Ƀơi mông bơbưp, Khua anih jưh pơ ala Việt Nam ƀơi Bỉ, Khua khul pơ ala mơ̆ng Việt Nam ƀơi Khul pơlir hơbit kual Mi Kô̆, yă Nguyễn Hương Trà brơi thâo, ră anai hơmâo năng ai 1,5 klăk čô mơnuih Việt Nam glăk dŏ hơdip pơ kual Mi Kô̆. Khul mơnuih jai hrơi đĭ kyar, mut hrŏm hơdip mơda klă, thâo gum pơgop, djă pioh gru grua laih anun hơmâo lu tơlơi gum pơgop kơ plơi pla, lŏn ia.

Pơhiăp pơ anai, Khua ping gah, Khua mir sir ơi Tô Lâm bơni biă kơ hơdôm tơlơi gum pơgop mơ̆ng mơnuih ƀon sang Việt Nam ƀơi Kual Mi Kô̆, biă ñu tơlơi gơgrong bruă mơ̆ng khul grup ngă kjăp tui tơlơi gum pơgop, pơtrut bruă rô nao rai mơak plah wah Việt Nam hăng hơdôm boh dêh čar. Lăi pơtŏng, lŏn ia ta glăk mut amăng thun blan đĭ kyar phrâo, Khua ping gah, Khua mir sir rơkâo mơnuih ƀon sang dŏ pơ čar rơngiao pơtrut tui tơlơi rơgơi, anŏ hơmâo; pơtruh sang bruă mơdrô, mơnuih kơhnăk, mơnuih rơgơi laih anun pơtô glăi boh thâo ia rơgơi, măi mok phrâo kơ lŏn ia ta. Hơdôm sang bruă pơ ala dêh čar Việt Nam ƀơi čar rơngiao kiăng ngă klă bruă pơgang ba mơnuih ƀon sang, djru ba khul mơnuih mơnam, ngă gêh găl brơi kơ mơnuih ƀon sang dŏ pơ čar rơngiao gum pơgop sit nik hloh amăng bruă akŏ pơjing hăng đĭ kyar lŏn ia./.