Abih bang amăng tơring čar hơmâo akŏ pơjing 6000 hơbô̆ bruă anăn “Pơtô lăi jĕ giăm ană plơi thâo rơgơi” amăng djop mơta bruă, hơmâo ba glăi boh tơhnal hiam klă ƀuh rơđah hăng bang bơngač prong tui. Amăng bruă pơđĭ kyar bơwih ƀong huă mơnuih mơnam hơmâo hơbô̆ bruă ba gru kah hăng : “Rông rơmô tuh ană”, “Pla rơ̆k rông bê djuai phrâo”, “Pla kơphê plah wah phun boh troh”, “Tŭi apui bơngač jơlan plơi pla”, ƀudah “Hlăk ai pơyơr pran jua pơblih yua mrô”.

Amăng bruă pơgang rơnuk rơnua lŏn ia, ƀuh rơđah hơbô̆ bruă kah hăng “Plơi pla pơgang mă pô tơlơi rơnuk rơnua hơđong”, “Hlăk ai kơsung nao ngă hrŏm pơgang rơnuk rơnua, hơđong, pơhlôm pơgang apui ƀong sang, pơklaih mơnuih amăng mông ječ ameč”....Hơdôm hơbô̆ bruă anun hơmâo pơđĭ tui gơgrong ba mơ̆ng ƀing khua mua, ling tơhan hăng mơnuih ƀôn sang djru kơ bruă pơđĭ kyar bơwih ƀong huă, pơgang kơjăp tơlơi rơnuk rơnua hơđong.