VOV4.Jarai - Hrơi blan giăm anai, ƀơi tơring čar Gia Lai juăt ƀuh lu wŏt mơnuih djai yua kơ ia ƀlung, lu hloh lĕ ƀing čơđai. Bruă truh sat anai kiăng anom bruă bơdjơ̆ nao, mơnuih mơnam hăng djop sang anŏ đing nao ƀiă dong amăng bruă wai pơgang brơi ƀing čơđai, biă mă ñu amăng bơyan pơdơi prong anai.

Amăng sang ƀơi ƀut plơi 2, să Trà Đa, plơi prong Pleiku, amai Nguyễn Thị Thanh Hương ƀô̆ mơta hning rơngŏt lăng nao rup ană đah rơkơi phrâo rơngiă yua kơ ia ƀlung ƀơi plơi Tây Hồ, să Bàu Cạn, tơring glông Čư̆ Prông amăng lơ 14/6 laih rơgao. Amai Hương brơi thâo, tơlơi truh sat anai yua kơ sang anŏ aka ƀu hơmâo prăk kak ba ană bă nao hrăm luai ia hăng pơtô hrăm kiăng thâo pơgang hŭi kơ ia ƀlung.

“Phrâo anai sang anŏ brơi ano glăi ngui pơ ơi yă, lơ̆m glăi ngui hơmâo ană met ñu, dua gơñu ngui juăt biă mă. Lơ 14/6 laih rơgao lơ̆m nao đă boh lông mơ̆ ƀu hơmâo hlơi ôh, tơdơi anun dua gơñu nao mơnơi ƀơi dơnao giăm anun, yua kơ bor lê̆ trun amăng dơnao dơlăm 7 met laih anun ia ƀlung. Sang anŏ ƀu hơmâo prăk kak kah hăng hrơi mông, ƀing gơmơi mă bruă glêh glar aka ƀu hơmâo mông ba ƀing gơñu nao hrăm luai ia, kơnong ngui jum dar sang đôč”.

Bruă ia ƀlung glăk lĕ bruă ba truh tơlơi truh sat kơ ƀing čơđai muai ƀơi tơring čar Gia Lai, pioh glăi tơlơi hning rơngŏt kơ lu sang anŏ. Yua anun, bruă pơđĭ kyar pơtô hrăm luai ia hăng hơdôm tơlơi thâo thăi kiăng pơgang hŭi kơ ia ƀlung brơi ƀing čơđai hăng mơnuih mơnam lĕ kiăng hloh, tơlơi anai kiăng hơmâo tơlơi đing nao mơng djop gưl, gơnong bruă, sang anŏ hăng abih bang mơnuih.

Lu sang hră ƀơi Gia Lai pơtô brơi čơđai hrăm luai ia

Mơng akŏ blan 6/2022, Gơnong bruă gru grua, bơrơguăt drơi jăn hăng tuai čuă ngui tơring čar Gia Lai gum hrŏm hăng hơdôm anom bruă bơdjơ̆ nao pơphun hrơi Olympic brơi ƀing čơđai hăng pơphun hrơi abih bang mơnuih hrăm luai ia, pơgang hŭi kơ ia ƀlung. Ƀing čơđai hơmâo arăng pơtô hrăm hăng črâo brơi hơdôm boh tơhnal: Boh thâo djru brơi hmao tlôn lơ̆m ƀuh mơnuih ia ƀlung; hơdôm bruă pơjrao ječ brơi mơnuih ia ƀlung; boh thâo lơ̆m ƀuh mơnuih ol gơnam, măt gơnam ƀong huă…Amon Bạch Thị Mai Uyên, čơđai hrăm anih 8, Sang hră gưl dua Nguyễn Du, plơi prong Pleiku brơi thâo: Hơdôm bruă mă amăng bơyan pơdơi prong anai lêng kơ yôm hloh. Amăng anun, luai ia lĕ tơlơi hrăm ƀing čơđai amra gir run hrăm hloh:

“Kâo hơmâo ƀing nai pơtô brơi bruă pơgang hŭi kơ ia ƀlung, mơng anun kâo thâo hluh dong, tơlơi găn rơgao, tơdah bưp tơlơi truh sat amăng tơlơi hơdip kâo ăt rang kơđiăng pơgang hĭ hăng thâo djru brơi abih bang mơnuih. Mơng bơyan pơdơi prong anai kâo amra ruah hrăm luai ia lĕ tơlơi hrăm kiăng kơ bơrơguăt drơi jăn, pơhlôm brơi tơlơi suaih pral. Kâo ăt lăi pơthâo brơi abih bang mơnuih, khŏm nao  hrăm luai ia kiăng pơhlôm brơi tơlơi suaih pral brơi kơ ta pô laih dong kiăng pơgang hŭi kơ ia ƀlung”.

Ơi Trần Ngọc Nhung - Khua gơnong bruă gru grua, bơrơguăt drơi jăn hăng tuai čuă ngui tơring čar Gia Lai brơi thâo, tơring čar glăk prap lui pơtrut bruă pơtô brơi abih bang mơnuih hrăm luai ia, pơgang hŭi kơ ia ƀlung. Hơnong pơkă truh thun 2025, amra hơmâo 50% mrô čơđai mơng 6 truh pơ gŭ 16 thun lêng kơ thâo pơgang drơi jăn lơ̆m mơnơi amăng ia.

“Bruă pơtô hrăm luai ia amăng abih bang mơnuih, sit biă ñu brơi kơ ƀing čơđai lĕ bruă kiăng hloh. Bruă ia ƀlung ƀuh ƀơi ƀing čơđai anet amăng hrơi blan laih rơgao amăng đơ đam dêh čar hăng amăng tơring čar Gia Lai ngă bơngŏt biă mă. Abih bang mơnuih, djop khul grup kơđi čar mơnuih mơnam, djop gong gai ƀon lan kiăng hluh rơđah, gơgrong mơng ƀing gơñu amăng bruă pơtô hrăm brơi čơđai luai ia, kiăng kơ ƀuh ƀiă hloh mơnuih bưp tơlơi truh sat yua kơ ia ƀlung”.

Mơng akŏ thun truh ră anai, đơ đam tơring čar Gia Lai ƀuh 17 wŏt bruă ia ƀlung ngă 23 čô čơđai djai. Sit biă ñu mơng bơyan pơdơi prong truh giăm anai ƀuh 5 wŏt bruă ia ƀlung ngă kơ 7 čô čơđai djai. Lu čơđai djai yua ia ƀlung yua ƀing čơđai aka ƀu thâo amăng bruă pơgang hŭi kơ ia ƀlung hăng nao ngui ter hang ia krông čroh hnoh mơ̆ ƀu hơmâo mơnuih pơprong kiăo tui lăng.

Kiăng kơ pơgang hŭi kơ ia ƀlung brơi ƀing čơđai tŭ yua hloh kiăng biă mă tơlơi gum tơngan hrŏm mơng abih bang mơnuih, rĭm boh sang anŏ kiăng đing nao ƀiă dong amăng bruă pơgang hăng wai lăng ƀing čơđai, biă mă ñu amăng bơyan pơdơi prong kiăng kơ bĕ hĭ hơdôm tơlơi truh sat ƀuh ƀơi ƀing čơđai, sit biă ñu ia ƀlung. Ơi Võ Như Minh Quang - Khua anom bruă pơgang, wai lăng čơđai hăng bơkơnar đah rơkơi đah kơmơi - Gơnong bruă mă, tơhan rơka hăng mơnuih mơnam tơring čar Gia Lai brơi thâo:

“Kiăng lăi nao sit nik bruă pơtô brơi boh thâo pơgang drơi jăn kơ ƀing čơđai glăk ƀiă đôč, bruă pơtô brơi čơđai hrăm luai ia amăng sang hră aka ƀu pơphun hăng ngă tui tŭ yua, yua anun ră anai bruă mơnuih ia ƀlung ăt dŏ ƀuh na nao. Kiăng kơ gir run ngă hiưm pă pơtô pơblang tơl rĭm boh sang anŏ, abih bang mơnuih kiăng kơ thâo hluh rơđah dong amăng bruă pơgang drơi jăn hŭi kơ ia ƀlung ƀơi ƀing čơđai. Hơdôm dơnao ia, ia krông čroh hnoh pioh pruih brơi phun pla amuñ ba truh tơlơi truh sat khŏm dưm kơƀang pơhŭi hlâo. Tơdah dưi ba čơđai nao ngui ƀơi hơdôm dơnao mơnơi, kiăng kơ hrăm boh thâo pơgang drơi jăn brơi kơ ƀing gơñu”.

Hăng tơlơi gir run mơng gơnong bruă bơdjơ̆ nao, pơtrut kơtang amăng pơtô pơblang rah, kơtưn pơtô hrăm brơi boh thâo, amra pơgôp yôm phăn amăng bruă pơgang hŭi kơ ia ƀlung brơi kơ ƀing čơđai. Hrŏm hăng anun, kiăng tơlơi đing nao, wai pơgang brơi mơng ƀing amĭ ama, kiăng kơ bĕ hĭ tơlơi truh sat yua kơ ia ƀlung.

Siu Đoan: Pơblang