Ơi Phạm Anh Tuấn - Khua jơnum min mơnuih ƀôn sang tơring čar Gia Lai pơsit Gơnong bruă čar tơring čar lăng glăi abih hră pơ-ar, ƀang hrăm mơ̆ng ƀing khua mă bruă tơdu ƀudah ƀu dưi ngă tui bruă jao phrâo. Mơ̆ng bruă sem lăng brơi ƀuh 100% čô khua, mơnuih mă bruă ƀơi să, phưòng leng kơ hrăm cao đẳng, đại học truh kơ prong hloh, hơmâo pơtô pơjuăt klă yơh.

Ră anai, tơring čar Gia Lai kah pơpha gưl ngă bruă kơtang biă hăng akŏ pơdong bruă ngă ƀơi să, phường kah hăng “sa boh tơring čar anet”. Khua Jơnum min mơnuih ƀôn sang tơring čar lăi kiăng “pơđĭ kơtang bruă mă, mă bruă lu hloh, hơdeč hloh, ngă truh abih bruă ƀu djơ̆ abih mông ƀudah kiăo tui hrơi pơdơi ôh”. Kơ hơdră pơsir, Jơnum min mơnuih ƀôn sang tơring čar Gia Lai pơkra glông krăp lăng bruă mă (KPI) tong ten aka ƀu hơmâo djơ̆ ôh mơ̆ng hlâo. Hơdôm rơnoh pơkă bơwih ƀong - mơnuih mơnam hơmâo kah pơpha pơ rim să, phường, rim bruă mă, rim djuai phun pla, hlô rông, pơmut hrŏm hră him hlâo, pơtô brơi rơđah rơđông. Amăng blan 12/2025, tơring čar iâu khua ping gah hăng khua jơnum min djŏp sang să, phường lăi pơthâo “hơdră git gai” kiăng khua mua tơring čar hrŏm hăng hơdôm gơnong bruă, anom bruă pơgôp hiăp brơi, čih pơkra giong hlâo či ngă tui. Tơdah hơdôm boh tơring aka ƀu djơ̆ tui hăng tơlơi kiăng, tơring čar khŏm plih hĭ mơnuih ngă bruă đôč yơh.