VOV4.Jarai - Mơguah lơ 7/7, 5 čô mơnuih amăng grup hlăk ai ƀơi plơi Kloong, să Ia O, tơring glông Ia Grai, tơring čar Gia Lai arăng ba sĭ pơ dêh čar Kur hơmâo ba glăi truh laih pơ tơring čar Gia Lai. Đại tá Trần Thanh Bình - Kơ-iăng Khua anom bruă git gai tơhan wai pơgang guai tơring čar Gia Lai brơi thâo, 5 čô mơnuih anai lĕ Puih Đại (thun tơkeng 1998), Puih Môi (2004), Ksor Jối (2004), Puih Chiêu (2003) Ksor Gum (1999). Ƀing pô anai hrŏm hăng Kpuih Thái (1994) hăng Kpuih Phú (2006) hơmâo arăng pơklaih ba glăi amăng lơ 3/7 hăng 4/7 laih rơgao, ƀing gơñu yua Trần Quang Quyết (2001, dŏ ƀơi să Ia Dal, tơring glông Ia Hdrai, tơring čar Kon Tum) plư ba nao sĭ pơ dêh čar Kur amăng 2 hrơi lơ 20 hăng 21/6/2022 laih rơgao.

5 čô mơnuih arăng pơklaih, jao glăi anom bruă tơhan wai pơgang guai Việt Nam tlam lơ 6/7 ƀơi amăng jang Mộc Bài - Tây Ninh

Lơ 5/7 laih rơgao, Puih tơhan wai pơgang guai Ia O (anom bruă git gai tơhan wai pơgang guai tơring čar Gia Lai) ăt hơmâo ƀom kiơng bruă sĭ dŏp mơnuih, laih dong  jao glăi hră pơ-ar hăng pô ngă soh lĕ Trần Quang Quyết brơi kơ anom bruă tơhan pôlih, kông ang tơring čar Gia Lai tŏ tui pel ĕp ngă rơđah.

Siu Đoan: Pơblang