VOV4.Jarai-Thun blan rơgao, lu hlăk ai, tơdăm dra ƀơi Gia Lai lê̆ luh arăng plư, ƀing soh sat plư amăng tơlơi pơhing rơgơi lơ̆m internet pơhưč, jak ba nao pơ dêh čar Kur lăi ĕp bruă hyuk đôč samơ̆ ƀong prăk lu, ƀing plư anai mă pơkong laih anun brơi sang anŏ khom song mă hăng rơnoh hơdôm rơtuh klăk prăk kah phai lui. Kông an tơring čar Gia Lai pơtă pơtăn kơ mơnuih ƀôn sang khom răng kơđiăng hăng hơdră plư pleč mơ̆ng ƀing soh sat.

Amăng sang pơdong ƀu prong ôh, sang răm sô hĭ laih, či ƀut mrô 4, tơring kual Kon Dơng, tơring glông Mang Yang, tơring čar Gia Lai, amai N.T.L luh ia mơta dua gah meng hning kơ ană đah rơkơi ñu anăn Đ.V.T 15 thun ră anai ƀu thâo hơdip mơda hiư̆m pă ôh. Ñu pơmin hyu ĕp bruă mă djru sang anŏ amĭ ama, rơnuč blan 3 thun anai, hmư̆ tơlơi pơhing amăng facebook, T gang rơdêh pơgiăng tuai nao pơ ƀôn prong HCM adih, laih anun hơmâo sa khul mơnuih jak ñu nao mă bruă pơ dêh čar Kur lơ̆m blan 4. T iâu telephôn kơ amĭ ama tui hăng Zalo lăi, ƀing anun pơgô̆ ñu mă bruă, kiăng glăi plư mơnuih mơ̆ng Việt Nam, čih amăng plăng facebook, brơi nao pơ dêh čar Kur mă bruă ƀong prăk blan lu. Tơdah dưi hơmâo lu mơnuih nao lĕ, T. amra tŭ mă prăk apah 30 klăk prăk.

Amĭ ama T. bơngơ̆t biă mă, hŭi rơhyưt kơ anaw đah rơkơi gơñu dŏ pơ dêh čar arăng

10 hrơi tơdơi, T, mơ-it tơlơi pơhing rơkâo sang anŏ mơ-it nao 150 klăk prăk tui mrô tŭ mă prăk djă anăn Quách Thanh Tùng hnun kah arăng phai lui ñu. Sang anŏ tơnap tap đơi, truh ră anai, rơkơi bơnai amai L ăt ƀu hơmâo jơlan hơduah ĕp prăk kăk lu hơdôm anai pioh nao song mă ană:

“Sang anŏ tơnap tap, ƀu hơmâo prăk mơ-it nao ôh, ană gơmơi ăt mơ-it tơlơi pơhing Zalo arăng taih čom ñu, ƀu brơi huă ƀong 2 hrơi. Ră anai, kơnang kơ kông an Việt Nam, Kur, khua mua pơ ala dêh čar Việt Nam nao djru pơklaih brơi ană gơmơi mơ̆ng dưi glăi pơ Việt Nam rơnuk rơnua”.

Trung tá Đinh Văn Sơn-Kơ-iăng Khua anom ĕp lăng tơlơi pơhing amăng plang internet hăng pơgăn tơlơi soh sat mă yua tơlơi pơhing rơgơi, mơ̆ng sang bruă kông an tơring čar Gia Lai brơi thâo, aka truh 6 blan ôh, akŏ thun 2022, anom bruă gơñu hơmâo ƀuh tơlơi pơhing lăi pơthâo plư pleč amăng internet, rơnoh prăk truh kơ 26 klai. Rơngiao kơ hơdră plư pleč hlâo adih lăi, mơnuih djru hrom sĭ mơdrô gơnam, tuh pơ alin blơi prăk amăng internet, đơ đa lăi ngă bruă kơnuk kơna lăi pơthâo mă prăk đŭ yua ngă soh…ră anai hơmâo dơ̆ng lu hơdră tơlơi plư pleč phrâo brơi nao mă bruă pơ dêh čar Kur hăng prăk lu mơ̆ng 800 truh 1000 dolar.

Sang anŏ ƀun rin tơnap tap mơ̆ng pô arăng plư T…

Tui hăng tơlơi pơhing lăi pơthâo mơ̆ng sang anŏ mơnuih arăng plư, laih nao pơ dêh čar Kur, gơñu arăng ba nao dŏ amăng sang lu mơnuih dŏ hrom yua mơnuih dêh čar Khač wai lăng. Bruă mă rĭm hrơi lĕ gơñu mă yua facebook iâu glăi pơ Việt Nam, plư ba lu mơnuih pơkŏn, lăi nao ngă bruă sĭ mơdrô, iâu pơthưr tuh pơ alin, plư ba arăng nao mă bruă pơ dêh čar Kur….Tơdah dưi ngă djơ̆ tơhnal pơtrun, hơmâo prăk apah, tơdah ƀu ngă djơ̆ lĕ, đŭ glăi boh ƀiă ñu 1000 dolar, taih čom ruă nuă, ngă sat kơtang, brơi iâu telephôn kơ sang anŏ mơ-it nao prăk song mă.

Trung tá Đinh Văn Sơn pơtă pơtăn mơnuih ƀôn sang khom răng kơđiăng ƀơi anăp tơlơi arăng plư pleč, jak iâu nao mă bruă tui tơlơi pơhing internet lăi ƀong prăk lu, kiăng anăm lê̆ luh ƀing soh sat:

“Mơnuih ƀôn sang kiăng ĕp bruă mă, khom sem lăng tong ten tơlơi pơhing, kiăng mă bruă apah pơ dêh čar tač rơngiao khom kơnang kơ anom bruă mơ̆ng Gơnong bruă wai lăng bruă mă tơhan rơka hăng mơnuih mơnam tơring čar, arăng pơtô brơi rơđah rơđong. Lu sang anŏ hơmâo ană bă hlăk dŏ amăng thun mă bruă kiăng hơmâo tơlơi djru brơi tơlơi pơhing, lăi pơthâo bruă mă djơ̆ lăp rơđah rơđong, thâo plơi pla anih dŏ laih anun hơmâo kơnuk kơna wai lăng, anăm lê̆ luh ƀing hyu plư mă tă tăn, ƀu hơmâo sang anŏ, plơi pla, kơnuk kơna ƀu thâo kơñ răm soh sel đôč”.

Nguyễn Thảo pô cih-Nay Jek: Pơblang