VOV4.Jarai-Abih bang čơđai sang hră hơdôm tơring čar amăng kual Dap Kơdư pơwơ̆t glăi pơ sang hră laih tơdơi kơ pơdơi hĭ yua klin kheng covid 19 ngă. Anom bruă pơtô hrăm pơtrut djop gong gai plơi pla pơtum pơtô ngă kjăp glăi tơlơi thâo kơ čơđai, kiăng hơmâo boh tŭ yua amăng bruă pơtô hrăm, laih dơ̆ng tuh pơ alin pơhrua dơ̆ng gơnam yua pơtô hrăm amăng anih, kiăng bruă pơtô hrăm hơmâo boh tŭ yua klă hloh.

Amăng glông mơnuih lu mut tơbiă kơniă amăng jang sang hră gưl sa Nguyễn Công Trứ, phường Tân Lập, plơi prong Ƀuôn Ma Thuột, amai Trương Thị Ngọc Ánh ba ană ñu mut sang hră anih sa, hăng lu tơlơi pơmin mơ̆n:

“Ba ană nao sang hră mơak mơ̆n samơ̆ ăt bơngơ̆t rah. Hrŏm hăng anun, ăt hŭi yua kơ ană dŏ anet laih anun aka ƀu tlâ̆o pơgang vaccine ôh. Čang rơmang hăng tơlơi prăp lui tong ten mơ̆ng sang hră ană bă amra hrăm hră, găn rơgao thâo thăi klă ƀơi sang hră”.

Čơđai sang hră gưl sa Nguyễn Công Trứ-Ƀuôn Ma Thuôt

Gah sang hră lĕ, pơtô ƀơi anăp mơtam hơdôm hrơi blan dŏ glăi amăng sa thun hrăm  yôm biă mă, kiăng ngă kjăp glăi tơlơi thâo thăi kơ ƀing čơđai sang hră, boh nik ñu hăng čơđai sang hră anih 1 hăng anih 5, tơdơi kơ sa thun hrăm lu blan dŏ hrăm pơ sang đôč. Tui hăng yă Bùi Thị Hương, khua sang hră gưl sa Nguyễn Công Trứ,  kiăng pơtô hrăm ƀơi anăp klă hiam, sang hră đing nao biă mă kơ bruă pơhlôm, pơgang klin:

“Ƀing gơmơi hơmâo pơtô lăi kơ abih bang ƀing nai pơtô brơi pơtô glăi tong ten tơlơi hrăm kơ čơđai sang hră, hơdôm tơlơi hrăm mơ̆ng akŏ thun hrom hăng hơdră pơtô tơlơi hrăm djơ̆ hrơi mông tŏ tui amăng rĭm rơwang hrơi tơjuh dŏ glăi. Amĭ ama čơđai sang hră khŏm ngă hrŏm ha pran jua, ƀing nai pơtô run ran abih pran jua mơ̆n pioh kơ ană bă hrăm kiăo tui hmao hơdră gơñu hră sa thun tŭ yua klă hloh”.

Hăng čơđai sang hră hrăm gưl muai, aka ƀu dưi nao pơ sang hră giăm ha thun hrăm phrâo rơgao lĕ, kơƀah prong biă mă, boh nik ñu čơđai 5 thun kiăng pơtô hrăm ƀư̆ pơkra tơlơi thâo thăi lu mơta hlâo kơ mut anih 1. Amăng anun, čơđai 5 thun ƀơi djop plơi pla mơnuih ƀôn sang djuai ƀiă kiăng hrăm tong ten tơlơi Việt jing tơlơi yuan hnun kah dưi thâo tŭ mă tơlơi hrăm tŏ tui. Yua kơ anun, djop sang hră gưl muai ƀơi Dak Lak lêng kơ hơmâo bruă pơtô hrăm tơlơi Yuan lu hloh kơ ƀing čơđai pơ anăp anai. Nai pơtô Đặng Thị Tuyến, khua sang hră gưl muai Tân Lập, plơi prong Ƀuôn Ma Thuôt brơi thâo:

“Anih hrăm hơmâo mơnuih djuai ƀiă brơi sa čô nai mơnuih djuai ƀiă mơ̆n pioh pơtô kiăng thâo tơlơi Yuan kơ čơđai hrăm hră gêh găl hloh. Lơ̆m čơđai pơhiăp tơlơi lar aka ƀu hruaih ôh hơmâo nai Yuan pơtô, čơđai amra ƀu thâo hluh đơi ôh, nai pơtô mơnuih djuai ƀiă pơblang brơi hăng tơlơi pơhiăp djuai ania pô dơ̆ng, pioh kơ čơđai thâo hruaih tơlơi lar hăng gêh găl yơh mut hrăm anih 1”.

Čơđai sang hră ƀơi Ƀuôn Ma Thuôt hok mơak glăi hrăm pơ sang hră

Bơ ƀơi tơring glông Đak Pơ, tơring čar Gia Lai hơmâo ba yua rơbêh 1 klai 600 klăk prăk blơi yua gơnam mă bruă, pơtô hrăm kiăng djop brơi hơdră pơtô hrăm. Nai Thái Thị Cẩm Linh, pơtô tơlơi pơhiăp tač rơngiao sang hră gưl sa Trần Phú, să Tân An, tơring glông Đak Pơ brơi thâo, sang hră anai tuh pơ alin man pơkra sang hră, anih hrăm thâo rơgơi, dưm truă 21 boh măi komputer, măi pơdah rup hăng pơnăng jŭ rơgơi.

Mơ̆ng anun, hơdră pơtô hrăm anai djru bruă pơtrut tui boh tŭ yua kơ sang hră. Mơ̆ng anun, djru hrŏm pơtô hrăm amăng sang hră ba glăi tŭ yua klă hiam. Ƀing čơđai sang hră hrăm ăt hur har tui mơ̆n, nai pơtô pơtô brơi tơlơi thâo thăi kơ čơđai lu hloh mơ̆n.

“Kâo ƀuh gêh găl biă mă kơ bruă pơtô hrăm. Jua pôr, pơdah rup klă djru bruă pơtô amuñ, čơđai tañ thâo hluh laih anun amuñ mơ̆n. Măi mok dưm truă djop, gêh găl kơ gơmơi mă yua djơ̆ hăng bruă kiăng pơtô”.

Amăng gơnam yua pơtô hrăm mơ̆ng sang hră Trần Phú dŏ klă đôč, anih hrăm hơmâo 40 boh măi komputer, hrom hăng pơnăng pơdah rup, măi pơčrang rơgơi mơ̆ng sang hră Chu Văn An răm tui ha mơkrah. Kiăng pơhlôm pơgang klă kơ bruă pơtô hăng hrăm, čơđai sang hră khom dŏ hrŏm pơtlep dua, klâo čô mă yua hrŏm sa boh măi komputer. Nai pơtô Nguyễn Cao Trí, Khua sang hră Chu Văn An, tơring glông Đak Pơ brơi thâo:

“Lơ̆m aka ƀu djop prăk blơi hăng pơkra ming gơnam yua hrăm hră pioh pơkra ming na nao lĕ ăt mă yua hơdôm boh măi răm samơ̆ dŏ thâo yua ăt khŏm mă yua pioh pơtô kơ čơđai sang hră. Samơ̆, lu măi pơnăng pơdah sui thun laih mă yua ƀu klă đơi ôh".

Čơđai sang hră gưl sa Trần Phú, să Tân An, tơring glông Đak Pơ, Gia Lai

Hơdôm thun rơgao, djop sang hră pơtô hrăm pơ Đak Pơ, tơring čar Gia Lai hơmâo prăp lui akŏ bruă wai lăng, mă yua anih hrăm pơtô hăng gơnam yua mă bruă djơ̆ găl kơ rĭm anih, brơi mă yua djơ̆ hnong bă glăi boh tŭ yua pơtô hrăm. Truh ră anai,  22 boh sang hră  djop gưl amăng tơring glông Đak Pơ, Gia Lai lêng kơ dưi tuh pơ alin djop sih gơnam yua, pơtô hrăm. Yă Nguyễn Thị Như Thủy, Kơ-iăng Khua anom bruă Pơtô hăng Pơjuăt tơring glông Đak Pơ brơi thâo: Tui hăng akŏ bruă, thun 2022, tơring glông Đak Pơ tuh pơ alin rơbêh 1 klai 600 klăk prăk djru kơ djop sang hră blơi yua gơnam mă bruă pơtô hrăm. Mơ̆ng anun, pơblih tui ƀơ ƀrư̆ pơblih phrâo gơnam mă yua amăng rơnuk phrâo.

“Thun hrăm 2020-2021, Anom bruă pơtô hăng pơjuăt hơmâo hyu sem lăng gơnam yua mă bruă pơtô hrăm kiăng thâo tong ten, ƀơi djop sang hră. Laih anun rơkâo đĭ hăng Jơnum min mơnuih ƀôn sang tơring glông blơi gơnam yua pơtô hrăm, pơhrua tui rơnoh prăk blơi gơnam yua. Ră anai, mơ̆ng akŏ thun 2022, tơring glông tuh pơ alin kơ rĭm sang hră mơ̆ng 60-80 klăk prăk  pơhrua nao bruă blơi gơnam yua pơtô hrăm ƀudah ming pơkra glăi gơnam yua pơtô hrăm kơ djop sang hră”.

Găn rơgao 1 thun hrăm hăng lu hrơi mông hrăm hră amăng online, ră anai glăi hrăm pơ sang hră, djop sang hră amăng kual Dap Kơdư hlăk ngă hơđong glăi bruă pơtô hrăm, pơphun brơi bruă pơtô hrăm hơđong, rơnuk rơnua, djơ̆ găl, tuh pơ alin blơi yua gơnam hăng mơneč mă ƀiă hrơi blan pơtô tong ten kiăng boh tơhnal pơtô hrăm tŭ yua djơ̆ hăng akŏ bruă pơkă hlâo mơ̆ng akŏ thun hrăm.

Nay Jek: Pơblang