Hăng boh pia “Ngă djơ̆ hnơ̆ng rơnoh sĭ mơdrô-Tơlơi ră ruai mơ̆ng mơnuih Việt-akŏ pơjing tơlơi bơwih ƀong huă rơgơi mơ̆ng bruă đang hmua, mơnong ƀong huă hăng tuai čuă ngui pơdar pơhlom akŏ klôn”, jơnum pơčrong sai lăi nao hơdră pơtruh nao rai plah wah mơnuih ngă hmua hăng sang bruă mơdrô, pơkra ming, ngă hrŏm hăng tuai čuă ngui; tơhnal pơkă brơi djơ̆ kual anih pla, ba yua boh thâo ia rơgơi phrâo, čih anăn pơsit gơnam sĭ mơdrô hmư̆ hing hăng pok prong anih anom sĭ mơdrô ƀơi jar kmar.

Amăng bruă pơkra ming, tơlơi kiăng lĕ khom ĕp lăng tong ten anŏ tŭ yua hiam, pơhlom brơi anih ba sĭ hơđong hăng ngă djơ̆ anŏ pơkă mơ̆ng anih blơi ƀơi tač rơngiao. Mơng črăn bruă pơkra ming, truh pơ bruă pơsir hĭ hăng boh thâo ia rơgơi phrâo, ƀhu krô, răk lui klă, truh đĭ tơpơi hơmâo hnơ̆ng pơkă, lir hơbit hăng bruă anung gơnam dưm amăng hruh rơgoh hơdjă huăi hơmâo ia jrao pơđăm lui sui laih anun pơčrâo ten anih pla, sang bruă anung ba gơnam, thâo anăn krăn pô kiăng răk pioh sui hrơi blan djơ̆ hnơ̆ng pơkă, pơgăn anŏ ngă hrŏ hĭ, huač soh sel laih anun ba yau hơdră pơgang huăi hơmâo ia jrao ôh. Bruă ba yua djah djâo, asuk kơđuh boh troh, phun pla dưm amăng đang hmua, pơđĭ tui rơnoh yom amăng bruă sĭ mơdrô, pơhrŏ hĭ ano ngă tơbiă asăp sat amăng adai rơngit.

Kah pơpha tơlơi thâo ba yua ia rơgơi amăng bruă čem rông mơnong hăng pel ĕp tong ten ia djah, pơgang anŏ rơgoh kơ ia tơsâo, ơi Đoàn Trung Kiên, khua sang bruă đang hmua blôk rông rơmô djet ia tơsâo NutiMilk ƀơi să Mang Yang, Gia Lai brơi thâo, abih bang glông bruă wai lăng čem rông pŭ rơmô anun khom čih pioh thâo tơlơi pơhing na nai, djru brơi bruă krăp lăng tơlơi găng añrăng mơ̆ng pŭ rơmô hăng tơlơi ñu rơbat nao rai kiăng thâo.

“Hăng pŭ rơmô truh 12 rơbâo drơi, bruă tuh pơ alin, ba yua măi mok ia rơgơi phrâo wai lăng hăng thâo tơlơi pơhing kơ pŭ rơmô dưi ngă tui djơ̆ lăp. Anai lĕ hơdră bruă ia rơgơi phrâo mơ̆ng Israel. Tui hăng anun, lơ̆m 10 mơnit hơmâo sa tơlơi pơhing mơ̆ng rơmô pơƀuh brơi, tơlơi pơhing hơmâo na nao, pơtong rơđah, lok nao rai, lăi pơthâo tơlơi suaih pral, găng añrăng mơ̆ng pŭ rơmô”.

Ƀu kơnong pơđĭ tui anŏ tŭ yua gơnam pơkra ming đôč ôh, bruă ba gơnam sĭ mơdrô boh troh mơ̆ng đang hmua truh pơ mơnuih blơi jing mơnong ƀong, sa tơlơi ră ruai mơ̆ng lơ̆n monai glai klô hăng truh kơ bruă čơkă tuai hyu ngui ăt hơmâo pơtong glăi, anăp ngă bruă pơgang rơnoh yom sĭ mơdrô, Lơ̆m ngă tui anai, kiăng hơmâo mơnuih ngă hmua mut hrŏm, ƀing kơhnăk hơtŭk riă tơnă hơbai, mơnuih kơhnâo rơgơi hăng sang bruă mơdrô ba tuai hyu ngui. Hơdôm tơlơi ră raui kơ gơnam pơkra ming mơ̆ng pơpă hơmâo, mơnong ƀong huă, bruă mă mơ̆ng gru grua đưm, kơnang kơ rơnoh hơmâo sit nik ƀơi anăp mơta; mơnuih ƀôn sang plơi pla kiăng ngă hrŏm laih anun tŭ mă boh tŭ yua mơ̆ng anun bơkơnar soh.

Yă Nguyễn Thị Thanh Lịch, Kơ-iăng khua Jơnum min mơnuih ƀôn sang tơring čar Gia Lai lăi lĕ, anŏ gêh găl gơnam tam hơmâo lu mơta, mơ̆ng kual lơ̆n mơnai glai klô Dap Kơdư, trun nao truh pơ tơring hang ia rơsĭ, ngă gêh găl brơi tơring čar tañ pơđĭ kyar, tui lu hơbô̆ ngă hmua, lir hơbit hăng pơjing rai mơnong ƀong huă hăng tuai hyu ngui. Khă tui anun, kiăng pơjing anŏ gêh găl anun, jing bruă mă pơsir tơlơi bơwih ƀong huă sui thun, mơnuih ngă hmua kiăng hrăm thâo tong ten anih anom sĭ mơdrô či kiăng, tơlơi thâo amăng bruă sĭ mơdrô hăng djru ba thâo krăn tơhnal pơkă anŏ hơdjă rơgoh pioh sĭ mơdrô pơ tač rơngiao.

“Ngă bruă bơwih ƀong huă mơ̆ng đang hmua, mơnuih ngă hmua thâo hruaih khom thâo krăn gơnam tam boh troh ta pơjing rai, dưi ba sĭ mơdrô hiư̆m pă. Kiăng thâo hluh tong ten dưi ba sĭ mơdrô pơ anih blơi kualMi kô̆ lĕ hơdră răk pioh hiư̆m pă, mut nao sĭ pơ dêh čar Khač hiư̆m pă. Ƀing ta kiăng hơmâo tơlơi thâo tum ƀiă. Tơlơi gơgrong ba mơ̆ng tơring čar, mơ̆ng khua mua djop gơnong bruă, sang bruă ngă hrŏm, čih pơkra tơlơi phiăn pơkă tong ten, pơjing brơi jơlan gah, djru pơsir hĭ tơlơi gun sit mơnuih ƀôn sang ngă bưp tơlơi tơnap tap”.