VOV4.Jarai - Rim kual plơi pla, hơmâo prăp lui sa boh sang brơi ƀing F0 đih pơjrao, mă yua sang gru grua plơi pla ngă anih pơƀut pơjrao brơi ƀing Covid-19 - anun jing hơdră bruă mơ̆ neh met wa djuai ƀiă ƀơi tơring glông Čư̆ Jut, tơring čar Dak Nông pơsir hĭ tơlơi tơnap tap kơƀah anih anom, gơnam yua pơgang klin Covid-19 glăk lar hyu tañ. Hơdôm hơbô̆ bruă anai glăk pơtrut tui anŏ klă amăng bruă pơjrao brơi ƀing ƀă Covid-19 amăng plơi pla, sang anŏ, plai ƀiă ngă glêh tơnap kơ anom bruă ia jrao Čư̆ Jut, tơring glông ƀơi guai dêh čar hơmâo truh 48% mrô mơnuih lĕ mơnuih djuai ƀiă.

Sang dŏ prong hiam jing anih 3 ama ană ơi Y Thanh Bkrông, ƀuôn Nui, să Tâm Thắng, tơring glông Čư̆ Jut dŏ pơjrao Covid-19. Ñu brơi thâo, lơ̆m pơtuk, duam, ñu nao pơ sang ia jrao să pơčrang jing ƀuh ƀă kman laih. Giong anun pơčrang brơi abih sang anŏ ñu mơtăm, 3 čô ƀă Covid-19, hơmâo ƀing ơi ia jrao pơtô brơi pơčlah pơjrao pơ sang. Hơjăn bơnai ñu huăi ƀă klin ôh, hơmâo sang anŏ ieo gah brơi dŏ jăng jai. Tơdơi kơ ha wơ̆t hrơi tơjuh pơčlah, pơjrao, ană đah rơkơi ñu suaih laih, ñu hăng ană dra ñu ăt plai mơn, huăi ruă dong tah. Ơi Y Thanh brơi thâo:

“Kâo jing mơnuih F0. Dua ama ană kâo dŏ pơ sang. Bơ bơnai kâo dŏ pơ sang amai ñu. Dua ama ană kâo hơđong pran jua pơjrao tơlơi ruă hăng ngă tui tơlơi pơtrun 5K. Hơđong mơn amăng hrơi mông pơčlah pơjrao tơlơi ruă, huăi bơngơ̆t hơget ôh. Kâo kiăng ayong amai adơi tơdah ƀă klin Covid-19 gir ngă tui 5K yơh, pruih jrao pơdjai kman, rao tơngan, laih anun anăm tơbiă hyu amăng plơi pla ôh”.

Ama ană ơi Y Thanh Bkrông glăk pơjrao mă pô pơ sang.

Ơi ia jrao Quản Xuân Huân, Khua sang ia jrao să Tâm Thắng brơi thâo, mơng rơnuč thun hlâo truh ră anai, să Tâm Thắng hơmâo rơbêh 800 čô mơnuih ƀă klin Covid-19. Abih bang lêng suaih laih, dŏ glăi 233 čô mơnuih pơjrao pơ sang. Ƀơi hơdôm boh plơi pla ăt glăk djă bong mơn grup covid-19 amăng plơi pla, ngă hrŏm hăng ƀing ơi ia jrao krăp lăng, pơtô ba pơjrao ƀing F0 huăi mưn ruă ƀudah ruă rơnang ƀơi sang anŏ.

“Rim boh plơi amra akŏ pơdong lu grup djru mơnuih ruă. Lơ̆m ƀuh sa čô F0 hăng pơjrao pơ sang, sang ia jrao să amra pơtô brơi hơdră wai lăng, pơjrao, mơñum jrao hiư̆m pă kơ grup covid krăp lăng hăng brơi ia jrao kơ ƀing ruă. Giong anun hơmâo ƀing ngă bruă ia jrao amăng plơi, khua plơi, brơi pơčlah sang anŏ hơmâo pô ruă, đah mơng huăi ƀă hyu amăng plơi pla”.

Ƀơi kual plơi pla giăm plơi prong Buôn Ma Thuột, mơnuih ƀon sang hơdip ter jơlan mrô 14, hơmâo sa kual sang măi mơng tơring čar Dak Nông, să Tâm Thắng hơmâo lu mơnuih nao rai, jing amuñ ngă klin Covid-19 lar hyu tañ mơn. Ơi Trần Thế Quang, Khua Jơnum min mơnuih ƀon sang să Tâm Thắng brơi thâo, să hơmâo rơbêh 15.300 čô mơnuih, amăng anun djuai ania ƀiă hơmâo 30%. Tơlơi hơdip neh met wa tơnap biă, jing sa amăng hơdôm tơlơi pơgăn bruă pơgang klin Covid-19. Hrơi mông klin hơđuh kơtang, djơ̆ hrơi ñu amăng plơi pla mơnuih djuai ƀiă hơmâo truh 60 čô mơnuih ƀă klin.

Găn rơgao tơlơi tơnap tap kơƀah gơnam, să iâu pơthưr abih bang mơnuih gum tơngan ngă hơbô̆ bruă lăng ba ƀing F0 ruă rơnang ƀudah huăi ƀuh tơlơi ruă pơjrao pơ sang. Anun lĕ rim kual plơi pla prăp lui sa boh sang brơi ƀing ruă dŏ, ƀudah F1 nao dŏ pơ tông hmua, brơi sang kơ ƀing F0 dŏ pơčlah. Lơ̆m hơmâo lu đơi F0, să mă yua sang gru grua plơi ngă anih pơƀut pơjrao brơi ƀing ƀă klin. Ơi Trần Thế Quang brơi thâo, bruă pơhlôm hơmâo djŏp gơnam yua kơ mơnuih ruă hơđong pran jua dŏ pơčlah ăt gơnang kơ plơi pla hăng tơlơi gum djru mơng abih bang mơnuih mơn.

“Hơdôm anih pơjrao pơ sang lĕ gơmơi iâu pơthưr abih bang mơnuih djru ba kah hăng braih, gơnam yua pơkŏn dong laih anun pơtô brơi ƀing F0 bơwih ƀong mă pô, lăng nao rai tơdruă. Hăng hơdôm boh sang anŏ lĕ ăt gơnang kơ sang anŏ wơ̆t hăng mơnuih ƀon sang mơn, ƀing F1 amra ba nao gơnam ƀong huă, gơnam yua kơ F0. Bơ amăng sang hơmâo lu mơnuih F0 lĕ amra pơtô brơi kiăng ƀing gơñu tơnă asơi hơbai anăm mă pô, lăng nao rai gŏp ta; gong gai plơi pla kơnong djru ba hơdôm gơnam kiăng yua biă mă đôč. Hơmâo mơn ƀơi ñu sa boh sang plơi pla gơmơi pơjrao brơi mơng 20 truh 25 čô mơnuih; hơmâo boh sang ƀut ƀăt hơmâo pơƀut pơjrao brơi năng ai 6 čô; tơlơi anun hơmâo ngă hăng hơdôm boh plơi djuai ƀiă đôč, bơ hăng ƀing Yuan lĕ anih anom, gơnam yua hơmâo pơhlôm klă laih”.

Kar kăi hăng ƀơi să Tâm Thắng mơn, hơbô̆ bruă pơjrao brơi ƀing ƀă klin Covid-19 ƀơi hơdôm boh plơi pla djuai ƀiă hơmâo anŏ klă laih amăng abih bang tơring glông Čư̆ Jut, tơring čar Dak Nông. Tui hăng ơi ia jrao Bùi Thị Minh Nghĩa, Khua sang ia jrao tơring glông Čư̆ Jut, hơdôm hơbô̆ bruă anai lăp djơ̆ hăng tơlơi phiăn mơnuih djuai ƀiă ăt kah hăng pơsir hĭ tơlơi tơnap tap mơng mơnuih ƀon sang. Bruă pơjrao ƀing ƀă klin Covid-19 amăng plơi pla djru ngă plai ƀiă glêh tơnap kơ anom bruă ia jrao. Yap truh ră anai, tar ƀar tơring glông čih pioh hơmâo giăm 7000 čô mơnuih ƀă klin Covid-19, amăng anun lu mơnuih suaih laih, ră anai gŏ giăm 100 čô mơnuih pơjrao pơ sang ia jrao, rơbêh 2000 čô pơjrao pơ sang.

Lơ̆m mơnuih ƀă klin lu tui, rim kual plơi pla djuai ƀiă ƀơi Čư̆ Jut amra dưm dăp brơi ƀing F0 dŏ pơjrao hơjăn ƀơi sa boh sang.

Hrơi blan giăm anai, yap rim hrơi tơring Čư̆ Jut hơmâo năng ai 200 čô mơnuih ƀă klin. Tơlơi mơ-ak hĭ mơn anun lĕ mrô mơnuih kiăng pơjrao pơ sang ia jrao ƀiă đôč. Ơi ia jrao Bùi Thị Minh Nghĩa brơi thâo, bruă pơgang klin hơmâo tơlơi amuñ mơn yua tơring glông hơmâo tlâ̆o laih vaccine arăt 3 kơ mơnuih mơng 18 thun, laih anun neh met wa thâo pơmin, thâo laih hơdră pơgang klin Covid-19. Khă hnun hai, tơring glông hơmâo prăp lui gơnam yua đah mơng dưi čơkă pơjrao brơi 300 čô mơnuih hơmâo hnong pơkă ruă găp ƀrô, laih anun prăp lui mơnuih mă bruă djơ̆ hăng tơlơi kiăng pơjrao lơ̆m mrô mơnuih ruă lu tui.

“Ƀing ơi ia jrao ăt hơmâo mơn mơnuih ruă, bruă mă jai hrơi lu tui, lơ̆m anun mơnuih mă bruă kơƀah, anun jing gơmơi dưm dăp glăi na nao mơnuih mă bruă đah mơng pơhlôm pơgang klin. Ră anai gơmơi ăt čih glăi anăn ƀing ơi ia jrao pơdơi bruă thun tha, ƀing ơi ia jrao mă bruă mă hơjăn, tơdah kiăng lĕ ta jak iâu ƀing gơ̆ rai djru”.

Hăng tơlơi gum hrŏm mơng abih bang mơnuih, gong gai hăng sang ia jrao, tơring glông Čư̆ Jut, tơring čar Dak Nông glăk prăp lui klă hơdră pơgang klin pơhlôm tơlơi suaih pral kơ abih bang mơnuih ƀơi anăp tơlơi ruă klin kheng Covid-19.

Minh Huệ: Čih - Siu H’Mai: Pơblang