Mơguah lơ 28/7, Grŭp djuai ania tơring čar Gia Lai pơphun Jơnum bưp ƀô̆ mơta, bơni mơnuih hmâo arăng đăo gơnang mơbruă amăng kual neh wa djuai ania ƀiă ƀơi tơring čar Gia Lai rơwang mơ̆ng thun 2021-2023. Đơ đam tơring čar Gia Lai ră anai hmâo 955 čô tha plơi, mơnuih hmâo arăng đăo gơnang mơbruă amăng kual neh wa djuai ania ƀiă. Ngă tui bruă mă, bruă gơgrong hăng plơi pla, mơnuih hmâo arăng đăo gơnang ƀơi Gia Lai hmâo ngă tui klă laih bruă mă mơ̆ng pô amăng pơsur plơi pla ngă tui bruă pơđĭ kyar bơwih ƀong - mơnuih mơnam, gum hrŏm wai lăng tơlơi rơnuk rơnua amăng plơi pla.

Rơđah biă ñu amăng rơwang mơ̆ng thun 2021-2023, hơdôm mơnuih hmâo arăng đăo gơnang mơbruă ƀơi Gia Lai gum hrŏm klă na nao hăng hơdôm grŭp gơnong bruă ƀơi plơi pla lăi pơhing, pơsur mơnuih ƀôn sang gum hrŏm pơčruh, djru klă amăng bruă “Abih bang mơnuih ƀôn sang gum hrŏm hơbit pơdŏng plơi pla phrâo, plơi prong thâo rơgơi” hăng rơbêh kơ 700 klai prăk, pĕ pha rơbêh kơ 132.000 m2 lŏn hăng pơčruh rơbêh kơ 47 rơbâo hrơi bruă. Hrŏm hăng anun, mơnuih hmâo arăng đăo gơnang djru ba tơbêh kơ 20.000 bôh sang anô̆ neh wa djuai ania ƀiă pơplih tơlơi pơmin, hơdră ngă amăng bruă mă, ngă đang hmua, hrưn đĭ tơtlaih mơng ƀun rin. Tơring čar Gia Lai čang rơmang pơ̆ anăp anai, mơnuih hmâo arăng đăo gơnang ngă tui hloh dong bruă mă mơng pô, pran arăng đăo gơnang kơ pô, pơsur kơnung djuai, plơi pla gum hrŏm pơđĭ kyar bơwih ƀong – mơnuih mơnam, pơdŏng Ping gah hăng glông bruă kơđi čar; djă pioh hơđong tơlơi rơnuk rơnua, pơdŏng pran gum hrŏm hơbit djop djuai ania./.