VOV4.Jarai - Čơkă ƀing čơđai pơwŏt glăi nao sang hră dong mơng tong krah blan 2/2022, djop sang hră čơđai muai ƀơi plơi prong Pleiku, tơring čar Gia Lai glăk tŏ tui pok pơhai lu hơdră kiăng pơhlôm rơnuk rơnua amăng bruă pơgang klin Covid-19. Hrŏm hăng anun, djop sang hră ăt lăi pơthâo, pơtrut pơsur ƀing amĭ ama ba čơđai nao ƀing čơđai, hơkrŭ glăi tơlơi hơdip tui hơđăp.

Ƀing čơđai truă akhăn gôm ƀô̆ lơ̆m hrăm hră

Gơnong bruă pơtô pơjuăt tơring čar Gia Lai brơi thâo, ră anai đơ đam tơring čar hơmâo 253/257 boh sang hră brơi čơđai anet pơwŏt glăi nao sang hră. Găn rơgao giăm 1 wŏt hrơi tơjuh, hơmâo laih 87% mrô čơđai nao sang hră. Lăng glăi abih bang, djop tơring glông, plơi prong, mrô čơđai anet pơwŏt glăi nao sang hră lu biă mă. Hăng bruă pơtô hrăm pơhlôm rơnuk rơnua, mrô čơđai nao sang hră glăk lu tui ƀơƀrư̆. Tui hăng gơnong bruă, sang hră čơđai muai lĕ gưl hrăm yôm phun, amra ngă ƀing čơđai dưi pơđĭ kyar djop mơta, thâo hluh hăng khin hơtai hlâo kơ mut hrăm anih 1. Yua anun, bruă brơi ƀing čơđai pơwŏt glăi nao sang hră lĕ kiăng biă mă.

Siu Đoan: Pơblang