VOV4.Jarai-Lơ 2/8, Ding jum Pơtô hăng Pơjuăt hơmâo hră mơ-it nao kơ Jơnum min mơnuih ƀôn sang djop tơring čar, ƀôn prong pok pơhai bruă iâu pơmut nai pơtô gưl muai mầm non, nai pơtô hrăm hră phổ thông tui hră pơtrun mrô 72 mơ̆ng Ding jum kơđi čar. Tui hăng anun, djru hlâo hloh lĕ iâu pơmut ƀing nai pơtô tơlơi hrăm phrâo kơ thun hrăm phrâo ngă tui Hơdră pơtô hrăm hră phổ thông thun 2018 hăng gleng nao iâu pơmut nai pơtô gưl muai kơ djop sang hră pơtô čơđai gưl muai mầm non ƀơi kual bơwih ƀong huă dŏ tonap tap.

Tui hăng Hră pơtrun mrô 72 mơ̆ng Ding jum kơđi čar, mơ̆ng thun 2022-2026 pơhrua dơ̆ng giăm 66 rơbâo čô nai pơtô sit nik, kơnong thun hrăm 2022-2023 kiăng pơhrua dơ̆ng 28 rơbâo čô mơnuih ngă nai pơtô gưl muai, phổ thông gah sang hră kơnuk kơna. Ding jum Pơtô hăng Pơjuăt rơkâo djop tơring čar, ƀôn prong iâu pơmut djop mrô nai pơtô gah hơdôm tơlơi hrăm, pôr pơthâo djop bruă iâu pơmut, kiăng mrô nai pơtô dưi djop ngă hrom bơnah, anom bruă khom ngă hrom tong ten tŭ yua.

 Nay Jek: Pơblang