Dua čô čơđai anai dŏ ƀơi ƀuôn Enan, să Ia Rsai, tơring glông Krông Pa, tơring čar Gia Lai, huăi hơmâo ia kor pơđuăi lơ̆m dŏ đom tong krah ia rô tơtăng. Tlam lơ 2/8, 2 čô adơi anăn ñu Rơ Ô H’Bái (14 thun) hăng Rah Lan H’Mơn (15 thun) nao pơhmua lĕ bưp hơjan prong. Lơ̆m ƀuh ia tơluh rai, dua gơñu gir ăt găn nao pơ Ia Rsai mơn či glăi pơ sang. Truh tong krah ia, gơñu dŏ kơđông hĭ, ƀu thâo găn nao dong tah.

Tơdơi kơ hmư̆ arăng lăi pơthâo, Anom bruă git gai pơgang tơlơi truh lŏn adai ngă - hyu ĕp mơnuih bưp tơlơi truh să Ia Rsai iâu Kông an să hrŏm hăng ƀing tơdăm amăng ƀuôn Enan nao pơ ia krông djru ba dua čô anai. Mơnuih apăn bruă mă yua ao kơsu đung amăng ia hăng hrĕ kŭi nao pơ anih dua adơi amai dŏ đom. Gir abih pran jua djru, dua adơi amai ñu hơmâo ba đĭ hăng kơdư laih.