VOV4.Jarai - Mơguah lơ 27/7, ƀơi plơi prong Pleiku, Jơnum min mơnuih ƀon sang tơring čar Gia Lai pơphun Jơnum bưp ƀô̆ mơta ƀing mơnuih djru hơkrŭ ba gru ƀrô tal hơdor glăi 75 thun hrơi tơhan rơka, tơhan djai pơsăn drơi. Nao jơnum tal anai hơmâo 75 čô khua mua, hăng 2 čô amĭ Việt Nam sông kơtang, 1 čô tơhan sông kơtang hrŏm hăng ƀing tơhan rơka, sang anŏ tơhan djai pơsăn drơi mơng abih bang 12 rơbâo čô mơnuih dưi tŭ mă hơdră djru brơi mơnuih djru hơkrŭ ƀơi tơring čar Gia Lai. Amăng mông bưp, ƀing khua mua hơmâo hơdor glăi gru grua hing ang mơng djuai ania ta amăng rơnuk blah wang.

Jơnum min mơnuih ƀon sang tơring čar Gia Lai jao hră pơpŭ bơni brơi mơnuih djru hơkrŭ thun 2022

Khua mua tơring čar Gia Lai ăt pơdah pran pơpŭ bơni hăng hơdor tơngia sang anŏ tơhan djai pơsăn drơi, ƀing mơnuih djru hơkrŭ. Mơng thun 2017 truh ră anai, Gia Lai hơmâo djru pơkra ming, man pơdong phrâo rơbêh 2.000 boh sang brơi kơ mơnuih djru hơkrŭ ƀun rin, hăng rơbêh 73 klai prăk. Pơphun čem rông, pơjrao brơi tơlơi ruă kă brơi rơbêh 20 rơbâo čô mơnuih djru hơkrŭ hăng rơnoh prăk 22 klai. Hơmâo 14 čô amĭ Việt Nam sông kơtang dŏ hơdip hơmâo man pơdong brơi sang hăng hơmâo hơdôm anom bruă djru čem rông truh djai ba…

Siu Đoan: Pơblang