VOV4.Jarai-Amăng lơ 12/8, Jơnum min mơnuih ƀôn sang tơring čar Gia Lai pơphun Jơnum pok pơhai bruă mă thun hrăm 2022-2023. Ƀơi mông jơnum khua mua Jơnum min mơnuih ƀôn sang tơring čar pơtrun hiăp kơ anom bruă Pơtô hăng pơjuăt laih anun djop tơring glông prăp lui klă kơ thun hrăm phrâo, anăm lui čơđai sang hră pơpă yua tơlơi tơnap tap ƀun rin mơ̆ khom pơdơi hrăm hră.

Mông jơnum abih bang

Tui hăng pơkă hlâo, thun hrăm 2022-2023 ƀơi Gia Lai amra pơphun mơ̆ng lơ 29/8/2022 hăng giăm 400 rơbâo čô čơđai sang hră hăng čơđai gưl muai. Kiăng prăp lui klă kơ thun hrăm phrâo, tơring čar hơmâo brơi yua 623 klai prăk tuh pơ alin blơi gơnam yua mă bruă, pơtô hrăm, pơhrua nao dơ̆ng 1.244 čô mơnuih ngă nai sit nik djop gưl hrăm.

Ƀơ mông jơnum, yă Nguyễn Thị Thanh Lịch, Kơ-iăng Khua Jơnum min mơnuih ƀôn sang tơring čar Gia Lai pơtrun hiăp, brơi anom bruă pơtô hrăm khom ngă hrom tong ten hăng anom bruă ia jrao, pơđĭ tui mrô mơnuih tlâ̆o pơgang klin Covid 19 kơ čơđai sang hră djop; pok pơhai klă hơdră pơhlôm pơgang klin amăng sang hră; pơđĭ tui tơlơi thâo mă bruă, ƀing nai pơtô hăng ƀing ngă bruă wai lăng; ngă tui tŭ yua, pơkrem hăng 3 tơhnal bruă dêh čar pơtrun pơdjơ̆ nao kơ bruă pơtô hrăm; ăt pơđĭ tui boh tŭ yua pơtô hrăm kơ kual mơnuih djuai ƀiă dŏ.

Nay Jek:  Pơblang