VOV4.Jarai - Mơguah lơ 8/6, Ding jum pơtô pơjuăt pơphun jơnum lăng nao rai mơng ataih kơ bruă pơphun pơplông abih anih 12 thun 2022. Nao jơnum hrŏm hơmâo khul git gai pơplông mơng 63 boh tơring čar, ƀôn prong hăng ƀing pơ ala brơi djop Ding jum, anom bruă bơdjơ̆ nao. Tal pơplông abih anih 12 thun anai amra pơphun amăng lơ 7 hăng 8/7 pơ anăp anai.

Mông jơnum kơ bruă pơphun pơplông abih anih 12 thun 2022

Truh ră anai, Ding jum pơtô pơjuăt hơmâo hră pơtrun git gai, črâo ba kơ bruă pơphun pơplông abih anih 12 thun 2022. Truh 5 mông tlam lơ 5/6, djop anom bruă hơmâo pơgiong laih bruă tŭ yap hră pơ-ar nao pơplông hăng abih tih rơbêh 1 klăk 2 rơbâo čô čơđai čih anăn nao pơplông. Lăi pơthâo amăng mông jơnum, djop tơring čar, ƀôn prong brơi thâo, hơmâo pơgiong laih jơlan hơdră pơtô hrăm brơi kơ ƀing čơđai anih 12 tui tơlơi pơkă hăng ră anai glăk pơphun pơtô hrăm glăi. Djop tơring čar lêng kơ akŏ pơjing Khul git gai gưl tơring čar, tơring glông kiăng kơ pơphun pơplông klă hloh. Djop mơta bruă prap lui mơng gơnam tam, anih pơplông, mơnuih djru brơi glăk pok pơhai, pơhlôm pơphun pơplông ha wŏt amăng đơ đam dêh čar tui akŏ bruă ba tơbiă.

Siu Đoan: Pơblang