VOV4.Jarai - Tơdơi hơdôm hrơi blan kret kruai yua kơ klin ruă Covid-19, jua čing hơgor mơng djuai ania K’ho ƀơi tơkai čư̆ Lang Biang, tơring kual Lạc Dương, tơring glông Lạc Dương (Lâm Đồng) hmâo pơphun tơtar đĭ laih pioh čơkă glăi tuai amăng bơyan bơnga phrâo anai. Hrom hăng anun, hơdôm mơta gơnam tam gru grua pha ra kah hăng băn ao mơñam, tơpai čeh ăt dưi prăp lui djop mơn pioh čơkă tuai čuă ngui. Yua kơ bruă pơđĭ kyar tuai čuă ngui plơi pla hmâo djru laih tơlơi hơdip mơnuih ƀôn sang ƀơi anai pơđĭ kyar amăng ƀrư̆.

Tơdơi kơ phru dô̆ čơlah mơnuih mơnam, juăt hăng tơlơi pơhlôm, thâo pơplih tañ, wai lăng ba glăi bôh tơhnal klin ruă Covid-19 tui Tơlơi pơtrun pơsit 128 mơng Kơnuk kơna, jua čing hơgor mơng djuai ania K’ho ƀơi tơkai čư̆ Lang Biang, tơring kual Lạc Dương, tơring glông Lạc Dương (Lâm Đồng) hmâo tañ laih kiăng tui hăng jua tơtar đĭ čơkă tuai. Tha plơi ơi Krajan Plin mơ-ak brơi thâo, khă pơdơi hơdôm hrơi blan sui samơ̆ djop bruă mă bơwih brơi kơ tuai mơng mơnuih ƀôn sang ƀơi anai ăt ƀu hmâo anô̆ gun mơn. Bruă phru dô̆ čơlah mơnuih mơnam, hơdip hrom hăng klin Covid-19 amăng tơlơi hơđong phrâo amăng bơyan bơnga anai lĕ sa hơdră pơtrun hmao tlôn, djơ̆ pran mơnuih ƀôn sang. Neh wa ƀơi tơring kual Lạc Dương leng kơ prăp lui djop hơdôm tơlơi kiăng kơ anih anom, gơnam tam, mơnuih mă bruă pioh bơwih brơi kơ tuai klă hloh djop tơlơi kiăng mơng tuai hyu čuă ngui amăng thun phrâo anai. Tha plơi Krajan Plin, lăi pơthâo:

“Tơdơi 2 thun pơdơi yua kơ klin Covid-19, kơnuk kơna hmâo hrơi laih hơdôm anih anom bơwih brơi kơ tuai čuă ngui pơwot glăi čơkă tuai hơkrŭ glăi amăng tơlơi hơđong phrâo kiăng pơđĭ kyar bơwih ƀong, pơđĭ tui tơlơi hơdip mơda laih anun pơgang hlôm hlâo rah klin ruă, neh wa ƀơi anai lăi hrom hăng sang anô̆ lăi ha jăn hmâo prăp lui tum laih, amra bơwih brơi kơ tuai čuă ngui, hyu ĕp lăng hăng bơkơtuai nao rai bôh thâo čing hơgor mơng tuai amăng tal tết anai. Dong mơng gơnam ƀong huă, mơñum truh kơ bruă atông čing hơgor hmâo prăp lui hăng djop bruă čơkă tuai truh ră anai leng kơ pơphun kah hăng tơđar mơn. Yua anun, prăk pơhrui glăi mơng sang anô̆ ăt pơhlôm mơng, tết ăt hơđong kah hăng hơdôm thun hlâo adih mơn”.

Hrom hăng jơnum bôh thâo čing hơgor hăng gơnam ƀong huă, plơi pla djuai ania K’ho ƀơi tơring kual Lạc Dương dô̆ pơlar bruă rơngaih mơñam băn ao hăng kŏng tơpai čeh pioh sĭ hăng tŭ jum tuai. Tui hăng ơi Păng Ting K’Rè, ƀơi Bon Dơng 1, tơring kual Lạc Dương, bruă neh wa ƀơi anai ngă tui ba glăi bôh tơhnal bôh thâo čing hơgor – tơlơi thâo thăi đưm hăng kông ngăn mơng ană mơnuih dưi hmâo UNESCO tŭ yap pioh ngă bruă tuai čuă ngui lĕ sa anô̆ gal prong kiăng ngă tui dong. Yua kơ, ñu djru prong biă amăng pơjing bruă mă hăng đĭ tui prăk pơhrui glăi kơ lu sang anô̆, amăng anun hmâo lu mơnuih hrưn đĭ tơtlaih mơng ƀun rin hăng ngă pơdrong lăp djơ̆.

“Kâo ngă tui bruă mă čing hơgor tŭ jum tuai hmâo ba glăi laih prăk pơhrui glăi, pơplih tơlơi hơdip sang anô̆. Lu mơnuih mă bruă ƀơi plơi pla dưi pơsir bruă mă, hơđong tơlơi hơdip mơda. Yua anun, plơi pla jai hrơi jai pơđĭ kyar hloh. Anai lĕ bruă mă mơ̆ djru djă pioh bôh thâo, pioh glăi kơ hlăk ai thâo kơ čing hơgor mơng pô, jing kông ngăn yua kơ ơi yă pioh glăi hmâo nua yôm phăn biă mơng neh wa djuai ania K’ho lăi ha jăn hăng plơi pla djuai ania ƀiă ƀơi Dăp Kơdư lăi hrom”.

Tui hăng ơi Trần Xuân Đường, Khua Jơnum min mơnuih ƀôn sang tơring kual Lạc Dương, tơring glông Lạc Dương, tơbiă mơng pơplih phrâo bruă tuai čuă ngui yơh, ba glăi laih lu prăk kơ neh wa. Yua anun, djă pioh hăng ngă tui hơdôm nua yôm bôh thâo đưm hmâo hăng glăk jing jơlan gah pơđĭ kyar mơ̆ gong gai plơi pla glăk ĕp hơdră pioh pơtrut đĭ. Hrom hăng hơdôm gơnong bruă bơwih ƀong pơkon, rơđah rơđông tuai čuă lăng plơi pla hmâo djru prong biă kơ bruă hrŏ trun rin rơpa sui thun kơ plơi pla. Rơđah biă ñu, đơ đam tơring kual ră anai kơnong kơ dô̆ 16 bôh sang anô̆ ƀun rin, sang anô̆ pơdrong hăng đĭ kyar jai hrơi jai lu tui. Ơi Trần Xuân Đường brơi thâo:

“Ƀing gơmơi hmâo pơsit laih jơlan gah tuai čuă lăng plơi pla đing nao bôh thâo djuai ania, biă ñu čing hơgor. Hrom hăng anun, hơdôm mơta gơnam tam mơ̆ neh wa djuai ania ƀiă hơđăp ƀơi anai ngă rai pioh kơ tuai čuă lăng kah hăng tơpai čeh, rơngaih mơñam băn ao, bung bai... anai lĕ hơdôm gơnam hmâo tơhnal pha ra mơ̆ tuai rai pơ̆ anai hor biă. Yua anun, tuai cuă lăng plơi hmâo djru laih neh wa hmâo bruă mă, hmâo prăk pơhrui glăi, hrŏ trun rin rơpa hăng ngă pơdrong kơ plơi pla”.

Kơnang kơ thâo ngă tui anô̆ gal gah bôh thâo pha ra mơng djuai ania pô, djuai ania K’ho ƀơi tơkai čư̆ Lang Biang, tơring kual Lạc Dương, tơring glông Lạc Dương (Lâm Đồng) hmâo pok tơbiă rai lu mơta pioh tuai čuă lăng, pơđĭ kyar bơwih ƀong rah hăng djă pioh rah gru grua bôh thâo đưm. Hăng jơlan nao anai, sit ñu pơgi kơdih anai ƀu ataih dong tah, anih anom anai amra jing sa anih anom pơhư̆č tuai mơng djop anih anom nao čuă lăng./.

Quang Sáng: Čih – Siu H’ Prăk: Pơblang