Kông ti drai ia apui lơtrik Ialy wai lăng bruă pơđuăi 3 boh măi drai ia apui lơtrik prong hloh ƀơi bơnư̆ drai ia apui lơtrik ia krông Sê San hơmâo: Sang măi drai ia apui lơtrik Ialy, sang măi drai ia apui lơtrik Sê San 3, hăng sang măi drai ia apui lơtrik PleiKrông, amăng tơring čar Gia Lai hăng Kon Tum. Apui lơtrik pơkra rai mơng 3 boh sang măi anai lĕ 1.080 MW, abih tih apui lơtrik pơkra rai truh lơ 30/6/2023 mơng 3 boh sang măi anai lĕ rơbêh 102 klai 246 klăk kWh. Samơ̆ amăng 6 blan akŏ thun 2023, hơdôm kông ti hơmâo pơkra rai 1 klai 955 klăk kWh apui lơtrik, dưm dưm 41,68% tui mrô pơkă, hrŏ trun 330 klăk kWh pơhmu tui tơđar thun 2022.

Anai lĕ sang măi drai ia apui lơtrik prong hloh amăng hơdôm črăn dơnao pơkŏng ia drai ia apui lơtrik Sê San, Drai ia apui lơtrik Ialy hơmâo ngă klă tơlơi gơgrong mơng sang măi hăng lu hơnong pơkă: Pơkra rai apui lơtrik, pơđoh trun ia gap ƀrô, plai ƀiă ngă ia ling dăo amăng bơyan hơjan hlim; pơhlôm ia yua pơ bah amăng bơyan không phang. Laih dong, pơhlôm brơi ia pruih phun pla gah dơnung kah hăng pơđoh ia kiăng pơkra rai apui lơtrik. Ơi Đinh Viết Thiện, kơ-iăng khua kông ti drai ia apui lơtrik Ialy brơi thâo:

“Bơyan phang thun anai pơ-iă kơtang biă mă, amăng hơdôm blan rơnuč bơyan hơjan hlim, ia pơkŏng amăng dơnao hrŏ trun. Amăng blan 3 hăng 4, ia pơkŏng amăng dơnao hrŏ trun kơtang hloh, ia khŏt giăm 90%. Yua anun amăng bơyan ia amăng dơnao khŏt kiăng pơhlôm ia yua ăt glêh tơnap mơn, kah hăng bruă pơđoh trun ia pơ bah kiăng ngă tui tơlơi pơkă mơng rĭm boh dơnao. Gah kông ti hơmâo hră lăi pơthâo hmao tlôn hăng hơdôm anom bruă wai lăng kơnuk kơna, anom bruă gơnong glông lĕ anom bruă phun kah hăng Jơnum min mơnuih ƀon sang tơring čar Gia Lai hăng Kon Tum rơkâo đĭ akŏ bruă mă yua ia hiưm pă kiăng pơhlôm brơi ia pơ bah, pơhlôm brơi ia yua kơ mơnuih ƀon sang kah hăng bruă pơđoh hyu ia yua amăng ngă hmua. Truh lơ 30/6 bruă pơhlôm ia brơi kual pơ bah ăt klă tui mơn”.

Ơi Hồ Trung Đông, Khua apăn bruă Ping gah, Khua kông ti pơđĭ kyar drai ia apui lơtrik Sê San brơi thâo: Bơyan phang thun anai, ia pơkŏng amăng dơnao hrŏ trun pơhmu hăng rĭm thun, hrŏ trun 15% pơhmu hăng thun 2022. Amăng hrơi blan pơđuăi sang măi ră anai ăt pơhlôm djơ̆ tơlơi rơkâo mơng hơdôm anih anom. Tơlơi phara ƀơi drai ia apui lơtrik Sê San lĕ hơmâo dơnao pioh pơkŏng ia ha bơnah ăt hơmâo tua bin pơđuăi apui lơtrik. Yua anun bruă pơđoh trun ia yua pơ bah ăt pơhlôm huăi bơbeč sat nao bruă ngă hmua. Ơi Hồ Trung Đông brơi thâo:

“Amăng bruă mă yua dơnao pơkŏng ia 215 mơng Khua dêh čar thun 2018, hơmâo tơlơi pơkă brơi kơ ƀing gơmơi amăng bơyan không phang, ƀing gơmơi kiăng pơhlôm aset hloh 195 met khối/giây pơđah trun pơ bah. Amăng hrơi mông mă yua dơnao pơkŏng ia, ƀing gơmơi hơmâo sa boh dơnao kiăng pơhlôm pơkŏng ia, kiăng pơsir hĭ bruă mơ̆ lơm ƀing pơđuăi kơtang ƀu thâo pơkŏng lui hĭ pơpă, lơ̆m ƀing gơmơi ƀu pơđuăi pơkra apui lơtrik, amra pơđuăi mơng dơnao pơkŏng lui Sê San 4. Amăng hrơi blan laih rơgao, ƀing gơmơi ngă djơ̆ tơlơi rơkâo kơ bruă pơđoh trun ia kiăng pơhlôm brơi ia amăng ia krông Mê Kông. Laih dong amăng hrơi mông không phang hloh, lơ̆m ƀu djop ia kiăng pơđuăi apui lơtrik tui tơlơi pơkă, ƀing gơmơi gơgrong lăi pơthâo Jơnum min ia krông Mê Kông, gơgrong  lăi pơthâo hăng anom bruă wai lăng ia kiăng djop bơnah gum hrŏm amăng bruă wai lăng”.

Kông ti drai ia apui lơtrik Buôn Kuốp wai lăng 3 boh sang măi drai ia apui lơtrik amăng hơdôm črăn drai ia apui lơtrik Srêpôk kơplah wah dua boh tơring čar Dak Lak hăng Dak Nông anun lĕ: Sang măi drai ia apui lơtrik Buôn Tua Srah, sang măi drai ia apui lơtrik Buôn Kuốp hăng sang măi drai ia apui lơtrik Srêpôk 3. Mrô pơduăi abih bang mơng 3 boh sang măi drai ia apui lơtrik anai lĕ 580 MW. Ơi Nguyễn Đức, kơ-iăng khua kông ti drai ia apui lơtrik Buôn Kuốp brơi thâo: 6 blan laih rơgao, mrô pơđuăi abih bang mơng 3 boh sang măi lĕ 915 klăk kWh, kơnong 79% pơhmu tui tơđar thun 2022. Apui lơtrik pơkra rai hrŏ trun yua kơƀah ia mơng rơnuč bơyan hơjan hlim, ia khŏt tui amăng blan 3 hăng 4 laih rơgao. Samơ̆ bruă git gai mă yua ƀơi hơdôm črăn dơnao ia mơng drai ia apui lơtrik Buôn Kuốp ăt hơmâo ngă tui djơ̆.

“Kông ti hơmâo gơgrong gum hrŏm hăng anom bruă wai lăng bruă pơkra apui lơtrik dêh čar kiăng pơđoh trun ia pơhlôm brơi ia yua brơi kơ kual pơ bah. Blan 5, ia pơkŏng hrŏ trun pơhmu hăng dơnao pơ hlao Buôn Tua Srah, kông ti hơmâo lăi pơthâo tơlơi sit nik tơl Jơnum min mơnuih ƀon sang tơring čar kiăng črâo ba amăng bruă pơkra pơjing kah hăng mă yua brơi lăp djơ̆. Amăng blan 5, Jơnum min mơnuih ƀon sang tơring čar hơmâo jao brơi gơnong bruă sĭ mơdrô hăng tuh tia pơkra pơjing git gai mă bruă hăng kông ti. Tui anun tong krah blan 5, hơmâo laih hơdră kiăng kơ pơđoh trun ia pơ bah aset hloh, pơkŏng ia kiăng pơhlôm amăng bơyan phang. Truh rơnuč blan 5, ia pơkŏng amăng dơnao Buôn Tua Srah trun giăm hăng mrô pơkă tui hăng bruă mă yua hơdôm dơnao pơkŏng ia”./.