Amăng 10 thun laih rơgao, djop anom bruă khul tơdăm dra mut phung tơring čar Gia Lai ngă hrŏm rơbêh 1.500 ring bruă, črăn bruă yua ƀing hlăk ai pô mă bruă man pơdong plơi pla phrâo, plơi prong thâo rơgơi; pơphun giăm 200 wơ̆t bruă mă anăn “Hrơi mơak kơ ƀing ơi ia jrao hlăk ai ngă tui Wa pơtô”, hyu pơkă lăng, pơjrao, ƀơk ia jrao kơ 50.000 wơ̆t mơnuih hơmâo tơlơi duăm ruă, ƀing čơđai muai sang anŏ ƀun rin tơnap tap. Djă pioh na nao bruă mă 110 hơbô̆ bruă plơi hlăk ai “2 hơmâo, 2 ƀu hơmâo”, amăng anun lu bruă mă pơphun ƀơi să, gir kiăng ngă giong tơhnal pơkă man pơdong plơi pla phrâo hăng ba glăi lu tơhnal hiam klă ƀuh ba sit nik.....Bruă pơlar tui gru hiam ƀing hlăk ai čơđai muai hrăm hăng hla tui Wa dưi pok pơhai lu anih, pơjing pran kơtang pơtrut ƀing tơdăm ngek dra muai, čơđai sang hră Gia Lai hrưn đĭ, găn rơgao tơlơi tơnap, akŏ pơjing bruă mă kơ drơi jăn, sang anŏ pô.

Tlam lơ 14/5, Hlăk ai tơring čar Dak Nông hơmâo pơpŭ bơni “Hlăk ai rơgơi mơbruă hla tui tơlơi Wa pơtô” hăng “Mơnuih ping gah thun hlăk ai rơgơi”. Hơdôm thun rơgao, bruă hrăm hăng hla tui tơlơi pơmin, pran jua mơ̆ng Hồ Chí Minh hơmâo djŏp gưl hlăk ai amăng tơring čar pơsit hăng lu hơbô̆ bruă, hơdră pơčeh phrâo, tŭ yua. Mơ̆ng anun, jai hrơi hơmâo lu hlăk ai rơgơi, gir, hơmâo tơlơi pơmin hiam, lêng kơ nao hlâo amăng bruă hrăm hră, mă bruă, pơčeh phrâo tơlơi rơgơi, hăng djru kơ mơnuih mơnam. Ƀơi mông pơpŭ bơni, Hlăk ai tơring čar Dak Nông hơmâo biwni 28 čô hlăk ai rơgơi ngă tui tơlơi Wa pơtô hăng 17 čô mơnuih ping gah thun hlăk ai rơgơi ƀơi Dak Nông rơwang tun 2023-2025. Anai jing mơnuih rơgơi amăng hrăm hră, mă bruă, blah ngă, kơsem min boh thâo, pơčeh phrâo tơlơi rơgơi, bơwih ƀong, man pơdong plơi pla phrâo hăng gum bruă amăng khul grup hlăk ai, čơđai muai.