VOV4.Jarai - Ơi Đoàn Ngọc Có - Kơ-iăng Khua gơnong bruă ngă hmua hăng pơđĭ kyar ƀon lan tơring čar Gia Lai brơi thâo, ră anai, đơ đam đang hmua amăng tơring čar Gia Lai lĕ rơbêh 550.590 ektar hăng hơdôm phun pla lu hloh lĕ: kơphê, kơsu, tiu, phun kyâo boh troh, phun akha kyâo, pơdai, plum, kơbâo, kơtor hăng añăm tam. Hơdôm thun giăm anai, gơnong bruă ngă hmua tơring čar Gia Lai ba glăi rơbêh 30.000 klai prăk/thun, amăng anun, kơnong amăng bruă pla pơjing rơbêh 26.140 klai prăk.

Kiăng kơ pơplih amăng bruă ngă hmua hơđong kjăp, hơdôm thun laih rơgao, tơring čar Gia Lai hơmâo pơplih hơdôm pluh rơbâo ektar phun pla ƀu pơhrui hơmâo hơdai nao pla hơdôm phun pla dưi pơhrui lu ƀiă. Đơ đam tơring čar ră anai hơmâo giăm 231.000 ektar đang hmua pla pơjing tui hơnong pơkă, pơlir hơbit amăng pơhrui. Tui ơi Đoàn Ngọc Có, pơ anăp anai, tơring čar tŏ tui pok pơhai lu hơdră bruă kiăng đĭ tui rơnoh yôm mơng gơnam đang hmua, biă mă ñu đing nao pơtrut kơtang sĭ mơdrô pơ tač rơngiao.

Siu Đoan: Pơblang