Minh Khua jơnum min djop djuai ania mơnuih mơnam să Dak Ndrung, tơring glông Dak Song brơi thâo, ƀrô djơ̆ bơyan ƀong tết Nhâm Dần, djop sang bruă, puih kơđông ngă adơi ayong ăt tơña blan djru ba mơnuih ƀôn sang:

“Tết lĕ să Dak Ndrung mơak biă mă hơmâo lu sang bruă ngă adơi ayong mơ̆ng tơring čar, tơring glông glăi čuă jơmư djru gơnam tam. Sa boh anom bruă ngă adơi ayong djru kơ plơi pla sa drơi un pioh čuh ƀong tết. Dua lĕ djop puih kơđông ngă adơi ayong hyu čuă jơmư tha plơi, khua ƀôn laih anun čuă gong gai kơnuk kơna să. Mơ̆ng anun dŏ pơtô lăi, pơtrut pran jua mă bruă pơđĭ kyar bơwih ƀong huă. Yom hloh dơ̆ng, bruă pơhlôm, pơgang klin covid mơnuih ƀôn sang ƀu đuăi hyu lu anih ôh ƀu jĕ giăm hăng mơnuih ƀu thâo krăn pô”.

Bơ ƀơi să Kông Lơng Khơng, tơring glông Kƀang, Gia Lai, tơlơi mơak čơkă thun phrâo Nhâm Dần ăt kơdok kơdor mơ̆n. Khul hlăk ai tơdăm dra pô gum phun amăng bruă mă  čơkă thun phrâo mơak hrom mơnuih ƀôn sang. Khul tơdăm dra hlăk ai pơ anai djru kih rơmet plơi pla, jơlan glông brơi rơgoh hiam, kiăng plơi pla mơtah mơda, rơgoh hơdjă, klă hiam yua thâo jak iâu mơnuih ƀôn sang ngă hrom, pơkơtưn man pơdong plơi pla phrâo. Ayong Đinh Văn Lộc, Khua hlăk ai tơdăm dra mut phung să Kông Lơng Khơng brơi thâo, thun blan rơgao, khul tơdăm dra amăng să ngă hrom lu sang anŏ mơnuih ƀôn sang brơi pơđuăi hĭ war rơmô kơbao ataih mơ̆ng sang ƀiă.

Klơi 5 boh luh tuh djah hăng pơkra 20 boh sang mơnơi, sang juă glai rơgoh hơdjă phrâo. Prăp rơmet čơkă thun phrâo Nhâm Dần, Khul tơdăm dra mut phung să hơmâo jak iâu pơtum 20 čô tơdăm dra mut phung kih rơmet abih bang truh 5 km jơlan amăng să, pla phrâo lu phun kyâo pơtâo mơtah mơda ngă hiam plơi pla.

“Hăng sa čô mơnuih ngă khua khul tơdăm dra mut phung să, gơmơi ăt git gai tơdăm dra amăng plơi pla djru pơtô lăi ƀing tơdăm dra mut phung brơi kih rơmet jơlan glông, ngă pơhiam đang war, anăp sang brơi rơgoh. Kiăng têt thun anai, abih bang ƀing tơdăm dra mut phung amăng plơi thâo gum pơgôp, hok mơak, ƀu ngă soh glăi tơlơi phiăn kơnuk kơna pơtrun ôh.

Ƀing gơmơi dŏ ƀuh, klin kheng Covid 19 tơnap tap, samơ̆ hlăk jak iâu pơtrut ƀing hlăk ai, tơdăm dra mut phung ngă klă tơlơi pơtô pơgang klin Covid 19, biă mă ñu amăng bơyan ƀong tết, rĭm mơnuih djop sang anŏ čơkă thun phrâo hok mơak, hiam drơi jăn, mă bruă đĭ nao pơ anăp adih”.

Ƀơi să Dă Sar, tơring glông Lạc Dương, tơring čar Lâm Đồng, mah bơbeč djơ̆ mơ̆ng klin kheng Covid 19 ngă samơ̆ yua nua kơphê đĭ đăi anun tơlơi hơdip mơda mơnuih ƀôn sang djuai ƀiă amăng să hơđong hăng đĭ đăi gŏ amŏ. Hăng bruă ngă, gum tơngan hrom, gum pơgôp djuai ania mơnuih ƀôn sang, pok pơhai ngă tui dua bruă pơđĭ kyar bơwih ƀong huă rah, pơgang klin kheng hơđong, glăi mă bruă kah hăng tơđar phrâo, ăt dưi tŭ mă boh tơhnal klă hiam, mơnuih ƀôn sang hok mơak, gir run mơak čơkă thun phrâo lu tơlơi hok kơdok. Ơi Liêng Jrang Ha Rôky, Khua jơnum min mơnuih ƀôn sang să Dă Sar brơi thâo:

“Bơyan ngă hmua thun 2020-2021, yua bơbeč mơ̆ng klin covid 19 ngă amăng dêh čar, amăng să Dă Sar ăt hnun mơ̆n tơnap tap biă mă, mah hnun, mơnuih ƀôn sang gir run răk rem phun kơphê pruai hơbâo kmơ̆k djop, hmua đang pơđĭ kyar hiam klă mơ̆n. Thun hlâo, kơphê pĕ hrŏ tui samơ̆ nua lĕ đĭ đăi ƀiă pơkă hăng hlâo, anun yơh tơlơi hơdip mơda mơnuih ƀôn sang hơđong, tơlơi bơwih ƀong huă pơđĭ kyar, mơnuih ƀôn sang mơak biă mă.

Hrom hăng anun, djop tơhnal pơtrun mơdua kah hăng pơtrut pơđĭ kyar bơwih ƀong huă hăng pơgang klin hơđong, tơlơi gơgrong hrom mơ̆ng mơnuih ƀôn sang thâo hluh tui hăng tơlơi pơtrun djơ̆ hơdră mơ̆ng djop gưl gong gai kơnuk kơna, sit mơ̆n  bruă pơđĭ kyar bơwih ƀong huă hăng pơgang klin amra ba glăi boh tŭ yua lu, ngă djơ̆ tơhnal pơtrun. Mơ̆ng bơyan pĕ kơphê sĭ hơmâo nua ƀiă amăng hrơi čơkă thun phrâo hăng pran jua mơnuih ƀôn sang djop pô hok mơak biă mă”.

Ăt kah hăng anun mơ̆n, mơnuih ƀôn sang djop djuai ania ƀơi tơring glông Dak Mil, tơring čar Dak Nông thun anai čơkă thun phrâo mơak mơai yua boh troh đang hmua djơ̆ bơyan, đĭ nua. Ƀơi ƀôn Bu Dak, să Thuận An, anih hơmâo rơbêh 315 boh sang anŏ hăng 1.200 čô lêng kơ mơnuih djuai ania Mnông soh. Anŏ pơhrui glăi phun mơ̆ng bruă ngă hmua mơnuih ƀôn sang lĕ kơphê hăng hmua pơdai ia. Ơi Bling Jing, Khua git gai ping gah ƀôn Bu Dak brơi thâo, thun anai kơphê mboh lu, nua đĭ đăi mơ̆n, ring bruă bơnư̆ kong ia Bu Dak hlâo kơ anai dưi ming pơkra glăi djop ia bruih kơ hơdôm hơpluh hektar hmua pơdai ia dua bơyan, anun tơlơi hơdip mơda mơnuih ƀôn sang đĭ đăi gŏ amŏ.

“Thun sô či rơgao, thun phrâo truh, mơnuih ƀôn sang hok mơak biă mă pơđĭ kyar bơwih ƀong huă. Mah dŏ lu tơlơi tơnap tap, samơ̆ mơnuih ƀôn sang ăt gir run pơsir tơlơi tơnap tap. Hrom hăng anun, tơlơi djru mơ̆ng Ping gah, kơnuk kơna laih anun gong gai djop gưl gơmơi gleng nao lu hloh kơ ană plơi pla. Ƀing gơmơi pơtô lăi hăng pơgang tơlơi suaih pral, amăng anun ngă tui djơ̆ tơlơi pơtrun 5k kiăng hơđong rơnuk rơnua. Amăng bơyan ƀong tết ăt hnun mơ̆n, kiăng pơgang tơlơi suaih pral kơ ta pô hăng plơi pla, mơnuih ƀôn sang hrom hơbit djru kơ bruă pơhlôm, pơgang klin tong ten”.

Nay Jek: Pơblang