VOV4.Jarai - Mơguah lơ 7/2, anai lĕ hrơi tal 7 ngui ƀong tết, ƀing apăn bruă, mơnuih mă bruă ƀơi djop anom bruă kơnuk kơna amăng tơring čar Dak Lak sit nik pơwŏt glăi mă bruă amăng thun phrâo Nhâm Dần 2022 anai. Ƀơi anom bruă ngă hră pơ-ar tơring čar Dak Lak, amăng hrơi mă bruă akŏ thun, ƀing apăn bruă anom bruă tơhan pôlih djru ngă hră pơ-ar hăng wai pơgang rơnuk rơnua, kông ang tơring čar ječ ameč tŭ mă hră pơ-ar kơ mơnuih ƀon sang ba nao ngă hră căn cước công dân.

Lu mơnuih nao tơña bruă mă ƀơi anom bruă hơduah ĕp bruă tơring čar Dak Lak amăng hơdôm hrơi akŏ thun phrâo tơdơi kơ ngui ƀong tết Nhâm Dần

Bơ ƀơi anom bruă hơduah ĕp bruă mă tơring čar Dak Lak, amăng hrơi mă bruă blung a tơdơi kơ Tết tui phiăn juăt, mơnuihnao tơña bruă lu dua wŏt pơhmu tui hơđăp. Hăng pran gơgrong amăng bruă mă mơng hrơi akŏ thun mơtăm, djop anom bruă amăng tơring čar Dak Lak glăk tŏ tui pơplih phrâo kiăng kơ klă dong amăng bruă mă, gir run pơgiong djop mơta bruă jao amăng thun 2022.

Siu Đoan: Pơblang