Jơnum hơmâo pơčrong sai akŏ bruă dăp glăi, pơphun anih mă bruă kơnuk kơna gưl să, amra pơphun mă bruă sit nik amăng hơdôm blan pơ anăp. Tui hăng akŏ bruă, tơring čar pơhrŏ hĭ mơ̆ng 218 boh sang bruă gưl să, truh dŏ 77 boh să, hơmâo 8 boh phường, 69 boh să. Anom bruă ping gah tơring čar Gia Lai jao kơ Jơnum min mơnuih ƀôn sang tơring čar pok pơhai ngă tui hơdôm yak, djơ̆ tơlơi phiăn pơtrun.

Dưi thâo tơdơi kơ tơlơi bơngơ̆t ƀu mơak ôh blung a, ră anai, khua mua, mơnuih ping gah ƀơi plơi pla amăng tơring čar Gia Lai hơmâo prăp lui yơh bruă či ngă kiăng ngă pơgiong tơhnal pơtrun laih dăp glăi, pơpha bruă mă amăng gưl să, gưl tơring čar.