Ha mơkrah thun rơgao, sang anŏ ơi Lê Huy Dũng, dŏ amăng tơring kual Lộc Thắng, tơring glông Bảo Lâm, tơring čar Lâm Đồng ƀu hơmâo sang dŏ dong tah. 5 čô mơnuih amăng sang anŏ hơmâo 3 rơnuk khŏm nao ĕp anih dŏ duh prăk, tơlơi hơdip tơnap tap biă mă. Ba truh tơlơi anai lĕ yua sang tơ̆i rơ̆i laih yua anun ruh hĭ. Lơm ngă hră pơ-ar kiăng man pơkra phrâo, gong gai ƀôn lan ƀu ngă brơi hră pơ-ar yua lŏn sang kơ sang anŏ ñu dong amăng kual mă hơdăng pơtâo. Ơi Lê Huy Dũng brơi thâo:

“Kâo rơkâo kơnuk kơna hơmâo hră pơ-ar pơhrơ̆i, ƀudah pơkra glăi laih dong pơplih hĭ kiăng neh met wa hơmâo sang dŏ hơđong tơlơi hơdip mơda. Hơmâo lŏn mơ̆ ƀu dưi man pơdong sang dŏ, ƀu hơmâo sang ƀing gơmơi ăt ƀu thâo ngă hiưm pă lơi, tơlơi anai ngă tơnap tap biă mă”.

Sang anŏ yă Phạm Thị Năm, dŏ amăng phường Lộc Tiến, plơi prong Bảo Lộc, tơring čar Lâm Đồng ăt kar kăi mơn. Sang dŏ, lŏn ngă hmua kơ sang anŏ glăk hơđong, djơ̆ tơlơi phiăn, dong amăng kual plơi pla, tô̆ tơnô̆ arăng guang dar, ƀu dưi pơčlah brơi kơ ană bă ƀudah ƀu dưi yua sang lŏn sang pioh čan prăk tuh pơ alin. Yă Phạm Thị Năm brơi thâo:

“Phường Lộc Tiến gơmơi hơmâo sang anŏ lu ană bă, dŏ hơdip hrŏm mơng 3-4 rơnuk samơ̆ ƀu dưi pơčlah lŏn sang brơi ană bă. Lu sang anŏ kiăng pơđĭ kyar bơwih ƀong huă, čang prăk sang bruă prăk ăt ƀu dưi yua bơdjơ̆ nao bruă dưm dăp glăi. Sit biă ñu, ră anai lu sang dŏ răm rai yơh tơdah kiăng pơkra min ăt ƀu dưi lơi”.

Tui tơlơi pơtrun mrô 866 lơ 18/7/2023 mơng Khua dêh čar kơ bruă tŭ yap kơ bruă ĕp lăng, klơi mă, pơkra pơjing hăng mă yua djop hơdăng pơtâo rơwang thun 2021-2030, anăp nao truh thun 2050, ƀơi tơring čar Lâm Đồng hơmâo rơbêh 70.000 ektar dong amăng kual dưm dăp glăi, bơdjơ̆ nao hơdôm rơbăn boh sang anŏ hăng giăm 100 rơbâo čô mơnuih. Tui ơi Võ Ngọc Hiệp, Kơ-iăng khua Jơnum min mơnuih ƀôn sang tơring čar Lâm Đồng, bruă dưm dăp mă hơdăng pơtâo bơdjơ̆ nao kual plơi pla ƀu djơ̆ amra ngă tơnap tap tơlơi hơdip kah hăng tơlơi bơwih ƀong huă kơ mơnuih ƀôn sang đôč ôh mơ̆ ăt amra bơdjơ̆ nao akŏ bruă dưm dăp pơđĭ kyar bơwih ƀong huă-mơnuih mơnam gun hĭ.

“Kiăng pơhlôm pơđĭ kyar hơđong kjăp kiăng đing nao pơsir hĭ tơnap tap yua bơdjơ̆ nao kơ bruă dưm dăp klơi mă, ĕp lăng hơdăng pơtâo. Đơ đam rơbêh 50% lŏn mơnai tong krah tơring glông Bảo Lâm, ha bơnah ƀơi Bảo Lộc ăt tong krah mơn, laih dong hơdôm akŏ bruă tuh pơ alin man pơkra ring bruă, lu kual pơđĭ kyar…lêng kơ dong amăng kual ĕp lăng, klơi mă, pơkra pơjing hơdăng pơtâo. Ră anai djop mơta bruă glăk gun hĭ, wŏt hơdôm kual plơi prong, kual plơi pla, anih pơdong plơi pla phrâo”.

Ƀuh rơđah tơlơi gun mơng akŏ bruă dưm dăp mă hơdăng pơtâo tui tơlơi pơtrun mrô 866, amăng anun tal hyu mă bruă amăng rơnuč blan 8/2024 ƀơi tơring čar Lâm Đồng, Khua dêh čar ơi Phạm Minh Chính hơmâo git gai Ding jum wai lăng lŏn mơnai glai čư̆ ječ ameč pel ĕp hăng pơsĭ hĭ tơnap tap. Khua dêh čar ơi Phạm Minh Chính lăi rơđah:

“Anai lĕ tơlơi tơnap bơdjơ̆ nao tơlơi phiăn, yua anun Ding jum wai lăng lŏn mơnai glai čư̆ kiăng tum pơƀut, ba nao kiăng pơplih pơkra tơlơi phiăn hơdăng pơtâo, sit biă ñu lĕ hơdôm bruă ƀu djơ̆ hăng tơlơi sit nik mơ̆ hlâo anun ƀing ta hơmâo ngă. Ră anai aka ƀu dưi mă hơdăng pơtâo kiăng brơi mơnuih ƀôn sang yua lŏn amăng kual anun, pơhlôm kơ bruă ngă hmua, tơlơi hơdip, mơ̆ lơm mă hơdăng pơtâo amra pơplih tơdơi. Ƀơi anai, lơm dưm dăp anih mă hơdăng pơtâo ta khŏm tui yơh, ngă tui anun mơnuih ƀôn sang amra bưp tơnap tap, ƀu thâo hơdip hiưm pă, anai lĕ tơlơi sit nik”.

Tui tơlơi git gai mơng Khua dêh čar, mơnuih ƀôn sang tơring čar Lâm Đồng čang rơmang hơdôm anom bruă bơdjơ̆ nao tañ pơsir hĭ tơlơi gun lăp djơ̆ tui akŏ bruă dưm dăp mă hơdăng pơtâo kiăng hơđong tơlơi hơdip mơta, pơđĭ kyar bơwih ƀong huă mơnuih mơnam./.