VOV4.Jarai - Lơ 29/3, tơring glông Čư̆ Sê, tơring čar Gia Lai pơphun nao mơyut yôk, ba pơyua 2 ƀer tơlang tơhan djai pơsăn drơi kơ lŏn ia (ƀu thâo anăn ôh), hơmâo ƀuh ƀơi đang hmua mơng sa boh sang anŏ ƀơi plơi Phú Cường, să Ia Pal. Tơdơi kơ mông mơyut hơmâo pơphun ƀơi Jơnum min mơnuih ƀon sang să Ia Pal, arăng ba dor 2 tơlang tơhan ƀơi pơsat tơhan tơring glông Čư̆ Sê. Amăng mông yôk atâu, khua mua ping gah, gong gai, tơhan blah ngă hăng mơnuih ƀon sang dưm bơnga, tŭ ñang hơ-ŭ bơni tuh rơyuh pran jua kơ tơlơi djai brŭ mơng ling tơhan amăng bruă akŏ pơdong hăng pơgang Lŏn ia.

Tơhan blah ngă ba tơhan djai pơsăn drơi glăi đih pơdơi ƀơi Pơsat tơhan tơring glông Čư̆ Sê

Hlâo kơ anun, amăng lơ 26/3, Jơnum min mơnuih ƀon sang să Ia Pal hmư̆ arăng lăi hơmâo 2 ƀer tơlang mơnuih lơ̆m sang anŏ ñu čuk lŏn ƀơi plơi Phú Cường, să Ia Pal pioh pơdong sang dŏ. Tơdơi kơ hmư̆ hing, anom apăn bruă tơring Čư Sê hơmâo nao lăng, kuăi pơƀut tơlang. Pơhmu hăng hơdôm tơlơi mơnuih ƀon sang lăi pơthâo, dram gơnam, hrŏm hăng pơčrang lăng tong ten dong, ƀing apăn bruă pơsit anai lĕ tơlang tơhan djai mơng rơnuk blah ayăt Mi; laih dong gơñu mă čơđeh tơlang ba pơčrang AND tui tơlơi phiăn.

Siu H’Mai: Pơblang