VOV4.Jarai - Ƀơi anăp tơlơi lŏn pơpư̆, tơtar na nao ƀơi tơring glông Kon Plông, tơring čar Kontum, Kơ-iăng Khua dêh čar ta ơi Lê Văn Thành hmâo jao laih kơ Ding jum kơsem min bôh thâo hăng hơdră phrâo măi mok dêh čar git gai pơphun pel ĕp, pơsit lăng bôh than ba truh, rơnoh kơtang hăng amra bơdjơ̆ nao hăng lăi pơthâo kiăng gong gai, mơnuih ƀôn sang thâo gơgrong hlâo bŏng glăi djơ̆, bĕ ngă bral bơngăt amăng mơnuih ƀôn sang. Amăng rơwang hrơi tơjuh rơgao, Grŭp črâo ba bruă pơgang pơgăn ayuh hyiăng ƀu klă ngă dêh čar ta pơjing Grŭp mơnuih hyu mă bruă nao pơ̆ Kontum pel ĕp bôh nik tơlơi, hrom hăng anun pok pơhai bruă gum hrom amăng bruă bŏng glăi hăng lŏn pơpư̆.

Grŭp mơnuih hyu mă bruă mơng Grŭp črâo ba pơgang, pơgăn ayuh hyiăng ƀu klă ngă dêh čar ta hmâo hơduah ĕp bôh nik ƀơi Sang măi hăng kual hlung drai ia pơkĕ apui lơtrik gah hlâu ia Kontum ƀơi 2 bôh să Ngọc Tem hăng Đăk Tăng mơng tơring glông Kon Plông. Hăng jua kơtang pơkă 220MW, dưi kŏng rơbêh kơ 145 klăk met khô̆i ia, drai ia gah hlâu ia Kontum glăk dưi lăng lĕ sa amăng hơdôm bôh than amra đing nao truh bruă đĭ tui hơdôm tal lŏn pơpư̆ hăng anô̆ tơtar hơdôm hrơi jê̆ hăng anai ƀơi kual anai.

Tơlơi lăi pơthâo glăi hăng Grŭp hyu mă bruă, ơi Trần Công Đàm, Khua Sang bruă drai ia pơkĕ apui gah hlâu Kontum, gah Sang bruă drai ia apui lơtrik Vĩnh Sơn – Sông Hinh lăi pơhing, drai ia pơkĕ apui dưi pơkă pơgang lŏn pơpư̆ gưl 7. Lơ 26/2/2020 drai ia pơkĕ apui pơphun kŏng ia. Truh lơ 20/11 thun anun mơn hmâo kŏng bă dơnao ia.

Tơdơi giăm hmâo sa thun truh lơ 8/2/2021 sang măi pơphun čih hmâo tơlơi pơpư̆. Amăng rơwang mơng blan 2 truh blan 5/2021 hmâo lu tal lŏn pơpư̆ tơdơi kơ anun hui tui amăng blan 6, ƀu ƀuh dong tah amăng blan 7, blan 8, truh krah blan 9/2021 hmâo pơpư̆ glăi dong hăng rơnoh kơpal hloh amăng blan 3 hăng blan 4 thun 2022.

Kơnong lơ 18/4 phrâo rơgao hmâo lŏn pơpư̆ prong hloh mơng hlâo truh kơ ră anai hăng 4,5 đô̆ rích te. Amăng hơdôm hrơi hmâo lŏn pơpư̆ ƀơi dơnao kŏng ia glăk hmâo 106 klăk met khô̆i ia, anih tŏng krah ñu ƀơi să Hiếu hăng Pơ̆ Ê, tơring glông Kon Plông ataih mơng sang măi rơbêh kơ 14km hăng ataih mơng dơnao kŏng ia rơbêh kơ 25km. Ơi Trần Công Đàm ba tơbiă tơlơi tui anai:

“Rơgao kơ pel ĕp hăng pơsit bôh nik lĕ hơdôm tal lŏn pơpư̆ anai ƀu hluai tui kơ rơnoh ia amăng dơnao ôh. Sang bruă hmâo gum hrom hăng Anom kơsem min lŏn drŏn dưm truă 3 bôh anom gôm jum dar ring bruă drai ia pơkĕ apui lơtrik gah hlâu ia Kontum kiăng pioh pơkă lăng lŏn drŏn. Tơdơi kơ rim tal hmâo pơpư̆ lĕ Sang bruă leng kơ pơphun hyu pel ĕp ring bruă, ring bruă leng kơ ƀu ƀuh hơget ôh”.

Grŭp hyu mă bruă pel ĕp anih anom dưm truă măi pơkă lŏn drŏn pơpư̆ ƀơi tơring glông Kon Plông

Tơlơi gum pơhiăp mơng khua pơ ala kơ Ding jum sĭ mơdrô, Ding jum man pơdŏng, Grŭp apui lơtrik dêh čar Việt Nam, Sang bruă drai ia apui lơtrik Vĩnh Sơn – Sông Hinh hăng ƀing juăt bruă nao hrom Grŭp hyu mă bruă leng kơ hmâo anô̆ hrom, anun lĕ bruă pơsit bôh than ba truh pơpư̆ lŏn, tơtar lŏn kiăng ngă tui tañ mơtăm, samơ̆ khom kơđiăng hluai tui bôh thâo phrâo. Ƀơi anăp Sang bruă drai ia pơkĕ apui lơtrik gah hlâu ia Kontum gum hrom hăng Anom kơsem min lŏn drŏn yap lăng, kơsem min lăng dưm truă dong sa dua anom pơkă lăng lŏn drŏn. Hăng 3 bôh anom hmâo dưm truă giong wot bruă tô nao rai hăng Anom kiăng hmâo tơlơi pơhing hmao tlôn, djơ̆. Gong gai tơring glông Kon Plông hăng tơring čar Kontum kiăng hmâo jơlan gah bŏng glăi hăng tơlơi kiăng ječ. Bruă kŏng ia amăng dơnao drai ia pơkĕ apui gah hlâu Kontum pơ̆ anăp anai khom dưi yap kơjăp... Ơi Nguyễn Đức Quang, Khua Anom bŏng glăi hăng hơkrŭ glăi anô̆ răm rai yua kơ ayuh hyiăng ƀu klă ngă, Kơ-iăng Khua Anom bruă Grŭp črâo ba pơgang pơgăn ayuh hyiăng ƀu klă ngă dêh čar ta, Khua Grŭp hyu mă bruă gum pơhiăp:

“Akă hmâo hlơi klah čun lŏn pơpư̆ ƀơi anai lĕ yua kơ dơnao ia drai pơkĕ apui lơtrik ôh, samơ̆ khom ƀuh lĕ rơgao kơ hơdôm mrô yap lĕ bruă đĭ tui gah rơnoh hăng rơnoh prong jê̆ hăng anai hmâo tơlơi djơ̆ hrom hăng hrơi kŏng ia mơng dơnao drai ia pơkĕ apui gah hlâu ia Kontum. Anai lĕ sa tơlơi ƀing ta kiăng pel ĕp hăng kiăng kơsem min. Amăng anun hmâo wot hơdôm jơlan gah ƀơi anăp hăng hơdôm jơlan gah sui thun. Ăt ƀuh mơn ƀing ta dô̆ hmâo sa rơwang lui lơi hong amăng bruă pơgang hlôm hlâo ayuh hyiăng ƀu klă ngă, bŏng glăi mơng ƀing ta lĕ črăn gah lŏn pơpư̆. Khă tui tơlơi pơkă ăt hmâo laih, pơtô brơi hmâo. Pơsit lĕ ƀing ta khom gơgrong hlâo, ƀu dưi lui raih ôh”.

Grŭp hyu mă bruă hmâo mă bruă hăng Sang bruă drai ia pơkĕ apui lơtrik gah hlâu ia Kontum

Amăng hrơi blung a mă bruă ƀơi kual phun lŏn pơpư̆, tơtar ƀơi tơring glông Kon Plông, tơring čar Kontum, Grŭp hyu mă bruă mơng Grŭp črâo ba kơ pơgang, pơgăn ayuh hyiăng ƀu klă ngă dêh čar ta ăt hmâo nao pel ĕp lăng laih tơlơi ƀơi kual dơnao drai ia pơkĕ apui gah hlâu ia Kontum gah să Đăk Tăng hăng să Đăk Ring. Mơguah lơ 21/4, Grŭp hyu mă bruă amrra hmâo mông mă bruă hăng grŭp git gai pơgang pơgăn ayuh hyiăng ƀu klă ngă hăng hyu ĕp mơnuih hmâo tơlơi truh tơring čar Kontum.

Ăt amăng rơwang hrơi tơjuh rơgao mơn, Anom bruă Kơnuk kơna hmâo hră pơ-ar lăi glăi tơlơi gum pơhiăp črâo ba mơng Kơ-iăng Khua dêh čar ta ơi Lê Văn Thành kơ pơsir lŏn pơpư̆ ƀơi kual tơring glông Kon Plông, tơring čar Kontum. Kiăo tui anun, Kơ-iăng Khua dêh čar ta ơi Lê Văn Thành jao kơ Anom kơsem min bôh thâo phrâo hăng hơdră phrâo măi mok Việt Nam črâo ba Anom kơsem min lŏn drŏn ngă tui dong bruă pơkă lŏn drŏn, lăng tui lŏn pơpư̆ ƀơi kual phrâo lăi anun, lăi pơhing hmao tlôn kơ hơdôm bôh ƀirô hăng mơnuih ƀôn sang thâo kiăng gơgrong hlâo bŏng glăi djơ̆ hloh.

Hơdôm Ding jum: Sĭ mơdrô, Đang hmua hăng pơđĭ kyar ƀôn lan dêh čar, Jơlan nao rai dŭ pơgiăng črâo ba lăng tui, pơsit, gơgrong hlâo pok pơhai hơdôm bruă pơhlôm klă dơnao ia bơnư̆ drai pơkĕ apui, hnoh ia hăng ring bruă jơlan nao rai amăng kual amra bơdjơ̆ nao yua kơ lŏn pơpư̆, ƀu pioh hmâo tơlơi truh kah mơng thâo, ƀu pơhlôm kơ ring bruă./.

Khoa Điềm: Čih – Siu H’ Prăk: Pơblang