Črăn hră dưm dăp ba tơbiă hơnong pơkă truh thun 2030: 100% anom mă tơlơi pơhing, gong pơtui jua pơhiăp, pơdah rup ngă tui hơdră pơplih yua boh thâo phrâo, pơplih phrâo amăng djop bruă mă, pơjing anih anom pôr pơhing tui jơlan gah yua boh thâo phrâo. Tŏ tui tuh pơ alin, pơđĭ kyar 6 anom bruă pôr pơhing phun yua boh thâo phrâo hơmâo Gong pơdah rup Việt Nam, Gong phun jua pơhiăp dêh čar Việt Nam, Thông tấn xã Việt Nam, anom pôr pơhing Mơnuih ƀôn sang, Ling tơhan, kông ang prong hloh, ba jơlan hlâo amăng bruă pôr pơhing.

Kơ-iăng khua dêh čar ơi Trần Lưu Quang jao Ding jum pôr pơhing pel ĕp, čih pơkra črăn hră dưm dăp djơ̆ hăng tơlơi pơkă lăp djơ̆ hloh, hơmâo tơlơi črâo ba, sit nik, pok phư, samơ̆ ƀu dưi bơdjơ̆ hăng hơdôm tơlơi pơkă dưm dăp pơkŏn hăng pơhlôm brơi dưi ngă.