Jơnum ngui kơphê him lăng či pơphun mơ̆ng kơnôl 15/12/2026 truh abih kơnôl 4/4/2027, hăng lu bruă mă phun, yom amăng blan 3 hăng akŏ blan 4/2027, kiăng pơhưč truh 1 klăk 300 rơbâo wơ̆t tuai hyu ĕp, mut lăng.

Anŏ phrâo mơ̆ng tal jơnum ngui anai, pôr pơthâo anăn kơphê hăng pơđĭ kyar bruă kơphê, mơ̆ng tơring pla pơjing truh kơ bruă pơkra ming hăng ba sĭ mơdrô. Lu bruă ngă ngui ngor Rơwang hrơi tơjuh kơphê hiam phara Việt Nam, anih anom pơblih phrâo gah bruă kơphê, Jơnum pơplông ƀing ngă hmua rơgơi, Jơnum prong hăng jar kmar anăn “Ƀuôn Ma Thuôt-plơi phun kơphê Robusta mơ̆ng rong lơ̆n tơnah” hăng jak iâu tuh pơ alin pơkra ming tơpung kơphê hiam, jơman hloh, sa tơlơi čang rơmang djru pơđĭ tui rơnoh sĭ mơdrô kơphê.

Anih anom pơphun tơlơi ngui ngor dưi pok pơhư prong tui anăp ngă pơtruh nao rai lu anih anom mơ̆ng Ƀuôn Thuôt, Ƀuôn Đôn, Dơnao Lak, Dơnao Ea Kao truh pơ Tuy Hòa, lir hơbit hăng gru grua hiam, pơplông pơrơguăt drơi jăn, pơdă mơnong ƀong huă hăng tuai hyu ngui pơ kual ia rơsĭ. Akŏ bruă rơkâo pơphun jơlan hơdră anăn Roadshow “Mơ̆ng kual čư̆ siăng truh pơ ia rơsĭ jơngeh”, hrŏm hăng sa rơwang hrơi tơjuh mơñum kơphê ƀu apah prăk amăng kual gah ngŏ kiăng kơtưn pơlir hơbt tuai čuă ngui.

Lăp đing nao hloh, Dak Lak him lăng akŏ pơjing khul gơnam sĭ mơdrô bơwih brơi mơnuih ƀôn sang hăng tuai čuă ngui tơdơi kơ tal jơnum ngui, hơmâo pơphun hyu sem ƀơi jơlan pơdă kơphê Ƀuôn Ma Thuôt, dua ƀut anih check-in ƀơi tơdron lăk 10/3 hăng tơdron lăk Phú Yên, hrŏm hăng sang gru đưm show ƀơi sang djă pioh gơnam gru đưm Dak Lak. Amăng anun, sang dlông, gru đưm yơh anŏ pơhmu či pơdah thâo gru grua amăng thun.

Tui hăng ơi Trần Hồng Tiến, Khua gơnong bruă Gru grua, Pơrơguăt drơi jăn hăng Tuai čuă ngui tơring čar Dak Lak, jơnuk ngui tal anai đing nao bruă ngă pôr pơthâo, ba rup rap kơphê Ƀuôn Ma Thuôt dưi nao giăm mơnuih ƀôn sang amăng jar kmar. Rơngiao kơ plăng tơlơi pơhing kơnuk kơna, djop mơta atur tơlơi pơhing mrô, hơmâo rơkâo ngă hrŏm Phun kông ty anom bruă rơdêh por Việt Nam djru pôr pơthâo mông jơnum ngui amăng rodêh por, kiăng ƀing tuai đĭ rơdêh por amăng dêh čar hăng jar kmar thâo soh.

“Thun anai tơlơi kiăng lăi nao, ƀing gơmơi či pôr pơthâo, mông jơnum ngui hăng ba tơlơi ngui ngor mơak tơl jar kmar thâo. Gơnong bruă gơmơi rơkâo ngă hrŏm sang bruă Hunitech mơ̆ng Phun kông ty rơdêh pôr Việt Nam djru pôr pơthâo mông jơnum ngui anun amăng rơdêh por pioh kơ ƀing tuai đĭ rơdêh por Vietnam Airlines thâo soh”.

Khua Jơnum min mơnuih ƀôn sang tơring čar Dak Lak, ơi Đỗ Hữu Huy brơi thâo, pơđĭ kyar bruă tuai čuă ngui-bơwih bơwăng lĕ anăp ngă bruă sui thun, Jơnum ngui kơphê Ƀuôn Ma Thuôt ƀu kơnong dŏ glăi ƀơi bruă pôr pơthâo đôč ôh, dŏ jing pran kơtang pơtrut bruă ngă, pơđĭ kyar, pơđĭ rơnoh sĭ mơdrô boh troh đang hmua hăng kơnuih hmư̆ hing ƀơi tơring čar truh pơ jar kmar. Kơ anăn păn hmư̆ hing, gơnam sĭ mơdrô lĕ, ơi Đỗ Hữu Huy tŭ ư hrŏm anăn iâu “Jơnum ngui kơphê Robusta tơring čar”.

“Jơnum ngui kơphê Ƀuôn Ma Thuôt lĕ anăn mơ̆ng dêh čar, bơ tơlơi pia slogan piho pôr pơthâo anăn lĕ “Ƀuôn Ma Thuôt-plơi pla phun kơphê Robusta mrô 1 rŏng lơ̆n tơnah. Ƀing ta kiăng pơsit tong, Robusta mơ̆ng ƀing ta lĕ mrô 1 laih, bơ kơphê hrŏm amăng rŏn tơnah lĕ ƀing ta jing mrô 2. Laih anun Ƀuôn Ma Thuôt hơmâo truh 40% rơnoh kơphê amăng dêh čar”.