VOV4.Jarai - Ƀơi anăp bruă nua ia săng, ia jâo pơmă, prăk apah rơdêh pơdŭ pơgiăng mơng lu anom bơwih ƀong ƀơi Gia Lai khŏm pơplih tui kiăng djơ̆ hrŏm mơn.

Ơi Châu Văn Liên (ƀut plơi 2, phường Hội Phú, plơi prong Pleiku) blơi sa pok wĕ rơdêh mơng sang rơdêh Thuận Tiến mơng Pleiku nao pơ ƀon prong Hồ Chí Minh hăng nua 350 rơbâo prăk. Ơi Liên brơi thâo, pơhmu hăng 4 blan hlâo, prăk đĭ rơdêh đĭ thim 50 rơbâo prăk dong. Nua wĕ rơdêh đĭ jing bơbeč djơ̆ mơn kơ ƀing tuai, samơ̆ djŏp mơnuih khŏm thâo hluh, pap mơñai yơh yua nua ia săng ia jâo đĭ kơtang đơi, ngă kơ lu anom bruă pơdŭ pơgiăng tuai tơnap tui mơn. Ơi Châu Văn Liên brơi thâo:“Hlâo adih nua ia săng kơnong rơbêh kơ 20 rơbâo đôč sa lit, bơ ră anai đĭ giăm 34 rơbâo laih. Anom bơwih ƀong arăng sĭ mơdrô kiăng ƀong lơi mơn. Phrâo rơgao, klin kheng ngă kơ anom bơwih ƀong pơgiăng tuai tơnap mơn, tui hăng nua ia săng đĭ, arăng mă prăk rơdêh đĭ tui mơn, kâo lăng tui anun djơ̆ lăp mơn, huăi gơget lơi”.

Kông ti pơdŭ pơgiăng Thuận Tiến pơsit nua phrâo tơdơi kơ pơplih ming.

Lăi nao bruă pơplih nua wĕ rơdêh, ơi Nguyễn Hồng Hải - Khua kông ti TNHH pơdŭ pơgiăng Hồng Hải brơi thâo: Tơdơi kơ sui blan pơdơi nao rai yua klin Covid-19. Anom bruă kiăng djă bong hơđong nua wĕ rơdêh kiăng hơmâo tuai đĭ rơdêh. Samơ̆, tơdơi kơ klin tơdu lĕ nua ia jâo dong pơmă đơi, tuh ia jâo nao rai rơngiă lu prăk hloh jing khŏm mă prăk wĕ pơmă hloh mơn.

“Mơng anai nao pơ ƀon prong Hồ Chí Minh pơđuăi abih 400 lit ia jâo, hlâo adih gơmơi mă prăk rơdêh 300 rơbâo lơ̆m sa pok wĕ, bơ mông anai ia jâo truh kơ 31 rơbâo, pơmă giăm 2 wơ̆t, gơmơi kơnong pơđĭ mă 50 rơbâo prăk đôč mơn yua dah mơnuih ƀon sang hlơi hlơi lêng kơ tơnap soh yơh. 400 lit ia jâo nao rai abih 12 klăk prăk ƀơ̆i, bơ nao rai pơ BOT, apah prăk pô mơgat, prăk prah nao rai pơ dua graih rơdêh, abih bang lêng kơ tơnap tui anun soh anun jing ƀing ta thâo hluh nao rai yơh”.

Ăt bơdjơ̆ nao bruă pơplih nua wĕ rơdêh mơn, yă Trần Thị Ánh. Kơ-iăng khua kông ti TNHH Mai Linh Gia Lai lăi: Bruă pơplih prăk wĕ lĕ jing bruă ƀu thâo anŏ ngă dong tah mơng anom bơwih ƀong pơdŭ pơgiăng tuai lơ̆m nua ia săng ia jâo pơmă. Khă hnun, anom bruă ăt pơplih nua lăp djơ̆ mơn, kiăng mơnuih đĭ rơdêh hăng anom bơwih ƀong lăng djơ̆ pran.

“Ƀơi anăp bruă ia săng ia jâo pơmă tui ră anai, anom bơwih ƀong khŏm pơplih ming laih prăk đĭ rơdêh. Anom bruă pơđĭ nua phrâo anai hloh lĕ amăng lơ 20/6, đĭ 16% pơhmu hăng hlâo adih. Tơdơi kơ klin kheng tơnap tap lu yơh, lơ̆m ia săng pơmă tui anai, khŏm ngă anom bơwih ƀong pơđĭ nua yơh, nua pơmă tui samơ̆ anom bơwih ƀong bơngơ̆t mơn, samơ̆ hiư̆m mơng ngă dong, kiăng dưi bơwih ƀong lĕ khŏm đĭ yơh”.

Mơng akŏ thun truh ră anai, nua ia săng, ia jâo amăng dêh čar ta hơmâo 12 wơ̆t pơđĭ nua laih, 3 wơ̆t trun hăng nua ră anai glăk pơmă hloh kơ mơng hlâo. Kiăng dưi bơwih ƀong, 25 anom bơwih ƀong pơdŭ pơgiăng tuai nao rai pơ tơring čar pơkŏn, anom bơwih ƀong taxi ƀơi Gia Lai lêng kơ pơđĭ prăk wĕ. Rơnoh pơplih nua wĕ mơng hơdôm anom bơwih ƀong pơgiăng tuai tal anai lĕ 15%.

Lu anom bơwih ƀong pơgiăng tuai khŏm pơđĭ prăk wĕ yua ia săng ia jâo pơmă.

Tui hăng Gơnong bruă wai lăng jơlan pơdŭ pơgiăng tơring čar Gia Lai, anom bơwih ƀong hơmâo mă laih hră pơplih prăk wĕ mơng abih bang anom bơwih ƀong pơdŭ pơgiăng tuai ƀơi tơring čar. Tơdơi kơ hơmâo mă hră, Gơnong bruă kiăng hơdôm anom bruă kơđŏm, mă prăk djơ̆ tui nua wĕ hơmâo lăi pơthâo, bruă pơplih nua wĕ khŏm djơ̆ hăng prăk ia jâo ră anai mơn...Ơi Nguyễn Bá Minh, Kơ-iăng khua Anom dưm dăp akŏ bruă - Prăk kăk - Pơdŭ pơgiăng - Gơnong bruă wai lăng jơlan - pơdŭ pơgiăng tơring čar Gia Lai brơi thâo:“Lơ̆m hơmâo hră pơdah thâo mơng hơdôm anom bruă lĕ gơmơi kiăng anom bruă anun pơsit hlao, mă prăk djơ̆ hăng mrô hơmâo lăi pơthâo mơtăm. Laih dong git gai hơdôm graih rơdêh, mơnuih apăn bruă anai khŏm hyu pel ĕp, krăp lăng bruă mă prăk rơdêh mơng hơdôm anom bơwih ƀong đah mơng djơ̆ hăng tơlơi phiăn dêh čar ta”.

Hoàng Qui: Čih - Siu H’Mai: Pơblang